خدات نفس وبزاف ديال السيوفة كاتحسهم كايتغرسو فقلبها بلا رحمة ... بلعات ريقها وكملات اسئلتها واخا ما بقاش عندها فين تزيد باغا تعرف كلشي بالتفصيل ...
هيزل : ايمتا قطعتي الهضرة معاها وسديتي عليها فخطرة ؟ جوزيف : يمكن قبل ما نوليو بجوج بشهر ولا اكثر بشوية، ما عاقلش حيت ما بقاتش كاتهمني ... وقطعت خيوط الاتصال حيت كان قلبي كايدق بسميتك، وحتى هي ساعتها تقبلات الوضع عادي ! وما ذكرناش المخاطرة فمرة ...
تأففات بصوت مسموع وعلات يديها كاتمسح الدموع من على خدها، عيات تبرد وتقاوم انهيارها ولكم ما قداتش، كلامه مخليها تآمن بلي بالصح كايبغيها، ولكن فعلته لا ... وهادشي مخليها تبقى بين نارين، فوق خيط رفيع (رقيق) ما عارفة اشمن عافية اهون بالنسبة ليها، تكمل بحال الى ما واقع والو ! ولا تحبس فنص الطريق وتسمح فحب حياتها .
هيزل : ومنين هي تقبلات الموضوع وسديتوه، علاش دابا ؟ جوزيف : ورا خطبتنا بدات كاتهضر على الرهان لي انا تخطيتو لدرجة نسيت واش شي حاجة حامضة بحال هذه كانت بيناتنا ... قالت لي باش نصارحوك وانا ما بغيتش ... هيزل : وعلاش ؟ جوزيف : حيت (بلع ريقه) انا وياك كنا درنا اتفاق اي حاجة وقعات قبل ما نتخطبو ما عندها حتى معنى .. الخطوة لي درنا اسمى !
سكتتات لوهلة كاتفكر اتفاقهم، بالصح كاينة حاجة بحال هذه ولكن كان ممكن يجي لعندها وتعرف من عندو حسن ما توقع هاد الدارما كاملة وتنغص عليها فرحتها .
هيزل : عارفها كاتبغيك ؟
حرك راسو شمال ويمين وقال : - لا، الحاجة الوحيدة لي عارف هو انا كانبغيك، وانت كاتبغيني .
سكتات مطولا وبدون سابق انذار ديمارات الطموبيل، وزادت فصمت تام، وقفات عند دارهم وشافت فيه بنص عين ...
هيزل : غادي نبقى هاد الايام فدار ماما ! بغيت نجلس بوحدي جوزيف : وحنا ؟ هيزل : ما عرفتش، مشتتة ما عارفة راسي شنو ندير ! جوزيف : متفهم الصدمة لي تلقيتي، والدقة صعيبة حيت خديتيها من عندنا، ولكن كانحلف ليك انت لي كاينة فعيني، فعقلي، فقلبي ... من نهار وليتي my special person ما عمري فكرت حتى الفكرة انو نخونك ولا نلعب ورا ظهرك ...
شد فيديها وقال بترجي : - الى بغيتي نلغيو العرس، نحبسو هادشي ولكن فكري فينا "حنا" انا وانت..
[ - يــوم الـزفــاف (قــبـل ســاعــات) ]
واقفة قدام المراية بعدها لبسات كسوتها ... دايرين بيها وصيفاتها وكلشي كايتساءل على نالا فينها مالها باقي ما جاتش...
هيزل : هي ما غاديش تجي ! ماتيلدا : (بفرح) وايلي ! كاتضحكي ..
نفات ببرود وقالت : لا معاك بالصح، (تنهدات) اساسا ما كاين لاش هاد العرس ما غاديش يكمل !
تلاشات ابتسامتهم وركزو الشوفة فيها ما فاهمينش علاش كاتهضر ..
كيم : اش كاتقولي ؟ هيزل : ما غاديش نتزوج ... كيم : هيزل حبيبتي فاهمة بلي الخلعة والتوتر لاعبين على راسك ولكن هيزل : (قاطعاتها) واعية مزيان لشنو كانقول... امبر : اش واقع ؟ هيزل : من بعد ونقول ليكم .. غير ما بغيتش نخليكم مصدومين من شنو غادي يوقع ! بثني : هيزل !
