- الصباح في الشركه -
كانت توقع الاوراق ومنشغله فيهم ، طق الباب ودخلت ندى وبيدها كوبين قهوة
مي بابتسامه: اهلاً
بادلتها ندى الابتسامه: صباح الخير
مي: صباح النور
ندى: قلت اقهويك اليوم وارد لك جميل امس
اخذ مي القهوه من يدها
مي: والله كنت بحاجتها جيتي بوقتك
ندى: يلا اتركك الحين تكملين شغلك وبخلص شغلي حتنى
قبل تطلع انتبهت مي ليدها المحروقه ، واضح ان الحرق جديد امس ما كان بيدها شيء ، نغزها قلبها من تذكرت مكالمتها مع ابوها امس ، معقوله سوا لها شيء؟ حاولت تبعد ذي الافكار عندها لان مو معقوله اب يسوي كذا ببنته يمكن هي حرقتها بالغلط
- في قصر راشد -
دخلت بدور الصاله شافت ام حنان وبنتها جالسين جنب بعض ويسولفون ومقابل لهم ساره تناظر بجوالها ، جلست جنب ساره
ساره بابتسامه: صباح الخير
بدور: صباح النور
عدلت بدور جلستها وقربت من ساره تهمس: من متى وهم هنا؟
ساره بنفس الهمس: تو نزلو
قاطعهم دخول ماجد للصاله : السلام عليكم
ردو كلهم السلام واشرت له بدور يجلس جنبها
ماجد: امريني
بدور: فاضي اليوم؟
ماجد: اي فاضي بغيتي شيء؟
بدور: باقي يومين على العرس شرايك توديني انا وساره السوق ناخذ لنا اغراض
ماجد: ابشري ما طلبتي شيء بطلع فوق ابدل لبسي واجي القاكم بالسياره
بدور: ابشر بس لا تطول علينا
ماجد بضحكه: ياخوفي انا الي انتظركم مو العكس
بدور: يلا بس
راح ماجد لغرفته وقامت بدور تجيب عبايتها
بدور: خليك عند الباب لين اجيك مابطول
ساره: اوك
بعد خمس دقايق نزل ماجد وشاف ساره وقافه عند الباب تنتظر
ماجد: وينها عمتي؟
ساره: قالت بتلبس عبايتها وتجي وللحين ماجت
ماجد: اني داري انا الي بنتظر ، امشي نركب لين تجي
اتجهو للسياره وركبوا ينتظرون بدور ، خطرت على بال ماجد فكره عشان يقهر بدور ، ابتسم ماجد وناظر في ساره من المرايه الي قدام
ماجد: وش رايك نمقلب خالتك!
ساره: شلون؟
ماجد: بنروح نجيب قهوة ونخليها بالبيت لين نرجع عشان بعدين تعرف كيف تتاخر
ضحكت ساره: طيب
حرك سيارته متجه لاقرب كوفي بالحي حقهم ، وبعد دقايق دقت عليه بدور ورد: هلا ياعيوني انتي
بدور: وين رحت انا عند الباب انتظرك وسيارتك مب فيه ووين ساره؟
ماجد: ااا شكلنا نسيناك
بدور عقدت حاجبها: نعم! تنساني وتاخذ ساره! رجع البنت وخذوني
حاول يمسك ضحكته: ماراح نرجع خلاص رحنا
بدور: طيب يا ماجد انا اوريك
ماجد: امزح عليك هذانا ماخذين قهوة وجايين
سكر الجوال وهو ميت ضحك وساره ورا تضحك ، مد عليها قهوتها وخذتها ، بعد دقيقتين وصل للقصر وشاف بدور واقفه برا ومعها غيث ، حك جبينه بورطه الحين وش يفكه منه
ماجد: والله ورحنا فيها
ساره: بسم الله شفيه
ماجد: عمتك جايبه غيث معها
ساره بضحكه: الله يعينك
ماجد: اقول كلنا بالمصيبه سوا خلي عنك
ساره: انا شدخلني !
وقف السياره وتقدم غيث للشباك الي بجهة ماجد وطقه عليه
ركبت بدور وهي تضحك على الي بيصير الحين
ماجد: هلا والله بولد العم
ضربه غيث مع راسه : تعمعمت عيونك قول امين
ماجد: شدعوه وش سويت
غيث: انت تدري ان وصلتنا شكوى بالقسم انك خاطف بنت عمتك
ماجد بخوف: اسالك بالله؟
لف على بدور الي ميته ضحكه: عمتي ترا ماتسوى وش الي شكوى
لفت بدور على ساره الي كانت تضحك هي الثانيه: ساره صح هو خطفك؟؟
ساره وهي تتصنع البرائه: اييي صح
وسع ماجد عيونه بصدمه ولف عليها وراه: هيه متى خطفتك جيتي معي برضاك!!
رجع غيث ضربه مع راسه ضربه اقوى من الاولى
ماجد: اح خيررر
غيث: وانت تتكلم تناظر قدام لا تناظر ورا البنت مب محرم لك تفر فيها وين ماتبي وتناظر لها كذا استح على وجهك
ماجد: شدعوه ترا رحنا نجيب قهوه بس وشكلهم الثنتين غدرو فيني
حاول غيث يخفي ضحكته وناظر لبدور: ها عمتي تبين تسحبين الشكوى؟
بدور: اممم خلاص بسحبها عشانه ندمان
ماجد: ومين قال ندمان لو رجع الوقت مقلبتك مره ثانيه
فتح غيث باب السياره: اجل يلا انزل معي للقسم
ماجد: خلاص خلاص والله امزح
غيث: يلا اعتذر من عمتك وبنت عمتك
ماجد بقهر: اسف وصدقوني اخر مره اخذكم معي
ضحك غيث وسكر الباب عليهم: يلا بحفظ الرحمن
دخل غيث للقصر واتجه ماجد والبنات للسوق
