صباح يوم جديد في بيت راشد الي امتلا بريحة القهوة والبخور واجواء يوم الجمعة المحببه لهم ، التفت راشد يشوف مسفر نازل من فوق وبيده مسباحه ونطق وهو ينزل فنجال قهوته: بدري علاك
مسفر وهو يلعب بالسبحه: اعذرني يبه صحيت متاخر ورحت اتروش
تنهد راشد يوقف واشر على عياله واحفاده: الصلاه معنا قومو
طلعو العيال يصلون ودخلت نوره وام ماجد وام عبد الله للمطبخ يتساعدون في الغذاء ويسولفون في المطبخ تاركين ام حنان وبنتها الي كالعاده ما يساعدونهم بالشغل ابداً ودايم مشغولين بنفسهم
قربت حنان من امها: يمه تكفين شوفي حل لعاصف والي معه
تنهدت ام حنان: انتي ورا ماتسكتين خليني افكر
تاففت حنان وجلست بمكانها تشوف امل نازله من فوق ودخلت المطبخ بدون لا تلتفت لهم حتى
ابتسمت نوره يوم شافت امل ونطقت: يا صباح الخير والله ارحبي
بادلتها امل الابتسامه: البقى خالتي ، ايوه وش تسوون تبون اساعدكم؟
هزت ام ماجد راسها: اي والله تعالي قطعي السلطات معد فيني حيل
ضحكت ام عبد الله: مسرع يا بنت الحلال توك بشبابك
اجلست ام ماجد على الكرسي: كبرنا خلاص
ابتسمت امل تسمع سواليفهم وضحكهم وهي تقطع السلطه
{ في بيت خالد }
مسكت الملفات تقلبها بين يدينها بعد ما اخذتها من مكتب ابوها وفتشت تدور عن اي شيء يدل انها موب بنتهم ، ابتسمت تشوف تاريخ ميلادها والمستشفى الي ولدت فيها وسجلت كل المعلومات ، جمعت الملفات ووقفت بترجعها بس التفتت للورقه الي طاحت ، عقدت حاجبها ونزلت تاخذها ، تفاجئت انها صوره لشخصين واحد منهم كان ابوها خالد والثاني ما تعرفه ، قلبت الصوره وشافت وراها رقم وتاريخ التقاط الصوره كان قبل ولادتها بسنه
حطت الصوره بجيبها ورجعت لمكتب خالد ترجع الاوراق قبل يرجع من صلاة الجمعه
{ سويسرا }
كانو يفطرون على احد الطاولات بالقرب من شلالات سويسرا وناظرت لجوالها تشوف رسايل ندى ، عقدت حاجبها من الصوره الي ارسلتها ندى ونطق غيث بتعجب: عسى ما شر فيه شيء؟
بلعت مي ريقها بتوتر ورفعت الجوال بوجه غيث: هذا مو عمي عبد الرحمن؟
صغر عيونه يحاول يشوف زين واخذ الجوال منها يدقق بالصوره: الا هو
رفع انظاره لمي وكمل: من الي معه بالصوره؟
رفعت مي اكتافها بعدم معرفه: ابو ندى الي على اساس ابوها
تمعن غيث بالصوره وارسلها لجواله يبي يوريها ابوه
تنهدت مي تشرب من كوب قهوتها: وش بتسوي؟
غيث وهو يتصل على ابوه: بسال ابوي اذا يعرفه
اخذت مي جوالها تستمع لمكالمه عبد الرحمن وغيث وبعد ثواني نزل الخط: ابوي يقول كان خويه بس اختفى بعدها ولعد يدري عنه شيء
مي بتعجب: غريبه
حك غيث جبينه بتفكير ونطق: الموضوع كله غريب لكن ببحث ورا السالفه واشوف ، خويتك هذي خل ترسل ملف الولاده حقها وكل معلوماتها ببحث بموضوعها
هزت مي راسها بالايجاب: ان شاء الله
كملو فطورهم بتفكير وهواجيس عن سالفه ندى وعبد الرحمن وخالد الي اشغلتهم
{ العصر ، قصر راشد }
بسطو فرشهم في الحوش وطلعت امل القهوة ورجعت تجيب باقي الاغراض ، التفت راشد يشوف حنان وامها جالسين ونطق بتهكم يأشر على حنان: انتي ورا ماتقومين تعاونين بنت عمك
كشرت حنان بملامحها ونطقت: مالي خلق جدي
التفت مسفر لها: قومي عاونيها
خزته ام حنان بنظرات تهديد وصد عنها ، وقفت حنان تدخل المطبخ مع امل وشافتها تصب الشاهي في الدفايه وابتسمت بخبث ، قربت منها تدف معصمها وانكب نص الشاهي على كف امل الي صرخت بالم ونزلت الابريق ونطقت حنان تتصنع الخوف: بسم الله عليك فيك شيء!
