مر الوقت ورجع بارباروس ادراجه بعدما تأكد من مكان سكن اللصة الصغيرة كما لقبها..
فنفس الكوخ وبعد منتصف الليل
دخلو مجموعة من الفتيان تايتسلتو ومراقبين اطرافهم ، من خلال ملابسهم الرثة واجسادهم الهزيلة، الظاهر انهم من العبيد..
فتحو الباب ببطئ ولقاوها مستلقية فوق الكنبة.
ما ان لاحظات وجودهم حتى ناضت بسرعة هازة سكينها وموجهاه ناحيتهم،متأهبة ومستعدة تهجم ...
ابتاسمو لردة فعلها السريعة وردات عليهم بابتسامة شيطانية :"" تعطلتو خليتوني كننتظركم هنا حتى غفيت.. راقبتو ياكما تبعكم شي واحد؟ ""
احد العبيد، لي كان طفل شقي صغير، اشقر وعينان زرقاوتان ماكرتان قال بصوت زعفان :"" تعطلنا بسباب طلبات السي الياس لي ماعندهاش نهاية، وكان خاصنا ننتظرو سيادتو حتى يكمل لقاؤو السري مع الخادمة ونراقبو الباب لا تدخل زوجته للمنزل على غفلة..""
أحدهم ولي كان فمقتبل العمر، الظاهر انه الراشد من بينهم، وصاحب اقوى بنية فيهم، ضرب فكتف الطفل الصغير باش يسكتو، لانه عارف وقع هاد الكلمات على داميا..
فحين هاد الاخيرة، شرارات نارية تشكلو فعينيها، قالت
بغضب مزيرة قبضتها وغارزة ظفارها فراحة يدها، :"" باقي داك العفن تايتحرش بالبنات!! ماتعلمش الدرس لي عطيتو اخير مرة""
بصوت رجولي باح قال الفتى تايحاول يهدن الامور ويبدل الجو لي تكهرب فثواني :"" لالة داميا، لازم نأجلو توزيع البضاعة اليوم ، سمعت من احد اتباع الكابتن انه التجار والقراصنة اتفقو باش يتجولو الليلة فسلا القديم، وناويين يعرفو هوية السارق لي تايوزع بضائعهم ""
الفتى نجح فانه يثير انتباهها وينسيها فالموضوع السابق لي مازال غادي تتكلف به شخصيا..
ابتسامة ساخرة ظهرات على شفاهها وقالت :"" هادو ماهم إلا اشاعات تاينشروهم التجار باش يزرعو الخوف فينا، دوك الشرذمات دالمجتمع المسميين نفسهم بالقراصنة مستحيل يتخلاو على ليالي السكر والخمر والعاهرات باش يقبضو على سارق ماآذاهم بوالو...""
بنبرة آمرة كملات:"" الليلة غانوزعو البضائع كالمعتاد، بدلو ملابسكم ""
✵✵✵✵✵✵✵✵✵✵✵✵✵✵✵
في قصبة الوداية، وراء أسوار القلعة.
كان جالس فعرشه لوحده وكأس الخمر صديقه وونيسه الوحيد فليالي الأرق..
كايرشف منه ومع كل رشفة خمر تايفكر ويخطط للمغارة القادمة ،الانجليز بالرغم من انهم مامحسوبينش اعداؤهم ولكن لازم يوقفوهم عند حدهم، فتحو لهم مجال بسيط واتفقو معاهم ولكن الظاهر انهم سابو وبغاو ماكتر..
ولكن جان جانزون موجود في الخدمة، خصص الليلة للتفكير فخطة وطريقة باش يوقفهم عند حدهم.. وطلب من اتباعه يمشيو يسهرو فمكان اخر..
