في احد مستشفيات الرياض ، كانت جالسه تنتظره يطلع من غرفة الاشاعه وميته توتر ، طلع وهو يعدل اكمام ثوب وانتبهت له وقامت بسرعه وحاولت تجمع حروفها واخيراً نطقت بغصه
ام غيث : شقال لك الدكتور؟
حط يده على كتفها وحاول يطمنها قد ما يقدر
عبد الرحمن: الحمد لله وضعي زين
ام غيث بغصه : لا تكذب يا عبد الرحمن اعرفك زين ووجهك ما يبشر بالخير !
نطق عبد الرحمن بقل حيله : ما تغير شيء قالو بعد شهرين لازم تسوي عمليه و يستأصلون الورم ، وان شاء الله خير
بكت ام غيث ومعد حست برجلها كانت بتطيح لو ما ثبتها عبد الرحمن ، مسكها مع كتفها واخذها للكراسي الي قدام غرفة الدكتو
عبد الرحمن: استهدي بالله يا ام غيث قلت لك ان شاء الله خير!
ام غيث: ان شاء الله ان شاء الله
طلع عبد الرحمن مناديل من جيب ثوبه وقعد يمسح دموعها ويحاول يطبطب عليها لين هدت وطلعو للسياره متجهين للفندق الي قاعدين فيه هذي الفتره
وبنص الطريق قالت ام غيث : متى ناوي تعلم عيالك؟
عبد الرحمن : ما ودي اعلمهم الحين واقلقهم علي
ام غيث: وتعرف انهم بيتضايقون منك لو ما علمتهم وعمليتك معد باقي لها الا شهرين
عبد الرحمن: تتكلمين وكانك ما تعرفينهم محد منهم بيتهنى بنومه وحياته ان عرفو ما ودي اقلب حياتهم وانتي تعرفينهم زين..
تنهدت ام غيث ومدت يدها تمسك يده بمحاولة في مواساته ولا زالت الضيقه بقلبها عليه ، خايفه تخسره وهي مالها غيره بهالدنيا هو وعيالها..
~
عند البل كانو متجمعين العيال وراشد ويفطرون
راشد : اقول يا عاصف ما دقيت على ابوك شفت متى يجون؟
نزلت كاسة الشاهي من يده وبلع لقمته قبل يجاوب جده: يقول بعد يومين ان شاء الله
راشد : ماتدرون وش عندهم؟ كثرانه سفراتهم مانيب مرتاح
عاصف: والله ما سألتهم يا جدي لكن ان شاء الله خير
عبد الله: اقول جدي بسالك
راشد: ها شتبي
عبد الله : بسم الله جدي شفيك عصبت! توك مروق
ضحكو العيال على خرشته ، وغيث غص بلقمته وقعد يربت على ظهره عاصف وهو ماسك الضحكه
راشد: مانيب معصب قل الي عندك اخلص علي
عبد الله: ليه ما نكشت! الجو مره حلو اليوم
عقد راشد حواجبه باستنكار : انت كاشت الحين وبنص البر وش تبي اكثر!
ضحك ماجد على رد جده وقال لعبد الله: معليه تتخطى
عبد الله حز بخاطره موقفه حالياً وقال : انا اقصد اننا نكشت كلنا يعني مع عمتي بدور واهلنا يعني حرام من يوم جينا وهم بالبيت
راشد : ليه شاكين عليك هم انهم طفشانين؟
عبد الله : جدي الله يهديك بس الشرهه علي اقدم لكم حلول للطلعات العائليه بسكت خلاص
قام عبد الله من السفره وكان واضح زعل منهم
تعالت ضحكاتهم عليه وقال سلطان: كمل طيب لقمتك!
عبد الله: معد ابي بالعافيه عليكم
بعد ما راح عبد الله التفت الجد على ابو عبد الله وابو ماجد
راشد: والله ماهي بفكرة شينه ازهمو على حريمكم وبناتكم وخلونا نجيبهم اليوم هنا يوسعون صدورهم ويغيرون جو
ردو بصوت واحد: ابشر يبه
التفت راشد لعاصف وغيث وقال : وانتم تروحون تجيبون الذبيحه تصلخونها وتطبخونها وشوفو عمتكم وش تبي ووش ناقصها للمطبخ وجيبوه
عاصف: ابشر ازهلها
راشد: بعدي عيالي