دفت امل يدها ونطقت: يا مريضه!!
التفتت على عاصف الي جاء ركض ونطق بقلق: شفيك؟
انتبه ليدينها الي ماسكتها ومشى بخطوات سريعه يمسك يدها: من سوا فيك كذا؟
طلعت حنان بغضب يوم شافت اهتمامه وخوفه عليها ونطقت امل: محد بالغلط كبيته
سحبها وراه للمجلى يغسل يدها بماء بارد ونطق: انتبهي بعدين لنفسك !
هزت راسها بالايجاب وهي تشوف ملامح الخوف تكتسي وجهه ويمسح على يدها برفق بالماء البارد ، انتبه لنظراتها ونطق: ناظري قدام
ضحكت امل ونطقت: طالع جدام
ابتسم عاصف: يا سخيفه
قرب يدها من فمه ينفخ عليها عشان تبرد ونطق باهتمام: خف الالم؟
هزت راسها: ايه
سحبها وراه: بحط لك مرهم عشان ما تبقى علامها
وقف قدام درج الصيدليه الي ببيتهم وطلع مرهم للحروق وقعد يحط على يدها منه وبعد ما خلص رفع يدها يقبلها: انتهينا
ابتسمت برضى ونطقت: صاير جنتل
ضحك عاصف يناظر فيها: عن الغلط من يومي رجال لا تقعدين تهذرين فوق راسي
ضربت كتفه بيدها الثانيه: يا سخيف فهمت معناها غلط
مشت باتجاه المطبخ تاخذ الدفايه ومشى وراها يساعدها
،
مر الوقت وقعدو يتقهوون كلهم الحريم على جهه والرجال بجهه ثانيه ويسولفون كلهم مع بعض ، تنهد راشد بضيق: يا نوم عيني يا غيث والله له وحشه
ضحك ماجد: يووه لو كان هنا كان الحين يتحداني انا وعبد الله والي يفوز فينا يكافئه
عاصف وهو يرتشف من فنجاله: وش لعب الوراعين هذا
خزه ماجد بنظراته: اقول عن الغلط الورع انت
عقد عاصف حاجبه ينزل فنجاله قدامه: من الورع؟؟
ماجد بتحدي: انتتت
فز عاصف ينزل عقاله وفز ماجد يركض وهو وراه وما يسمعون الا تضاحيك اهلهم وراهم
راشد بضحكه: هذول يكبرون ويكبر هبالهم معهم!
ابو عبد الله: خلهم يبه
عبد الرحمن بابتسامه: الله يصلحهم
ردو كلهم بصوت واحد: امين
{ الليل ، القسم }
دخل عاصف لمكتب رعد بعد ماتصل عليه وطلبه: السلام عليكم
رفع رعد انظاره: وعليكم السلام
اشر على الكرسي: حياك يا عاصف
جلس عاصف ينتظر رعد يتكلم وسرد عليه كل كلام غيث الي يخص ندى ويبيهم يساعدونه ويدورون على اهلها
تنهد عاصف بملل وارتكى بظهره على الكرسي: بسيطه خلوها عندي هذي
رعد: لا ماهيب بسيطه يا عاصف وين بتدور على اهلها
اعتدل عاصف بجلسته: اروح للمستشفى وهناك نشوف الملفات
رفع رعد حاجبه: وان كانت مزوره ولا فيه لعبه ورا هالسالفه
ابتسم عاصف: ان كان فيه لعبه اكشفها تراني ماني بهين لا تستخف فيني
بادله رعد الابتسامه: كلي ثقه فيك وانا اخوك
تنهد عاصف: عطني لين بكره الليل ، يوم واحد بس واجيب لك كل شيء عنها
{ قصر آل راشد }
ابتسمت ام حنان تقفل الخط وتحس نفسها راضيه عن الي سوته ، التفتت على دخول حنان لغرفتها وفتحت حضنها تناديها: تعالي يامي تعالي
ابتسمت حنان تحضن امها: وراه مروقه
ضحكت ام حنان: لاني يا طويله العمر بجيب لك عاصف غصباً عنه واهدم لك بيت ذا السوسه امل
شهقت حنان بسعاده ووخرت تناظر في ملامح امها الجديه: صدق؟؟
هزت راسها بالايجاب: اي صدق
ابتسمت حنان براحه وجلست جنب امها تقولها كل السالفه وخطتها الي خططت لها من زمان عشان تخرب بين امل وعاصف وترجع عاصف لحنان وتقدر ترضي بنتها الي كسرو قلبها بزواج عاصف من امل والي كانت تحبه من زمان
-
