#شغفها_حُبًا
ح 9 .
نوكوميس"فتاة القمر"
سكرت ساجده الهاتف بقلب مليان أحاسيس ومشاعر جديد ماحستش بيها حتى وهيا مع إلياس ، من بعد مُكالمه طويله من مُراد قدرت تسترجع فيها شيء حلو فقداته، وإستسلمت للنوم.
* ولما تشرق الشمس تعلن عن يوم جديد،يوم مليئ بالأحداث.
كانت ساجده مقعمزه على سُفرة الفطور هيا وعمتها ف كان وجه ساجده مُشرق وضاوي عن غير عادته والابتسامه مش مفارقه وجها .
فاديه تلمست جبهتها: مريضه فيك حراره؟
ساجده بعدم استفهام: لا
فاديه : تضحكي من الصبح وجوك مليح
ساجده: شن مايضحكش وجهي شويه
فاديه: انشاء الله ديما هكي
ساجده تصب في الشاهي: في منوا تكلمي بكري؟
فاديه: مدير الكليه قالي لازم تجي قتله اني عندي ضروف لكن مُصر هلبا
ساجده بحزن: آسفه عميمه الاني عرقلت شغلك
فاديه: ماتقوليش هكي فداك كله ياروحي المهم تنوضي انتٍ وترجعي صحتك
ساجده: اي على سيرة الصحه وهكي أمت حددوا عملية وجهي مش بينقلولي جلد ع اساس مُطابق على جلدي!؟ماقلكش الياس
فاديه: اي قالي غر امس غلبني النوم وماقتلكش اليوم شنوا في تاريخ
صغرت ساجده عيونها وهيا تستعيد في ذاكره: تاريخ اليوم 17 _3
فاديه: عمليتك 28 _3
ساجده: هلبا .
فاديه: تو يفوتوا، مسحت يديها وناضت.
تكلمت فاديه من الغرفه: هي وتي روحك اليوم آخر جلسه في العلاج الطبيعي.
تنهدت ساجده بملل وناضت وهيا تتألم ف مازالت عندها صعوبه في الحركه .
**************************************
بينما كان مُراد ينضف في سلاحه تكلم معتز اللي مقعمز ع الكرسي جنبه.
معتز: ديما نقولك مايعجبش فيا صاحبك هذا انت مش معدل عليا
مراد: مستحيل يديرها الياس
معتز: ياراجل قالك بعضمة لسانه امس إلياس ؛
مراد: مع هذا عندي شك وكان قال مافيش دليل ..
سكت وهوا يتفكر في صور ساجده اللي نبعتوله ؛ فتفكر انه مافيش حد من جيهته يعرف بموضوع ساجده الا هوا .عقد حواجبه وهوا يحاول يربط في الأحداث، مش بعيد يكون إلياس باعت حد يصور ويراقب في الأخبار !!؟
معتز:وين وصلت؟
مراد لبس كبوسه: كلمة تيم قتله اني روحت بيلاقينا قدام المحطه .
معتز: هي نتوكلوا .. ناض معتز من الصاله اللي هيا في حوش مراد بينما وقف مُراد وهوا يشوف لي الصوره اللي معلقه ع الحيط ، شافلها بعمق ونقطة تركيزه كلها كانت ع الحب اللي كان باين حتى في الصوره
*******************************
نورس سكرت الشيت: آيات انتي معاش بترحلي من عندنا ولا شني!؟
آيات: جايه نطمن عليك
نورس: طمنتي عليا عندي امتحان غدوه ونبي نقرا.
آيات: خيره هكي اسلوبك مولي معاي ؟
نورس : آيات الحركات اللي ديري فيها مش كويسه بكل كل شويه جايتينا وحوش فيه رجاله عيب
آيات ضحكت: شوفو من يتكلم العيب نورس اللي عاطيه شرفها لي مش عارفه منو
فنصت نورس عيونها أولاً من صوتها العالي ، ومن الكلام اللي تقول فيه
نورس: شن قصدك؟!
آيات خدت شنطتها وطلعت: ماتلعبيش معاي نورس، ندمرلك حياتك في أقل من ثانيه .
شافتلها للمره الأخيره وطلعت ؛ بينما قعدت نورس مصدومه في الكلام اللي سمعاته آخر شيء توقعاته من آيات انها توصل للحقاره هاذي وتشدها من يدها اللي توجعها. حاولت تفتح شيتاتها وتقرا ولكن كلام آيات اللي قعد يدور في دماغها ما خلهاش تركز أبداً
