<<في قصر راشد>>
كانو كلهم مجتمعين على طاوله الاكل يفطرون
قاطع هدوئهم دخول غيث
غيث: صبحكم الله بالخير
راشد: يا مرحبا والله بالغالي صبحك الله بالنور
جلس على الكرسي الي مقابل لها ، ناظر فيها وكانت تلعب بالملعقه ومسويه نفسها تاكل ، ابتسم وجابت له العامله كاس عصير حطته على الطاوله قدامه
راشد: ما عينت اخوك ؟
غيث: لا والله ليه؟
راشد: البارح زعل علينا وطلع
عقد غيث حاجبه: افا من وش؟
لطيفه: ما تعرف اخوك يا غيث ! كالعاده سوا مشكله وحطها على غيره ولقى عذر عشان يطلع من البيت
غيث: لا يا عمتي ماهي عوايد عاصف محد يعرفه كثري عاصف ما يغلط على احد بدون سبب
راشد: ماهوب عاجبني وضعه مير ازهم عليه وقله يرجع البيت
غيث: ابشر
كانت تسمع حديثهم ومنقهره يعني بالاخير ماكان قصدها تطيح الحلا وهو كبر السالفه وسوا منها مشكله!
ابو عبد الله: الا يا بنتي ما قلتي لي وش صار على المقابله؟
مي: اليوم ان شاء الله بخلص فطور واطلع
ام عبد الله: الله يوفقك
مي: امين
راشد: لو سامعه كلام ابوك يا بنتي ومتوظفه بالشركه حقته احسن لك
ابو عبد الله: تقول ما تبي تعتمد علي تبي تبني نفسها بنفسها
راشد: اييي بس ان صار وما انقبلتي ولا شيء تجين لابوك
مي وهي تستقيم: ان شاء الله جدي
ام عبد الله: على وين؟
مي: اخاف اتاخر بروح من الحين
راشد: من بيوديك ؟
مي: باخذ لي سواق
عقد غيث حاجبه من سمعها وقام من مكانه
غيث: تروحين مع سواق وانا موجود؟ بوديك معي
مي: توك جلست على فطورك خلك
غيث: ماعليه شبعان
ابو عبد الله: الله يحفظكم واذا خلصتي المقابله اتصلي بشرينا
مي: ابشر
ركب السياره ينتظرها تجيب شنطتها ، ركبت وكان بيدها ملفات وشنطتها شافها مبتلشه فيهم ومزحومه منهم ، اخذ الملفات من يدها وحطهم وراء ، بعدها حرك السياره
غيث: الساعه كم موعد المقابله؟
مي: عشر
ناظر الساعه قدامه كانت الساعه تسع ونص
غيث: بدري شوي تبين نمر ناخذ لنا قهوه؟
مي بسعاده: اي ياليت ما شربت قهوتي اليوم
ابتسم غيث من سمع نبرتها السعيده: تامرين امر
وقف عند كوفي وسالها عن قهوتها الي تحبها بعدها نزل ، ما مرت دقايق الا وهو جاي وبيده كوبين قهوة ، مد عليها قهوتها وحط قهوته قدامه ، عدل حزام الامان وشغل اغنية ماجد المهندس "جننت قلبي"
ابتسمت يوم شغلها لانها تحب تسمع لها ، كان الطريق طويل بنظرها
وصل البارت الي يحبه وردد معه
"شد انتباهي غرامً غير اطباعي
حرك شعوري واحس ربي بلاني به
وبكل هداوه لقيت القلب ملتاعي
كان اهتمامي تكون اول مكاسيبه"
وجه انظاره لها باخر بارت والابتسامه شاقه وجهه ، حست بتموت من الاحراج بس ماقدرت تمسك ابتسامتها والي بانت له بعيونها
مي: غيث
رفع يده بسرعه يقصر على صوت الاغنيه ولف عليها
غيث: عيون الغيث وروحه امري
تنهدت على رده ونطقت: متى تخلص دوامك؟
غيث: والله مدري مافيه وقت محدد ان خلصت اشغالي هناك طلعت
مي: اوه تمام
حس انها كانت تبي تقول شيء بس ترددت وسبقها: بغيتي شيء؟ قولي لي وتدللي
حطه عيونها بعيونه وقالت: كنت ابيك ترجعني البيت بعد المقابله
غيث بابتسامه: على هالخشم
مي: وشغلك؟ ما ابي اشغلك
غيث: انتي كل اشغالي
استحت على وده وتحس شوي وتموت ليه كذا كلامه معسول!
وقف قدام الشركه الي بتسوي معهم مقابله واخذت كوب قهوتها معها ومد عليها ملفاتها الي ورا
غيث: استودعتك الله واول ماتخلصين دقي علي
حست بورطه يوم تذكرت ان رقمه مو معها ولا تدري كيف تطلبه
غيث: هاتي جوالك
مدته عليه وسجل رقمه عندها ورجعه لها ، كيف كذا فهمها ..
خذت جوالها ودخلت للشركه ، دق عليه رعد
رعد: وينك؟
غيث: جايك بالطريق
رعد: يلا عجل ورانا شغل
سكر جواله واتجه للقسم
