• #الــخـيـط_الــرفـيع
•14•
🔏𝘚𝘢𝘧𝘪𝘺𝘢 𝘕𝘢𝘨𝘢𝘵 "𝓘𝓻𝓲𝓼"
وسالات ليلة كانت عامرة اعترافات وكلام خارج من القلب، و واخا هادشي كامل حسات براسها حاسة عندها الزهر حيت ما واجهاتش كلشي بوحدها ... ما عرفتتش تختار نايا ولكن كليكتها غير...
غفات بفعل العيا فبلاصتها الشي لي خلاهم يغطيوها وينعسو حداها حتى هوما !
بينما جوزيف فالناحية لاخرى، النعاس طار من عينيه، كايخمم فيها وفحالتها كيفاش غادي تكون، فعلتها ولو ضراته فقلبه، عارفها ضرات قلبها كثر ما هو مضرور بفعلته .
واخا كان مستبعد دير اش دارت نهار العرس بنسبة كبيرة كان كايقول مع راسه : - لو اني كانعرف هيزل غير شوية ما غاديش تكمل هاد الزواج !
وكان مستنيها تصدمه، تكون مراته وساعتها يصلح لي تهرس، ولكن ما كتابش ...
سرح بذكرياته للمرة الوحيدة لي فكر باش يصارحها بالموضوع وتراجع فاخر لحظة ...
🎞️#𝚏𝚕𝚊𝚜𝚑_𝚋𝚊𝚌𝚔🎞️
⚫🎥⚪
وسط بيت نعاسهم، فدارهم، كانت جالسة فالركن لي مخصصاه للخدمة كاتقاد شي تخربيق حتى دخل لعندها فيديه بلاطو .... حط ليها الغذا فوق البيرو وتحنى باس نيفها ...
جوزيف : حبسي كولي وكملي !
هيزل : هاح عليك !
شدات خدوده بين يديها حيت كان باقي حاني لمستواها وقبلات شفايفه ... هي بعدات عليه وهو يشدها من خدودها بنفس طريقتها ورد ليه قبلتها !
جوزيف : كانبغيك كثر من اي حاجة فهاد الدنيا !
تبسمات هيزل بحب وردات عليه وهي كاتعلي فكمامها باش تبدا الماكلة: - عارفة !
دارت لعنده بالخف وكاملات : - لهلا يخطيك عليها !
خطف قبلة اخرى من شفايفها وكمل كلامه وعينيه كايبريو فرحان بتواجدها حداه.
جوزيف : وغادي تلقايني ديما معاك، بجنبك !
هزهزات راسها وقاطعاتو متصنعة الغرور : - عارفة !
نطق مكمل وهو كايبوس كتفها العاري لي نازل التريكو من عليه :
- ولا فوقك او تحتك !
توردو خدودها وخرجات فيه عينيها : - اهيا تحمستي !
جوزيف : انت لي هملتيني !
تنهدات وشافت فيه وهي منزلة شفتها السفلية :
- وعد غادي نسالي الماكلة، نكمل الخدمة حد السبعة والليل كولو ديالنا !
جوزيف : تمام !
تبسمات ثاني ودارت للطبسيل كاتاكل وفنفس الوقت كاتهضر بمزاح :
- كان غادي يكون احسن لو ارتبطتي بوحدة فنفس الضومين ديالك، تخدمو بجوج وتقيلو فالدار بجوج !
شافت فيه كان معلي حجبانه ومركز الشوفة فيها بينما هي كملات كلامها وهي كاتمضغ :
- نايا كانت تكون اختيار جيد !
تسارعو دقات قلبه وقال بتردد : - وعلاش ؟
قالها وهو عند باله فراسها شي حاجة وكاتلمح ليه باش تسمعها من عندو ..
هيزل : حيت كانعرفها وكنتي غادي تكون ونعم الرجل بالنسبة ليها، غادي تغرقها حب وحنان كيما كاتدير معاي وتخليها تبغي الحياة اكثر واكثر، وديك الساعة غادي نقول (بدلات نبرته متصنعة الغضب) سعداتها، تفو على زهر علاش ما تلاقيتش بيه قبل منها، غادي نبغيه انا اكثر !
قهقهات وقالت : ما تديش عليا الجوع والعيا خلاوني ندخل ونخرج فالهضرة، الحمدلله لي ما بغاتكش وما كان بيناتكم والو ...
ياله بغا جوزيف ينطق يشرح ليها شنو وقع كملات هيزل كلامها :
- ساعتها ما كنتش غادي نقدر حتى نشوف فيك! حيت شي حد كان مع صاحبتي غادي نبقى ديما نشوفو مع صاحبتي ما نقدرش نشوفني بلاصتها !
🎞️#عودة🎞️
عض على شفته بحسرة وتنهد :
- ولكن انا بغيتك انت !
#𝑇𝑜_𝑏𝑒_𝑐𝑜𝑛𝑡𝑖𝑛𝑢𝑒𝑑
اراؤكن
أنت تقرأ
الخيط الرفيع
Short Story- مــمــنــوع الــنــشــر 🚫🔏 - © 𝐄 𝐗 𝐂 𝐋 𝐔 𝐒 𝐈 𝐕 𝐄 © - © حـــــــــصــــــريـــــاً © بــقــلـم : "𝘚𝘢𝘧𝘪𝘺𝘢 𝘕𝘢𝘨𝘢𝘵 "𝓘𝓻𝓲𝓼 * عن من قصة حقيقية . ...
