💫 وجدت حيث أنتمي 💫
الفصل الاول ❤️🦋
✨فاقد للحب مفتقدة للحنان ✨️
فأحد الأحياء شعبية بمدينة الدار البيضاء العاصمة الاقتصادية للمغرب ، وسط دار بلدية متكونة من طابقين كانت مستلقية على سريرها بهدوء، تارن منبهها و أيقضها من أحلامها كمشات ملامحها بانزعاج ، مدات يديها وطفات الغيفاي وناضت كتكسل خدات لاتخوس ديالها وفوطتها و تمشات باتجاه الحمام دارت روتينها الصباحي رجعات لبيتها لبسات جلابتها باش تمشي تسخر للفطور كان هدوء يعم المكان الكل صابح ناعس ليوم الأحد بوحديتها فايقة بكري توجهات عند مول الحانوت وقفات عليه بابتسامة بشوشة
.... : صباح الخير العربي لاباس كيدايرة حليمة و مالين دار
رد عليها مول الحانوت بضحكة تابانت ليه ضرسة العقل مسوسة
العربي: صباح الرباح وتيسير الالة احلام لاباس على لي صبح على هاد زين كي بغيتيه يكون .
أحلام (ضحكات) :سير الله يمسخك لعنب كيكون غافصيف نتا عندك على طول العام
العربي : ايوا اش حب الخاطر الالة البنات ،
احلام : عطيني كيلو لا ربع ديال سميدة دالحرشة وجوج خمارات و طاسة دجبن وباكية دلفرماج العربي :هي اللولة
خدات سخرة وخلصاتو ورجعات لدار و زنقة خاوية كتصفر مشات لكوزينة حيدات جلابتها و وقفات كتصايب فحريشات صغار معمرين بجبن كيف تيعجبو جداتها و جدات اتاي وبدات تاتحط فطبلة دلفطور فطرات وغطات طابلة بمنديل كبير تايفيقو ويفطرو ومشات لصالة تاتحيد طلامط ولغشاوات دلمخاد معولة تخملها هزاتهم هوما و المانط و غشاوات فراشها و طلعاتهم لسطح ورجعات باش تهز سدادر بقات معافرة تطلعاتهم يتشمشو وهوما وطوابل عاد رجعات لزربية تاهي طلعاتها هبطات تجيب لبستيلية شافت جداها خارجة من بيتها
بقفيطن دراندة و دزارة مطروزة و زيف دحياتي كانت مرا ستينية كتبان فوجهها صرامة واثار زمن و تجاعيد العمر مشات احلام باتجاهها هزات يديها وقبلاتها احتراما
وقالت : صباح الخير الميمة كي صبحتي ،
شافت فيها حداها لالة هنية بصدمة : ماعرفت اش طرا وجرا تتنزل عليك هاد صواب ياكما شي حمار مات ،
عوجات احلام فمها وقالت: وكيما درنا معاكم وحلة راه صاوبت لفطور انطلع نصبن راه ديك صالة راه ولات حالتها
ردات عليها لالة هنية بجفاء : اديريها مزيانة ايوا الله يعاونك على تمارتك ،
تنهدات احلام وطلعات تقضي شغلها طلقات شعبي فكاسك بلوتوت وبدات خدمتها ومرة مرة كتبدا تغني بصوتها شجي و تشطح بمهارة مكملات تا حمات شمس وأذن ضهر سالات وسيقات سطح وهبطات مكفضة سوالها و كمامها، مشات لكوزينة تشرب عطشات لقات عمتها كالسة كتنقي لعدس دايرة رفيسة وجداها كالسة كطرز ولماعن دلفطور باقين فوق طبلة تادخلات عليهم بنت فاوائل العشرينات شعرها زعيعر قصير وعويناتها زورق متوسطة طول وغليوضة كتجر رجليها وكتفوه..
ايمان : كاين شي فطور ،
حياة ( عمتها) : دخلي الحبيبة كاين وايلا ماكان نكونو لبنتي شحال عندي من ايمان ديالي
ايمان: يخليك ليا ازين
احلام ( شافت فبهم مقندشة) : قولي غا صباح الخير تريكة ناقصة يخخ غسلي غير وجهك ونتي كتقيلي خامرة تا كطفى شمعة عاد كتنوضي
حياة ( بحدة) : ديها فسوق راسك تنوض معاياش مابغات
أحلام: دويت معاك مدويتش معاك دويت معاها هي لاش خاشية كرموستك
ناضت لالة هنية وهضرات بصرامة: لا نوضي طيري عليها ريشيها حسن هاك ( مدات ليها عكازها) هاكي ضربيها عطيها شي قتلة صح مايتمكن ولاهيلا هادشي لي بقا غا طايفو فوق راسي يا شيخات نوضي كملي تخمالك ونتي دوري شوفي رفيستك ونتوما كتنوضو تفرجو فيا جيران كل نهار ونتي دوزي تجغددي وشوفي ماتقضي...
ناضت احلام بنترة دخلات لصالة غطات تلفازة و جابت الكرسي وقفات عليه مسحات ترية من لغبرة وبدات تاتحك الحيوط و تحيد العنكبوت من لقنات و جابت سطل وبدات تسيق وتكرط كترد حرها فشقا سالات وهبطات سدادر وجابت تلامط وحدين خرين خلات صالة مخملة و مجبدة تجبيدة دنفس مشات لبلاكار لي فبيتها وجبدات طاسات دلعشوب كتقاد لماسك لشعرها مشات لكوزينة قطعات شوية دلبصلة وتومة دارتهم يغليو مع الما و دارتهم مع سيدر وزيت الزيتون وخلطاتهم ودارتهم لشعرها بعدما مشطاتو و بدات تاتصاوب تبريمة للحمام بصابون بلدي وسيدر و حنة و ما ورد و لحامض
أنت تقرأ
💫وجدت حيث أنتمي 💫 ( مكتملة ❤️🔥)
Short Story🌟الان على شاااشتكم بلمسة واقعية بقلمي 🥀 هبة 🥀 ✨وجــــــــدت حيــــــــــث أنتـــــــمي ✨ ✨وجدتك بعد أن فقدت كل ما أملك ، بعد أن كنت احيا بلا موطن ✨ 🥀وجدت كل ما فقدته فقط عند وقوعي في شباك حبك انت الذي تشعل حياتي شموعا وليلها ن...
