• #الــخـيـط_الــرفـيـع
•13•
🔏𝘚𝘢𝘧𝘪𝘺𝘢 𝘕𝘢𝘨𝘢𝘵 "𝓘𝓻𝓲𝓼"
عضات على شفتها، بلعات ريقها، تبسمات جنب بسخرية ونطقات ببرود حيت سكاتها ما عندو ما ينفعها دابا ...
هيزل : حقيقتي ؟ بغيتي تقصدي فاش صبرت عليك وزطمت على راسي شحال من مرة على قبل راحتك !
علات نايا حجبانها وردات عليها :
- لا، داكشي لي باغاهم يثيقو، هاد الحياة، هاد الحقيقة لي كاتهضري عليها كانت مسرحية، انت البطلة والمخرجة وانا الشريرة الرئيسية ديالك، باش كلشي يشوف هيزل الحنينة الظريفة لي ما كاتحركش الدجاجة من على بيضها كيفاش قادرة تتعايش مع نايا حطب جهنم !
هزهزات راسها ببرود وقالت : - دابا لين غادي نوصلو بهادشي، ما بنتيش لي باغا تصلحي الوضع ... وبالصح ما عندو ما يتصلح، شنو باغا مزال !
نايا : جو !
تسارعو دقات قلبها وركابيها بالسيف باش هازينها، علات كتافها وردات عليها ببرود :
- ما غاديش تلقايه هنا، تقدري تمشي لعندو، لدارو، بيناتكم !
نايا : ما غاديش نخليك تاخديه !
هيزل : (بلعات ريقها وقالت بتأكيد) بيناتكم !
عضات نايا على شفتها بعصبية منرفزها برودها، ردات شعرها من على وجهها وقالت وهي مزيرة على مخارج الحروف :
- عارفاك غير ضد فيا باغا تكملي فهادشي ... انت عندك حدود وحنا تخطيناهم واذن علاش باقا معاه، خلي ليا جو، من ديما كانت عندك الحاجة الزوينة، هاد المرة ما فيها والو الى خليتيني انا ناخدها، ما غاديش تاخدي مدة طويلة باش تلقاي ما احسن !
دورات هيزل لسانها وسط فمها ونطقات بعصبية مكتومة :
- من ديما كنت معتابراك ختي ولكن ورا ما عطاتك خاطرك تدخليني فلعبة حامضة غادي نخرج منها خاسرة، عطيت لراسي كف وفقت من عالمي الوردي، ما بقيتي كاتعني لي حتى حاجة ! ما كانبغيكش وما كانكرهش، ما تستاهليش نكن ليك شي شعور ولا نخسر طاقتي على قبلك، واذن بلا ما تعطي لراسك الشرف تكوني بهاد الاهمية فحياتي ! ولا تتوهمي بلي دايرة شي حاجة غير ضد فيك، حيت ثيقي بيا ما مهولاش للريح لي جابك من بعد اش درتي فيا !
تبسمات فوجهها وعينيها كايلمعو ما باغاش ترمش باش ما ينزلوش دموعها قدامها :
- الى كنت كاندير شي حاجة دابا انا كانديرها لراسي، الى كنت باقا معاه حيت انا بغيت وماشي حيت ضد فيك، نهار بغيتو بغيتو لراسي ماشي حيت انت كنتي كاتبغيه، يمكن هادشي لي كاتهضري عليه دابا انت كنتي كاتديريه ما نعرف ..
بعداتها على باب دارها وقالت ببرود محاولة تتمالك راسها ما تنهارش :
- سيري بحالك بلا صداع بلا شوهة والا غادي نعيط للبوليس ونخلي لي يسوا ولي ما يسواش يتشفى فيك
سدات الباب فوجهها مخلياها غير كاتدور فعينيها، بينما هيزل تكات عليها وحطات يديها على قلبها كاتشهق ... قلبها كايتقطع حيت كملو الامور بهاد الطريقة، رهانهم وكونها ما حطاتش لمشاعرها اهتمام هو النقطة لي خلات الكاس يفيض، ما عمرها كانت غادي تطلق من يديها لو انو بقات نايا لي عرفات قبل من حفلة توديع العزوبية ولكن لا !
ضربات نايا رجليها مع الباب وقالت بعصبية :
- عرفتي الاكس ديالك لي بان فحياتك ورا الخطبة انا لي جبتو، عرفتي الكسوة ديال عرسك لي شريتي فالاول انا لي حرقتها، عرفتي الرجال لي جبت نهار الحفلة كانو غير باش نصورك ونوري حقيقتك لجو ! من نهار عرفتيه وانا كاندير فالفعايل باش تخلاي عليه ... ما غاديش نستسلم دابا !
🎞️#عودة🎞️
#𝑇𝑜_𝑏𝑒_𝑐𝑜𝑛𝑡𝑖𝑛𝑢𝑒𝑑
اراؤكن
أنت تقرأ
الخيط الرفيع
Short Story- مــمــنــوع الــنــشــر 🚫🔏 - © 𝐄 𝐗 𝐂 𝐋 𝐔 𝐒 𝐈 𝐕 𝐄 © - © حـــــــــصــــــريـــــاً © بــقــلـم : "𝘚𝘢𝘧𝘪𝘺𝘢 𝘕𝘢𝘨𝘢𝘵 "𝓘𝓻𝓲𝓼 * عن من قصة حقيقية . ...
