<< بعد مرور اربع سنوات >>
ريحه البخور تفوح بالقصر والخدم يرتبون المجلس الكبير ويصفون الطاولات وينقلون القهاوي والحلويات ، نزلت من الدرج بسرعه وشافتهم متجمعين بالصاله ويتجهزون وقدامهم الميكب ارتست
مشت لين وقفت قدامهم ولفت تعطيهم نظره على فستانها البيج الي يلفت النظر عليها ، وشعرها الطويل الاسود ، كانت جميييله
ساره: شرايكم بفستاني!
بدور والابتسامه شاقه وجهها : ما شاء الله تبارك الرحمن طالعه قمر
ام ماجد: يا ما شاء الله طالعه تاخذين العقل مو بس فستانك!
لطيفه: بسم الله عليك ياروح امك
استحت ساره من ردة فعلهم ومدحهم لها ، وجلست على الكنب تتاملهم وهم يتجهزون وكل وحده تقول الزين عندي
ام ماجد: ساره حبيبتي وينها امل طولت
ساره: خليتها تلبس فستانها دقايق وتجي
نزلت من الدرج وسمعت حوارهم وابتسمت على منظرهم وهم مجتمعين
امل: اشوفكم فقدتوني!
رفعو روسهم لها وصنموا من الجمال الي واقف قدامهم ، كانت لابسه فستان اسود لتحت الركبه وماسك على جسمها المرسوم وفاكه شعره الي يوصل لين كتفها اما الميكب كان ناعم وهادي ، مناسب لملامحها المليئه بالرقه والنعومه ، كانت جميله بشكل يخطف الانفاس
بدور: تبارك الرحمن اول مره اشوف ملاك يمشي عالارض
امل: يوووه لا تبالغين يا عمه
ام ماجد: بسم الله عليه يمه بنتي تاخذ العقل!
لطيفه: ما شاء الله يا روحي انتي تاخذين العقل
بدور: اي والله بسم الله عليها
لطيفه: اجلسي جنب ساره لين اخلص شغلي واجي احصنكم، ابتسمت لهم بحب وجلست جنب ساره
ساره: تتوقعين حنان وامها يجون؟
امل: اكييييد ما بقى احد ما عزموه
ساره: يليل الحين تغثنى
امل: اقول حبيبتي هي الي بتنغث هي وامها
ضحكت ساره وطلعت جوالها توري امل كم شغله تخص الجامعه تبي تستشيرها فيها
دق جوال بدور ورفعته بسرعه : هلا عاصف
لفت امل لها يوم نطقت اسمه
بدور: ابشر
لفت على البنات : ادخلو عاصف جاء
قامت ساره وراحت وراها امل وام ماجد حطت الطرحه على وجهها ، دخلو في المطبخ كان اقرب لهم ، ثواني بس ودخلت ام غيث ووراها عاصف الي شايل بيده اكياس كثيره ، ردو السلام على الموجودين
عاصف: اخبارك خالتي ام ماجد؟
ام ماجد: بخير يا ولدي اخبارك انت
عاصف: بخير نحمد الله
بدور: ما شاء الله جايبين السوق كله!
عاصف: ما خلت شيء ما جابته الله يعافيها
ضحكو الموجودين على حماس ام غيث
لطيفه: من يلومها اليوم بيرجع ولدها البكر وقرة عيونها
ام غيث: والله يا سعادتي بهاليوم الي انتظرته سنين ياربي لك الحمد
بدور: اي والله يا سعادتنا كلنا برجعه الغيث لنا
ام ماجد: الله يبلغكم فيه ان شاء الله
ردو كلهم : امين
عاصف: وين اودي الاكياس الي معي؟
بدور: نزلها هنا الخدم بيدخلونها
عاصف: تامرون شيء ثاني اجل؟
لطيفه: وين بتروح؟
عاصف: برجع للدوام لين المغرب سلمت مناوبتي اواحد من اخوياي لو يدرون عني قمعوني
ناظر بساعته في يده وقال: اصلاً مو باقي غير ساعتين على المغرب
ام غيث: الله يستر عليك استودعتك الله
بدور: تعال قبل يوصل غيث!
عاصف: اكيد ولا يهمك
طلع بعدها عاصف وراح لدوامه ، وطلعو البنات من المطبخ يسلمون على ام غيث
ام غيث: ما شاء الله وش هالزين!
استحو البنات على مدحها وشكروها ، وبعد ما جهزو كان باقي ساعه بس على المغرب وبدو الضيوف يدخلون المجلس وبدور وام غيث واقفين يستقبلونهم عند باب المجلس
