وقف سيارته عند المطار ولفت عليه مي مصدومه: وش نسوي هنا؟
ابتسم غيث: مسافرين يا طويلة العمر
شهقت مي بصدمه: كذاب!
غيث: والله العظيم
لفت مي على المطار ورجعت تناظر فيه: طيب وين؟
غيث: سويسرا بما انك تحبين الاجواء الريفيه ف هي افضل مكان
وسعت عيونها بصدمه وحضنته بسعاده: يا الله وربي ما تفشل بانك تسعدني دايم
غيث: اذا ما اسعدتك اسعد مين بالله!
نزلو من السياره واخذ غيث الشنطه الي جهزها بنفسه واتجهو للداخل ، وانطلقت رحلتهم الى سويسرا بعد نصف ساعه
{ قصر راشد }
دخلو عاصف وامل وكانو يتهامسون ويسولفون وما انتبهو للموجودين لين ناداهم الجد راشد: تعالو يا عيال
التفتو الاثنين وشافو نوره وام ماجد وام عبدالله وراشد وام حنان وبنتها ، تنهد عاصف يوم شاف وجود ام حنان وتقدم هو وامل يسلمون عليهم
راشد: عمتك ام حنان تبي تعتذر منكم على الي حصل وننهي الموضوع هنا ما نبي مشاكل زياده
التفت عاصف لجده: مو لازم تعتذر مافي شيء بيتغير من الاعتذار
راشد: انا ما ودي اموت وبين اهلي مشاكل حلوها الحين وخلها تعتذر منك
عاصف: بس جدي!
التفت راشد على ام حنان يشجعها تقول الي عندها ، تنهدت ام حنان ونطقت: اسفه منكم الاثنين على الكلام الي قلته قبل
هزت امل راسها بتفهم ورغم انها للحين شايله بخاطرها الا انها سكتت عشان جدها بس وعشان ما تثير المشاكل وتكبر
امل: الحين نستاذن
راشد: الله معكم يابنتي
طلعت امل وعاصف لجناحهم وبطريقهم التفت عاصف لامل: اوقح من ذا الادميه ما شفت
امل: عاد اهم شيء اعتذرت غصب عنها
عاصف: والتبن حتى لو اعتذرت ما يهم
ضحكت امل: الوه تراك معصب اهدا
تنهد عاصف: سمي الشكوى على الله
- بالصاله -
لفت حنان على امها وهمست: يمه شفتي كيف يعاملها ويخاف عليها؟
ام حنان: ماكون خلود لو ماخربت بينهم وجبته لك من اقصاه اصبري علي بس
حنان: وش ناويه عليه؟
ابتسمت ام حنان بخبث: انا اعلمك بعدين لا تستعجلين على رزقك
قاطعهم دخول لطيفه وبنتها ساره ، دخلو يسلمون على الموجودين وراشد يرحب ويهلي فيهم
راشد: ما شاء الله جيتو
لطيفه: اي يابوي بس عاد العصر بنمشي ماراح نطول
راشد: افا وليه؟
لطيفه: ابو ساره يقول انه بيروح مشوار بعيد ولا وده يخلينا هنا لين يامن علينا بالبيت
هز راشد راسه بتفهم: ايي الله يستر عليه اجل
ساره: فيه احد من البنات هنا؟
ام حنان: بنتي موجوده
ناظرت ساره فيها باشمئزاز وعقدت ام حنان حاجبها: عسى ماشر لايكون موب عاجبينك!
تنهدت ساره تستغفر ربها ونطق راشد: ام حنان!
ام حنان: خلاص يبه بسكت
ام ماجد: امل موجوده بس فوق بجناحها وعاصف عندها
ابتسمت ساره: اوك اجل بنتظرها تنزل
بعد دقايق نزلت امل ووراها عاصف الي كان لابس بدلة شغله
راشد: دقيقه يا عاصف بروح معك ابيك تنزلني في الشركه
عاصف: ابشر جدي حياك
طلعو عاصف وراشد وجلست امل عند ساره ولطيفه سلمت عليهم وقعدو يسولفون متجاهلين وجود ام حنان وبنتها الي رجعو للبيت بعد ما طلب مسفر ابوه واعتذر منه
