روايــة #حي_الزهور 💐
الحلقة 19
على نزلة أشرف من حوشه : السلاااام عليكم
الولاد شبحوله
و ياسمين خشت لزينب : اني بنستأذن منك ياخالتي نجيب مناقش من حوشنا و نجي
زينب : غر من اللي كان يطق ؟
ياسمين تلخبطت : اه ؟! .. مش عارفة .. فتحت الباب مالقيتش حد اكيد فروخ الشارع يطقوا و يهربوا
زينب بدت تدعي في قولة يعطيهم و يجيهم
ياسمين خافت الدعاوي يجو في خوتها : لالالالا ماتدعيش عليهم ياخالتي حرام
زينب سكتت
و وفاء ضحكت : حق صغيويرة سيورهم يكبروا و يعقلوا
_
طلعت ياسمين لخوتها و هي ساكتة
لقتهم يهدرزوا مع اشرف في هدرزة عادية
أشرف شبحلها استغرب من جيتهم و سألها : صارت حاجة جديدة مع وفاء ؟
ياسمين شبحت لفراس و ردت على أشرف بخوف من خوها : قالت تبي تقعد عندكم لين تحصلها إيجار
أشرف استريح : باهي كويس
فراس شبح لرياض : وصل اختك للحوش و ماتخليهاش تطلع للعتبة
ياسمين تكنطت : فكنا من الجو هذا عاد
فراس فنص فيها و هي سكتت
طلعت مع رياض لحوشهم و أشرف و فراس قعدوا
فراس : تي غر شن صاير معاك ؟ شن هالدنيا الخاشة بعضها عندك ؟
أشرف مسح على لحيته : اسكت ياراجل والله مانحكيلك
فراس : شوفلنا المربوعة كان فاضية خلي نقعمزوا فيها
أشرف : لالا خلينا ناخدو قهاوي برا في الهواء ..
______________
نعيمة مقعمزة في حوشها و قلبها يغلي
تدوي بروحها : ياحليلي بنتي وين مشت ؟ وين اختفت ؟
حيه عليا كانما طرت فيها حاجة ؟ حي عليا كانما مسوها ولا قتلوها ؟
يا فراس وينك حتى انت معادش جيت ؟! حد فيكم يجي يهنيني و يريحلي بالي ياهوو !
خش عليها رياض : ساااعيكووووو 😎
و لقاها تبكي في حالة : خلاص يما اهي جاتك
نعيمة فرحت : وينهااااا
ياسمين خشت : خيرك قالبة الدنيا توا هدا شن يقولوله ؟ من جهة تبيني نروح بيها و من جهة تانية دايرة النكد
نعيمة : دايرة النكد على خاطرك انتي خايفة عليك من اماليها اما هي مش هامتني بكل
ياسمين : افرحي و زغرطي هونا سقدتهالك
نعيمة : وين حطيتيها ؟
ياسمين : عند خالتي زينب
نعيمة : شن رفعها عند زينب عالصبح ؟ مازال بتضايق الناس اكثر مما مضايقتهم !!
ياسمين تعفلقت : خلاص ياماما بالله عليك اسكتي و فوتي موضوعها
نعيمة : ايه هو هدا كلما نتكلم اقعدي ضميلي فمي
ياسمين نفخت نفسها : من امس وانتي على نفس السيرة .. خلاص خلااااص فددتيني
نعيمة تدوي بروحها : مابعدك يا زينب قداش بتتحملي من هم فتحتي على روحك جبهة انتي و ولدك
ياسمين : بإذن الله ماصايرلها شي لا هي ولا ولدها ، الناس نيتهم طيبة فتحولها قلبهم قبل حوشهم و حاطينها بين عيونهم مش زيك انتي
نعيمة قرنت حواجبها : شن حسك تقولي ؟
ياسمين : خالتي زينب موقفها هذا مستحيل ننسهاولها ، فزعتلها و رحبت بيها عندها .. رادة بالها عليها و هامتها تقولي عليها بنتها ... طلعت أحن منك يللي قلبك زي الحجر
رياض فنص فيها : هيه انتي ! احترمي نفسك و تكلمي مع امك باهي خيرلك
نعيمة متعفلقة : خليها خليها .. بالك خاطرها تعطيني كفين تربيني بيهم
ياسمين : مش يقولوا كلام الحق وجّاع .. هذا هو
و مشت خشت لدارها و سكرت الباب عليها خلت امها تبكي واجعها خاطرها منها
جاها رياض : فوتيها ماتعدليش عليها
نعيمة تبكي : والله الا طالعة لعماتك لا مشت لا جت .. نفس أطباعهم كلمتهم يحطوها في الوجه لا يفكرولها ولا يحسبولها .. يحسابوها فلاحة
رياض : لالا عماتي باهيات عاد ماعندهمش على التلقيح
نعيمة : نحكي على ايام زمان توا عقلوا شوية على قبل ..
رياض : باهي زوّجي بنتك و افتكي منها .. سيورها تاخد راجل و تركح تبطل عناد وعار
نعيمة : نخاف من وعارتها و طول لسانها يجيبهالي من تاني يوم
____________
