رجعت بخطوة للوراء و ناقوس الخطر دق بالنسبة ليها .. ما غتقدرش تقتل شخص بريء و زيادة من نفس جنسها ، بنت !
وجها لي صفار و فمها لي رتاعش مخفاوش عليه ، و شكو تجاه هاذ القرصان الغرييب زااد تفاقم ..
فرقت شفاها كتحاول تخرج الحروف مخنوقة من حلقها : " أ أ أنا ؟"
تمشى جان جانزون حولها كيطالعها بنظرات حادة : " التحقت بينا مؤخرا ، جبدت سكينك على أحد القراصنة و وقفت قدامي كتتحدى فيا .. شكون نتا ؟ "
جسدها تجمد من سؤالو ، ما غتجيش دبا و تطيح كلشي في الماء ! ما تقدرش !
ندمت لي وقفت قدامو أصلا و تدخلت ، حيت الاصرار في كلامو بين ليها بلي البنت غتموت في كل الحالات .. و لكن دبا يمكن تبعها هي ..
حاولت تصلح الموقف ببعض الكلمات الدالة على الطاعة ولي ما قدرت تخرجهم من فمها غير بزز .. و كأنها كتنطق بشي شعوذات قادرين ينهيوها ..
داميا :" أنا خدّام عندك أسيدي "
جان جانزون :" و دبا فاش عرفت قيمتك ، غتنفذ الأمر ولا ؟"
داميا :" غنّفذ ."
هز راسو برضى و أشار ليها على السيف .. هزتو بأيدي مرتعشة و تقابلت مع بيلامي لي تمحاو ملامحها و عينيها غير كيتفحصو في داميا تا حست بلي كشفت هويتها الحقيقية ..
دوّات بنبرة صارمة و غليظة ..
داميا :" وقفي ! "
ٱمتثلت بيلامي للأمر بدون تردد ، وتقابلت معاها تا بانت داميا أقصر منها الشي لي خلا قهقهات القراصنة يتعالاو و تخنزيرة بارباروس تتعقد أكثر .. يلاه غيدوي و يمنع هاذ المهزلة الا أنو لمح ورقة صفراء ملولبة تحت أقدام بيلامي ، تزامنا مع رفع داميا للسيف ..
محسش براسو تا صرخ ..
بارباروس :" وقاااف "
ٱنتفضت داميا من صوتو العالي كباقي القراصنة .. في حين إكتفى جان جانزون بالمشاهدة في صمت تا يشوف صديقو شنو بغا يصنع..
إنحنى بارباروس و هز الورقة كيقرا فيها بملامح متجهمة .. رجع شاف في بيلامي بتحقيق و التوتر باان عليها لي خلا الفضول يترسم على وجه القراصنة..
و بحركة سريعة نطر السيف من إيد داميا و حطو على رقبة بيلامي بعيون غاضبة .. دوى مزير على الحروف ..
بارباروس :" شكون بعثك للمغرب ، و شنو كتديري بهاذ الخريطة !"
تقدم جان جانزون و خذا الخريطة من إيد بارباروس كيقرا فيها مخنزر .. وقف ساكت كيتسنى في الجواب ، في حين دوات هي عينيها على السيف لي في رقبتها خافتو ينحرها في غفلة منها !
بيلامي :" أنا بيلامي ، جيت مع السفينة الإسبانية في رحلة إستكشاف بحيت عارفة المناطق .."
جان جانزون بعدم صبر :" وضحي ! "
بيلامي :" خدمتي ملاحة .. عارفة جميع الطرقات لي ممكن تأدي لجميع المناطق غير من الخريطة "
