#شغفها_حُباً
ح1
نوكوميس "فتاة القمر".
إختلط صوت العياط بصوت الالم والآهات والصراخات العاليه في ساحة الحوش .. الامُ اللي تبكي على فراق ولدها وهوا مزال صغير ، والزوجه اللي محتره بوفاة راجلها وخلالها عُرم بنات من بيهم، والأخت الحزينه على خوها وهيا اللي لما كانت تقول آخ يجي واقف قدامها ويقول خيرك؛ والناس كانت واقفه تتفرج ع الموقف المؤثر ، وهيا سنة الحياة وكلنا على هذا طريق والابشع في الموضوع لما تفقد العيله جزء منها بتبطل إسمها عيله؛ وخصوصي لما يموت كبيرها تماما زي توا .. وبين هذا الموقف المريع اللي جسدنا كيف إنه الحياه فانيه وإنه مافيش حاجه تستاهل ندمرو على خاطرها .
_كانوا الناس ملتمين على السياره اللي دايره حادث ومافيش غير اصوات الله ترفع بين لا إله الا الله ولا حول ولا قوة الا بالله .. أنفرت الناس من هالمنضر وبدوا يتصلو بالاسعاف والانه وضعنا في ليبيا وطبنا في حاله لايرثى لها ولا عليها فز واحد من الاشخاص اللي واقفين وفتح باب سياره بصعوبه هوا ومجموعه من الناس ،حتى يطلعو منها شاب في عمر زهور وراجل كبير في العمر شويه.. وبنت ماتجاوزش عمرها 22 وعام .. ولكن هل هما أحياء أو لا مافيش حد كان عارف .
وما هيا إلا دقائق معدوده حتى كانو في أحد مستشفيات طرابلس المعروفه وكل منهم كان متوسد غرفه للعمليات والحالات خطيره جداً... ومازلنا مش فاهمين..!؟
***************************************
نسيبه تمسح في دموعها: ياارب صبرناا ياارب ناره محرها ياحليلي على وبوي الغالي ياحليلي امشي وخلانا بروحنا منو بينا .
روان حطت الهاتف اللي كانت تتفرج فيه على صورة بوها وإتجهت لي أختها اللي كانت منهاره وبدت تبكي هيا وياها ..
مرام تخبط على وجها وبصوت عالي في وسط الناس: آه يااربي آه ياحليلي اه يابابا ياحنون اه وين مشيت وخليتنا منو لينا من بعدك..
بينما طاحت سجى في وسطهم وهيا تقول: كسرت ضهري وهديت حيلي آه ياربي صبرني يارب يامولايا إجعل صبره كيف غلاه ..
وبينما كانوا يحاولو يهدوهم كان فيه فرد من العيله مختفي ومافيش حد لاحظ!؟
وفي لحظتها خبط الباب بقوه ونفتح وخش منه عصام عمهم وهوا يكشخ ويهزب بصوت عاالي.
عصام: ضمو فامكم جبتولنا العار وأقسم بالله مزلت نسمع واحد يعيط امالا نلحقكم ببوكم .
شافوله ناس أغلبهم بنضرة استحقار ف قالت روان في نفسها :هذا وبابا قاعد ماليشي ساعات وهكي ميت امالا بعد وقت كيف يديرو فينا؟
لبست عمتهم فاديه وشاحها وطلعت ودموعها ينزلو ..
فاديه: خير مصيبتك خاش تلعلع ؟؟
عصام: ضمي فمك ترا مادرهيش كبدي وسكتي البلاوي اللي داخل والله ..
فاديه قاطعت عليه كلامه: ضم إنت فمك وأسكت هذا كلام تقوله لي بنات خوك وهما فاقدين بوهم!!.خزي عليك ملاّ عم والله ينشد ضهر بيك .
عصام سكت وهوا متعصب وقاطع هالحديث شاق خطوات تجري وصوت دهشات عاليه ومسموعه .
فاديه:سيف! خيرك شن فيه!؟.
تكلم سيف خوهم بكلمات متقطعه: أيمن وجبريل ..
عصام: تي خيرهم تكلم؟.
سيف يلقط في أنفاسه: وساجده ..
فاديه هزاته من كتفه: تي قول تربح اللي فينا سادنا.
سيف طاح ع الارض لما رجليه معاش حملوه ف قال بنبره مهزوزه: دارو حادث داروا حااادث وحالتهم خطيره ..
نصدم عصام من الكلام وبخوف : أيمن أيمن شن وضعه ولدي كيف حاله!؟
بينما فاديه قعمزت على الارض جنب خوها سيف وهيا مش قادره تستوعب قداش ،ما هنهار كان ثقيل عليهم .
سيف رجع وقف مره تانيه: مش فاهم شيء اللي نعرفه انه حالتهم خطيره وخلاص .. وناس يحكو انه الحادث شنيع هلبا.
فاديه ودموعها يصبو زي المطر ع خدودها: من قالك وفي أي مستشفى.
سيف:في مستشفى ال***** وكلمني توا دكتور أيهم لما عرف جبريل خوك .
فاديه: ياربي شن هالنهار ياربي هاليوم شن يكمله يااربي .
بينما طلع عصام من جنبهم بسرعة البرق وهوا خايف على ولده يصيرله شيء لا سمح الله
فاديه شدت سيف من يديه:ألحق خوك بسرعه لا يدير حادث حتى هوا مش ناقصنا رعايش تربح .
سيب سيف يدين فاديه وركب سياراته وبسرعة البرق لحق عصام .
