💫 وجدت حيث انتمي 💫
الفصل الثالث💎
🍁جزء من قلبي لا منتهى له 🍁فدار احلام لقديمة القرآن الكريم مطلوق على جهد ريحة البخور و عود ند كتشم من لبعيد قدام دار واقفة سيارة نقل الموتى دار عامرة بناس الكبير و الصغير ، القريب و البعيد جاي يعزي شتا كتنقط وسما عامرة غيوم الجو كئيب رغم انها ماكنتش مرة لي نقولو عليها مزيانة و لا مرة حقانية ولا كدير الخير ولكن كتبقى الام و الجدة و الخالة و العمة كتبقى نبع الحنان لمرة لي وقفات مع ولادها ودارت لي مايطيحش على بال باش تشوفهم كيما بغات ، ماكتسمع غير .."عزانا وعزاكم واحد " ..."البركة فراسك ".." الله يعظم الاجر " .."مامشا معاك باس "... وغيرها من عبارات تعزية الغوات ونحيب العيالات كلشي كيمشي ويجي قائم بكنازة لالة هنية و مأدين الواجب كما يجب ، فبيت حياة لابسة جلابة كحلة كلون ايامها ملامحها باهتة وحزينة عينيها طافين معنقة تصويرة فيها هي ومها و "ايمان" بنتها لي محضراتش لكنازة لاهي لا مها لا باها لا خوتها بقات الحسرة عليهم دبا هي جربات شعور الفقدان فقدااات كلشي هي عارفة و متأكدة انه اتسالي تلتيام دلكنازة و كلشي ايمشي فحالو و مغايعقل عليها حتا واحد ،مرة مرة كتخرج شهقة من وسط دموعها ، لتحت كانت وصلات سيارة بورش سوداء نزلات منها بطالونها الاسود فوقو جلابة فنفس لون صباط منبتة بموزون قشور الحوت كيبري و سفيفة فلكري وشال كذالك فلكري محطوط على راسها من لفوق خارجين خصلات من شعرها و مطلوق من لور زولات نظاراتها شمسية شداتهم فيديها مع صاكها الاسود من ماركة Dior ، خرج من مكان سائق وسد الباب تمشا ناحيتها طبطب على كتافها ومشاو داخلين كان فكامل وسامتو بتيشرط فلبيض مع جينز فلكحل وسبادرين بيضة نظاظر كوحل كيتمشا بنخوة شادها من يديها وقفات قدام الباب لقات عمر وعنقاتو كتبكي ، بادلها العناق مخفف عليها و مواسيها: رجوع لله ا احلام الله يهديك راك كتعدبيها هاكا ، أحلام: مشفتهاش فاش ماتت مشفتهاش علاش كولشي كيمشي ويخليني اعمر هي مشات وانا كاعما تصالحت معاها كاعما تسامحنا مشات وهي شادة فخاطرها من جيهتي ، عمر : بغاها الله خداها الله صافي اختي الله يسهل عليك ماتبكيش دخلي لداخل اتلقاي سناء تماك دخلي اختي (دور وجهو عاد رد لبال لشخص لي واقف معاها قرب حدا ودنيها وقال) شكون هادا ااحلام، احلام: هادا وليد ربيب طاتي ، عمر : اممم مرحبا اخويا تفضل
مشات احلام كدور عينيها مع دار لي بهات لونها و توسخات مبقاتش على داك نقا لي كانت فيه رتيلة معششة فلقنات دخلات لصالة لي كانت مطرطقة بالعيالات من راس تال راس كل وحدة حت حت بنميمة مكايسكتوش تاحرمة الميت مامحتارمينها مع دخلات بداو يطلعو ويهبطو فيها ويوشوشو ، المراه 1: يااااختي شكون هاد لبنت ، ردات عليها صاحبتها : هادي احلام حفيدة الحاجة بنت رضوان ، المرأة : واش راجل حفصة ، المرأة 2: اه ولكن هادي ماشي بنت حفصة هادي بنت منى مراتو لولة الله يرحمها ماتت من مور ماولداتها ، المرأة 1: على هو كان مجوج قبل حفصة وعندو بنت قد هاكا صلا على نبي ، المرأة 2: وااييه طالعة شابهة فمها غا هي محطوطة منسوطة مادات منهم تاحاجة كانت فنة كتفتن اشمنك يا زين اشمنك يا فورمة اما تاويل و تسمسيق غا حيد بالاك دراع و نفس حارة ، المرأة 1(كتصكاني فأحلام بعينيها كتعبر فيها ) واباااينة اختي ها شونتيو قدامنا ماشاءالله أجي نسولك مجوجة ، المرأة 2: وهداي عليا هادي والله واعلم راه غادا العام غبرات مابقات بانت فسيكتور تال ليوم عاد شفنها ولكن بلاتي دخل بديعة مرات عمها تعطيك الخبار أجي نتي لاش كطقسي ، المرأة 1: ياختي بانت لي فيها زين تقدر تعجب ولدي سعيد ويديها ، المرأة 2: علاه خدم ، المرأة 1: باقي عييت معاه يقابل الحانوت ديال باه سلعة واالو ولاد الحرام لقاو وليدي نية و غشيم بلاوه ليا الله ياخد لحق فيهم ولكن نضبر ليه على المرأة ديك ساعة ترد ليه عقلو ، اما احلام كالسة فحالا كالسة على شوك عارفة كل رباعة كتنمم فيها فقنت كيشوفو فيها ويهضرو وهي مزيرة على صاك بيديها مرة مرة تاتنزل دمعة من عينيها كيما كان الحال كتبقى جداها و فراقها من فراق الام بقات كالسة تا شافت جيهان بنت عمها ناضت سلمات عليها و عنقاتها كتبكي و تنخصص و سلمات على مرات عمها ورجعات تكلس حطو كرواصة و البتيبان و الكرص و الخبز و زبدة و زيت و العسل و الكوفيتير و الفرماج و الجبن و الحلاوي دصابلي مشكلين مع اتاي بداو العيالات كياكلو وهي غي حانية راسها مابغات لا تاكل لا تشرب
![](https://img.wattpad.com/cover/376028385-288-k839124.jpg)
أنت تقرأ
💫وجدت حيث أنتمي 💫 ( مكتملة ❤️🔥)
Short Story🌟الان على شاااشتكم بلمسة واقعية بقلمي 🥀 هبة 🥀 ✨وجــــــــدت حيــــــــــث أنتـــــــمي ✨ ✨وجدتك بعد أن فقدت كل ما أملك ، بعد أن كنت احيا بلا موطن ✨ 🥀وجدت كل ما فقدته فقط عند وقوعي في شباك حبك انت الذي تشعل حياتي شموعا وليلها ن...