<<عند عاصف وامل>>
كانت وجهتهم بعيده والسماء بدت تمطر ، لف عليها وشافها نايمه بعد ما اهلكت نفسها بالبكاء ، وقف السياره قدام كوفي والتفت ينزل مرتبتها عشان تنام مرتاحه ، كانت مغطيه وجهها ووخر الطرحه عن وجهها عشان ترتاح بعدها نزل وسكر ابواب السياره ، اخذ له كوبين قهوه ورجع للسياره ، حط كوبها قدامه لين تصحى وارتشف من قهوته لعل الصداع يخف وحرك سيارته للوجهه الي يبيها متجاهل سقوط الامطار من فوقهم
<<عند الغيث ومي>>
اخذ قهوتهم ورجع للسياره ركض عشان ما يتبلل من المطر ، مد عليها قهوتها وشكرته عليها ، نزل قهوته بمكانها وقعد يهز راسه عشان ينشف من الماء الي عليه ، ضحكت على الحركه الي سواها والتفت لها من سمع الضحكه ، تنهد بحب وهو يشوفها مبسوطه كذا
غيث: لو داري انك بتضحكين كذا كان تبللت من زمان
مي: لااا مو قصدي كذا
غيث: تدري شلون؟
مي: وشو؟
حرك السياره : بوريك الحين
بعد خمس دقايق وصلو لمكان كله ورود وفاضي مافيه احد وكان فيه انوار خفيفه جداً واضح ان المكان قديم
مي: المكان يجننن!!
غيث: ايي هذا مكاني المفضل كنت اجي فيه بكل مره تضيق فيني الدنيا يوم تركت الديره
زادت ضربات المطر وضحكت: مططررر
نزل من السياره وقالها تنزل معه
مي: ناوي تغرقنا؟؟؟
رفع صوته عشان تسمعه: اييي
اعجبتها الفكره ونزلت كوب قهوتها ونزلت وراه ، اعتلت ضحكتها ارجاء المكان وما قدر ما يضحك معها من شاف سعادتها ، قرب يشيل الطرحه عن وجهها
غيث : محد يجي هنا
ابتسمت ورفعت راسها تتامل المطر الي ينزل عليهم وفجاه تذكرت قبل سنوات لما كانت جالسه وجاء يجلس جنبها واعطاها فروته ،
مي: غيث بسالك
غيث: اسالي يا روح الغيث انتي
جمعت طاقتها عشان تساله: من متى تحبني وليه اخترتني انا؟
ابتسم على سؤالها وكانه ينتظر من يساله عشان يتكلم وما يسكت
غيث: همم من وين ابدا يا روح الغيث اخاف ما اقدر اوصل الي بخاطري ، رفع يده يرجع فيها شعرها الي تبلل خلف اذنها
وكمل: حبيتك من اول ما شفتك وسمعت صوتك حبيتك من يوم شفت عيونك وخطفت انفاسي وخذت روحي معها رجعت لهم جسد بدون روح ، الغيث ترك روحه عندك وغدا من دونها ، ما طرف النوم عيني بذيك الليله كنت كل ما احاول انام يرجع طيفك لذاكرتي
اكذب لو قلت اني ما حبيت هالشعور الي زرعتيه بقلبي ، وتساليني ليه انتي بالذات؟ وهو فيه غيرك قادر او قدر على الغيث؟ انتي غير عن الكل انتي الي خليتيني اغير وجهتي بالحياه وخليتك انتي كل اهدافي و مبتغاي
ابتسمت بحب على كلامه وهي تحس ان قلبها ماهو بخير بعده
مي: جيتني مثل البلسم على القلب ودوا لكل اوجاعي
حاوط خصرها ونطق وهو ذايب في تفاصيلها وكلامها من منطوقها : ارفقي بقلبي يا روح الغيث
انحرجت من كلامه وقربه وابتسمت وهي ترفع يدها تحاوط رقبتها
، بادلها الحضن وشدها له اكثر ، دفن وجهه برقبتها يستنشق عبيرها ، وده لو يوقف الوقت ويبقون على هالحال والمطر فوقهم للابد راضي اشد الرضى يعلق هنا ، وفي هالليله غنى الغيث لروحه بين البروق و رعدها
