وصلت الخيمه ووقفت تلقط انفاسها قبل تدخل ، حطت يدها على قلبها : خلاص يا خبل اهجد
قاطع حديثها مع نفسها صوت امها : من تكلمين انتي؟
فزت وناظرت لامها : لا بس كنت اكلم نفسي ، بغيتي شيء يمه؟
ام عبد الله: ابيك تساعديني تعالي
مي: ابشري
دخلو الخيمه وجهزو السفره لان قرب يخلص الغداء
دخل راشد عليهم وقال بصوته الجهور: ها عساكم انبسطتو؟
كلهم ردو بصوت واحد : اييي
قامت امل تبوس راسه وتقوله : والله يا جدي كنا محتاجين هالطلعه مره مره انبسطنا
حاوط يده حول كتفها وابتسم لها : ان شاء الله ماهيب اخر مره !اهم شيء تنبسطون وتغيرون جو بمحلكم ، والحين بيجيبون الغداء تغدو وعينوا من الله خير وان خلصتو تعالو للخيمه عندنا خل نسولف كلنا
بدور : ابشر يابوي
بعد مادخل ماجد وعبد الله الغداء عند الحريم تغدو ولما خلصو قامو يرتبون خيمتهم قبل يطلعون للخيمه الثانيه
ام ماجد: البسو نقاباتكم قبل نطلع يا بنات
كانت تقصد مي وامل بكلامها وهزوا راسهم بالموافقه ، طلعت ام عبد الله وام ماجد وحصلوهم باسطين الفرش قدام الخيمه ، كان الجو يجنن ، التربه تحتهم ممطوره وريحة الطين ياخذك لعالم ثاني من جماله ، بعد دقيقه جو مي وامل وجلسو جنب بعض بجهة امهاتهم
راشد : قوم يا ماجد وانا جدك سو الشاهي خل نهضم
كان بيقوم ماجد بس وقفه عاصف الي اشر له بمعنى اجلس
ماجد: وش؟
عاصف: ارتاح يا ولد العم بسوي انا الشاهي
جلس ماجد وقام عاصف يشب النار بنص جلستهم وركب الشاهي ولف على جده يساله: نعناع ولا حبق ولا ساده؟
راشد : لا تسالني اسال ضيوفك
كان الجد يقصد الحريم الي جالسين ، فهم قصده عاصف ولف عليهم وقال : وش تشربون يا نسوان؟
ام عبد الله وام ماجد ومي وبدور قالو يبون بنعناع ، وجه انظاره لامل ينتظرها تقول وش تبي بس كانت ساكته ولا عطته وجه ، انتبه لسكوتها جدها وسالها بنفسه : امل يبه
لفت امل على جدها : امر جدي؟
راشد : ولد عمك يسالك وش تبين شاهي
تنهدت امل واعتذرت من جدها : اسفه جدي مانتبهت له بس اشربه عادي
وجه راشد انظاره لـ عاصف الي كان يناظر لجهتها بغيض وقاله : سمعت وش تبي بنت عمك
هز عاصف براسه وكمل يركب ابريق ثاني وقال لجده: ابشر
انتبه غيث على نظرات عاصف الغاضبه وباين انه متنرفز بس وش الي يحده يتنرفز هالقد من بنت عمه ، يعرف اخوه زين موب من النوع الحقود او الي يعصب بدون سبب ، بالجهه الثانيه مي كانت شاكه ان فيه شيء بينهم من يوم رجعو من البقاله ومحد فيهم طايق الثاني ، همست مي بصوت خافت لامل وقالت : شوفي هالمره بتقولين لي وش الي صاير بينكم وليه انتي مب طايقته هالكثر
امل بنفس الهمس : شرايك نقوم نتمشى واقولك ؟ مقدر اخذ راحتي قدامهم ، هز مي براسها وقامت هي وامل
سلطان ناظر فيهم وعقد حاجبه : وين يبه وين رايحين؟
توترو البنات من نظراتهم لهم وبادرت مي : بنتمشى دقايق ونرجع
سلطان: والشاهي يبه ثواني ويخلص
امل : معليه عمي ما بنطول خمس دقايق وجايين
هز راسه سلطان وقبل يروحون قال غيث بصوته الجهوري : انتبهو لا تروحون بعيد فيه حيوانات بالبر
ضحكت مي بسخريه وقالت : ما ينخاف علينا
ابتسم غيث لردها ولما انتبه لنظرات جده له طلع جواله وسوا نفسه مشغول فيه ، بس ابتسامته للحين ما فارقت وجهه ، تنهد راشد وهو منتبه ان غيث يصرفه بالجوال
