مر الوقت والشمس عيات من الانتظار و رغمات الظلام على الرحيل و بدات تبسط أشعتها مقبلة جبين السماء كحال كل صباح..
اليوم كانت السماء صافية، طائر النورس يحلق فالسماء معبر عن سعادته بصفاء الجو..
واشرعة السفينة تطلقات فالفراغ ترفرف وترقص بفعل الرياح، اليوم يوم مناسب للابحار، والكل سعيد بذلك..
القراصنة واخا كانو تايخرجو للابحار ولكن ماشي لمدة طويلة، فقط ليلة او ليلة ونهار..
هاد المرة غادي يخرجو لاسبوع او اكثر..
بداو القرصنة تايجمعو متاعهم ويحملوهم فالسفينة، كل واحد مشغول بالمهمة الموكلة ليه.
دخلو كمية الاكل وصناديق من الخمر لي يحتاجو في الطريق.. انيسهم فالليالي الباردة وسط البحر ...
دخلات بكل ثقة فالنفس وسط منهم كتعاونهم فحمل الصناديق، وغانم فوق كتفها تايعاود اي كلام سمعو من القراصنة..
احد القراصنة رد ليها البال ولجسدها الهزيل مقارنة باجساد القراصنة القوية، قال بصراخ موجه كلامه للقراصنة الاخرين :"" شكون دخل معانا هاد الطفل الصغير؟ ""
بداو القراصنة الآخرين يقهقهو بصوت عالي..
فحين داميا المتنكرة فصفة قرصان مامسوقاش ليهم.. واحلة غي مع جلايلها، حطات يدها على سكينها ربما تحتاجو فهاد الموقف..
القرصان ضحك حتي بانو سنانه العفنة لي جابولها الردة.. قرب ليها وقال:"" ولدي لابغيتي ماتجيبهاش فمؤخرتك، سير فحال سبيلك، تيقني القراصنة فوسط البحر الاسماك وماتايخليوهمش فالتيساع بقى غي طفل صغير طري بحالك.. ""
جبدات سكينها من الغمد الصغير وراسها غاينفجر بالاعصاب.. فحين لاهو لا القراصمة تايضحكو على هاد الطفل الصغير وكلام القرصان الضخم لي كان واقف امامها
شدها من كتفها مزير عليها: "" مزيان مزيان ملي جبدتي معاك هاد السكين... على الاقل الطباخ ديالنا يلقى لي يعاونو فتنقية الخضار..""
بسرعة البرق وفلمحة بصر ضرباتو بالسكين ليدو لي حط على كتفها حتى حسات بالدم الساخن على بشرة وجههاا...
دفعاتو و تنترات من قبضتو القوية وقالت بصوت غليظ مصطنع:"" ماشي شغلك، كل واحد يقوم بمهمتو ويديها فالاشغال ديالو.. الاميرال جان حانزون لي طلبني نجي معاكم وهاد السكين كما نقدر نقطع به الخضار نقدر نطير بيه العضو ديالك""
القرصان شاف فالجرح الصغير لي دارت ليه فيديه، كانت موجدة راسها دخل معاه فمعركة ولكن عكس داكشي لي كانت كتنتظر، انفجر فوجهها ضاحك وتبعوه القراصنة الاخرين..
حتى جا بارباروس من وراها مخنزر فالقرصان لي جمع الضحكة... غي عرفو شكون تصدم وتبهض مكانه، تايسد عينيه ويعاود يحلهم مافاهم والو..
