💫 وجدت حيث انتمي 💫
الفصل الثاني 💎
🍂أحبك ، لكن انتقامي أكبر من حبك 🍂
فوسط دار احلام واقفة فلكوزينة لابسة اونسومبل رياضي فلكري متكون من شورط قصير لاصق و سوتيان عليهم علامة نايك من جيهة صدر جامعة شعرها شفينجة لفوق مبينة لبيرسينك لي فودنيها تدندن مع كلمات الاغنيه المطلوقة بصوت شجي
:ياما رمانا الهوى ونعسنا و لي شبكنا ايخلصنا ولي شبكنا يخلصنااا
توقفت على الغناء بمجرد مسمعات رنة الهاتف ديالها شافت اسم المتصل تبسمات بمكر وجوبات على الفور بصوت رقيق
: الو سرسورة عاش من سمع صوتك
جوبات سارة بنبرة غاضبة : وااش ماباغاش تحشمي واش ماحرامش عليك هادشي لي كديري انا عارفة ومتأكدة بلي نتي موراها هضري جاوبي
كمشات ملامحها بانزعاج وبعدات تيلي على ودنيها بسبب الغوات ديال سارة
ورجعات هضرات بنبرة بريئة عكس ملامحها الماكرة
: مالي شنو درت انا باش تغوتي تاتهميني باطل احبيبة والله
سارة : انا عااارفاك محاملانيش حيت ختارني انا ونتي لا دبا سمك كتخرجيه والله تاغاندمك على هاد الفعايل وهادشي لي درتي انخرجو فيك مضوبل عقلي
قطعات عليها وتأفأفات بملل احلام : هاد زمرة شحال فيها ديال بلا بلا و تهديد مافيديها والو ولكن هي حطات راسها براسي وانا انوريها لاهي لاهو (ضحكات باستهزاء) ههايهاي انا لي مخليت ماشفت طوب وحجر ، يجيو هوما يديرو ليا ستة تسعود مزيان ايوا صفات (رجعات كتغني فرحانة بنتيجة افكارها شيطانية ) ويااحبيبي شااغل بالي ، كملات صلاد لي كانت دايرة وداتها لطبلة لي فلكوزينة كتاكل وهي كتفكر فهادشي لي دارت سالات دغمتها و هزات تيلي ديالها ودوزات واحد نمرة حطات تيلي على ودنيها تسنات تاجاوب وقالت: الوو كلشي ناضي ، ***، ايمتا اتقضي الغرض ؟؟، ***، صافي اتسناني بعد غدا حدا صالون مع سبعة دصباح نعطيك لي بقا من خلاصك ، هييه و متعرفني منعرفك يالاه بسلامة ، قطعات وهي مرتاحة قلبها بدا يتهدن شوية بشوية و يرتاح نارها قربات طفا و تبدا من جديد ناسية كل ماطرا و يبقى داكشي من الماضي
🌿عند سارة 🌿 كالسة بتكشيطة فلبلون كاسي ديال العرايس شعرها منتوف و وجهها عليه اتار طرشة لكحل مجخنط تحت عينيها كتهزز فرجليها ، و هند فوق راسها كتمشي و تجي تاوقفات شنقات عليها كدي وتجيب فيها: قولتها ليك ابنت لحرااام دبا ضربتي لينا كولشي فزيرو مكانش عليا نعاونك فهاد تخلويض ديالك ولكن درتييها بيا عمر شيخة تنسى هزة الكتف تفو عليك ، دفلات عليها وهزات جلايل تكشيطة لي لابسة و جات خارجة تاوقفات فلباب وضارت عندها: اخر مرة اخررر مرة تعرفيني ولا لي نديرو فيك مانقولو ليك نساي بلي عندك خالتك ولا ولاد خالتك ،زدحات لباب وخرجات خلات دمعة هابطة من عينيها العافية لي شعلات حرقاتها هي لولة ، غير صباح كانت ماقاداها لا سما لا ارض ليوم صداقها مع واحد لاباس عليه و بوكوص وباقي صغير و قاري فيه لي الحوايج لي تمناهم اي بنت، تا كدمر فرحتها في ساع باش كيجي صاحب دعوتها
⚡ فلاش باااك ⚡ فوسط صالة الفيلا دمهدي كالسين العائلة المقربين دسارة و مهدي من خلات و عمات و عمام معندهش الخوال هو بكوسطار فلبلو مارين وهي بتكشيطة فلبلون كاسي الفرحة اتنقز من عينيها الاندلسي مطلوق على جهد ، كلشي فرحان ماعدا العريس فحالا جايبينو بزز مغوبش ومحاملش راسو و لكرافاط لي فعنقو خانقاه باغي غا ايمتا يتفك من هاد العجب لالة كلتوم ضااحكة هي وبنتها هند عكس هدى لي غير كتنهد كلهم كيتسناو العدول يوصل ولكن لي وصل مكانش ليهم فلحسااب ، داخل معنكر هاز راسو فسما بتجاكيط د الكوير و تيشورط خضرة وسروال تجين فاتح مقطع من جيهة الركابي سنسلة فضية كتبري فعنقو مع البيرسينك لي فودنو ، ابتسامة ماكرة و نظرات لعوبة تمركزو نحو سارة لي ضارت على غفلة قشعاتو سرطات ريقها بخوف و توتر ،هز حاجبو لمضروب بمعنى هانا جييت عينيها وساعو داتها كترجف صافي قوا**دت عليها بمعنى لكلمة مد يديه مور عنقو كيتحسس لوشام لي كان مشكلين اسمها Sarah بالانجليزيه تبسم باستهزاء و وقف عليهم تمام كيما وقفات عليهم احلام فلخطبة سفيان : مبرووك عليك اسارة ميسحابليش دغيا لقيتي البديل ، هز فيه مهدي حاجبو وقال: شكون نتا ، سفيان دور عينيه فالارجاء تاوقف عند مهدي طلعو وهبطو ورجع شاف فيها وقال: اممم وعلاش لا بعدا حسن من هادوك القماقم لي كنتي كتبدليني بيهم ضربتي ضربتك هاد لمرة جبتيها عبار ميتسالكش ، مهدي : وشكون نتا اسيي ، سفيان : ائ سمحلي مشرفتكش بنفسي ولكن خلي سارة تقولك شكون انا ، مهدي دور عينيه لسارة وقال: شكون هاد خيينا ، سارة بقات غاكتلبق فعينيها معرفات متقوليه ، سفيان: مبغيتيش تقولي ليه صافي انا نقوليه انا صاحبها ، مهدي هنا صعر بالمعقول وطلع ليه دم بلاما يشعر ضربو ببونية نيشان لوجهو
أنت تقرأ
💫وجدت حيث أنتمي 💫 ( مكتملة ❤️🔥)
Short Story🌟الان على شاااشتكم بلمسة واقعية بقلمي 🥀 هبة 🥀 ✨وجــــــــدت حيــــــــــث أنتـــــــمي ✨ ✨وجدتك بعد أن فقدت كل ما أملك ، بعد أن كنت احيا بلا موطن ✨ 🥀وجدت كل ما فقدته فقط عند وقوعي في شباك حبك انت الذي تشعل حياتي شموعا وليلها ن...
