دخلو القصر ينزلون الاكياس الي بيدهم
امل: اف تعبت
جلست مي على الكنب الي قدامها وقعدت تريح شوي وجلست جنبها امل
امل: مر اليوم بسرعه انشغلنا بشكل مو طبيعي
لفت على مي يوم ماسمعت ردها وشافتها سرحانه ، اشرت بيدها قدام وجهها ، انتبهت لها وهمهمت
امل: اقول بكره ملكتك وحنا ماسوينا شيء للحين غير الشوبينق
مي: وش بنسوي يعني خلاص نحط ميكب ونسوي شعرها بنفسنا
دخلت عليهم بدور وسمعت كلامهم وشاركتهم
بدور: لا ياحبيبتي كلمت الكوافيره والميكب ارتست وبكره العصر بيجون والحين تاخر الوقت انتي وياها والبيت كله نام الا انتم يلا
امل: والله يا عمه من العشاء وحنا نفر بالسوق ومن التعب ودي انام لين بكره الليل
بدور: اجل يلا قومو
قامت بدور ومي وراحو لغرفتهم ، نامت امل من حماسها لبكره بس مي ماقدرت تغفى جلست تفكر وش بيصير بكره وميته توتر
~
في الفندق
له ساعه يحاول ينام ولا قدرة تغفى عيونه ، قام ولبس ثوبه ونزل يطلب له قهوة ، اخذ قهوته وطلع على البلكونه يتأمل نور القمر ونجومه ، ارتشف من قهوته وطرى على باله هالبيت وهو يفكر فيها
" في وجنتك نور القمر ، وفي سلهمت عينك مقيل
وفي حكاك من ثغرك خمر، حتى لو ان حكيك قليل"
انجلى ضو القمر والغيث ما غمض عيونه ، كيف يغمضها واليوم حصاد تعبه طول السنوات الي راحت؟
دخل الحمام تروش ولبس ثوبه ونزل لرعد تحت ينتظره اتفق معه امس انهم بيروحون للحلاق مع بعض ، شافه رعد مقبل عليه
رعد: وش هالزين يا معرس وجهك منور اليوم
غيث: الله يسلمك
ركبو السياره وحركو للحلاق
غيث: كيف طلعوك من القسم؟
رعد: دبرت نفسي خليت واحد من العسكر يوقف مكاني
غيث: وكيف تخاطر كذا لو يجي منصور قلب القسم فوق راسك
رعد: يرجال خله يولي مافيه اهم من هاليوم عندي
ابتسم غيث: يا بعد حيي انت
~
في قصر الجد راشد
كان القصر عباره عن فوضى الكل مشغول ويتجهز وطلبيات الاكل والقهاوي والحلويات كل شوي واصله طلبيه
ام عبد الله: وينها مي احد يصحيها من الصبح نايمه!
لطيفه: اتركي البنت ترتاح لاحقه على التجهيزات اذا جاء العصر صحيناها
ام عبد الله: مو باقي غير ساعتين عالعصر
بدور: ام عبد الله خلصت من الكوافيره تعالي مكاني
قامت ام عبد الله وراحت بدور للمطبخ تشوف الخدم وش سوو
ساره وامل كانو جالسين يختارون وش يحطون ميكب
دخل عليهم راشد وابتسم يوم شافهم منشغلين ومبسوطين ، جلس على الكنب فوقهم ونطق: وينها العروس ما اشوفها
ام عبد الله: فوق نايمه
راشد: افا للحين نايمه!
ام عبد الله: اي والله
قام راشد : اجل بقوم اصحيها بنفسي
كانت بتقوم امل وقاطعت جدها: انا بصحيها جدي ارتاح
راشد: لا اجلسي انا ابي اصحيها واكلمها بموضوع
امل: ابشر
