غير هي تسدات باب البيت تأففات بثني بصوت مسموع وتزدحات فوق الكنابي ما عاحبهاش الوضع فمرة، تغاضاو على شحال من عملة ولكن زادت فيه ...
ماتيلدا : الهوس ديالها باش تكون هي محط الانظار غادي يكلف هيزل فرحتها !
تلفتات ناحيتها بثني ونطقات : - وما يمكنش شحال ديال المرض، باز ليها صابرة ليها ومسايراها 11 لعام كلها !
نطقات امبر كاتعبر على رأيها : - انا بعدا من ورا شنو دارت نهار مشينا نختارو كساوينا صافي غسلت عليها يدي ... لهاد الدرجة باغا تكوني محط الانظار والعرس كولو كايدور عليك واخا ماشي ديالك، لدرجة تقرري تلبسي كسوة حمرة والناس تقول هذه نعسات مع العريس ! (بقرف) ايو !
تدخلات كيمبرلي حتى هي عاطية وجهة نظرها : - بنات تهدنو، حنا باقي فينا الحال على هيزل، حيت حنا صحاباتها هي وماشي صحابات نايا، ما قدرينش نعذروها حيت علاقتنا بيها سطحية على عكسها هي ... داكشي علاش كانشوفوها واخدة بخاطرها وداياها على قد عقلها ! حاولو ما تقولو والو قدامها باش ما تزيدوش على ما بيها عفاكم!
ماتيلدا : وبزاف !
تنهدات بثني وقالت : - كانبغيكم اصحاباتي ولكن الى شي وحدة فيكم مشا سخن عليها راسها ودارت لي هاد الحال فنهاري غادي تكون هاديك اللخرة بيناتنا، ما نقدرش نتغاضى ولا ندير بخاطر واحد اناني وكايفكر غير فراسو وكيفاش يحول الوضع باش تكون الانظار عليه !
أمبر : صراحة كانت حركة متوقعة، اول red flag (اشارة حمرة) كانت اصرارها باش تكون هي MOH (Maid Of Honor: عادة كاتكون هي اقرب وحدة للعروس كثر حتى من وصيفات العروس) واخا ما دارت حتى حاجة من داكشي لي خاصها تديرو ...
سدات الباب من بعد ما تطمنات عليها وخلاتها تنعس، وقفات قدام البنات لي كانو جالسين فالصالة، حيدات التاج والفوال لي كانت دايرة فوق راسها وشافت فيهم وهي مبتسمة ...
أمبر : خير ! مالها ؟
ركزات الشوفة فيها، هزات كتافها ونزلات شفتها السفلية بقلة حيلة بمعنى بحالي بحالكم حتى انا ما عارفة والو ... ناضت كيم لعندها عنقاتها مطبطبة على ظهرها محاولة تبرد عليها حيت يتقلقو حتى يعياو من المشهد لي دارت "نايا" كاتبقى هي اكبر المتضررات ... حفلة توديع عزوبيتها ضاعت بدون سابق انذار، فلحظة كانو محيحين وما راهمش فالعالم ضاحكين ناشطين شاربين، فلحظة ثانية كلشي تقلب !
هيزل : شكرا حيت كنتو معاي اليوم، شكرا حيت جيتو فرحتو معاي، ومن وسط المشاغيل الكثيرة لي عندكم كنت انا الاهم ..
عضات على شفتها بالعة غصتها ودموعها فعينيها : - الحفلة سالات، غادي نعوضكم من بعد، غير بخمسة بينا نديرو شي حاجة مختلفة !
لسانهم فيه بزاف ديال الهضرة ولكن ما قادرين يخرجوه يزيدو على ما بيها، حدهم دارو عليها معنقيها وهي شادة دموعها بالزز ما باغاهمش ينزلو !
