روايـــة #حي_الزهور 💐
الحلقة الخامسة
( بقلم مسرة أسامة )
و مرت الأيام و السنين 🌹
في سنة 2010❤️
ساعة 11:00 م
شباب الحي راكبين موطواتهم و مولعين الأغاني بصوت عالي مدايرين بيهم دوشة في الشوارع
اشرف جي جنب فراس و صاحبهم علي و يعيّط بأعلى حسّه : اخرلي أسبوع في حياة العزوبية يا شبااااااب .. و اخيراااااا وووه
الشباب ضحكو و خشو تحت الكوبري يجرو
اشرف يعيّط : ووووه هااااااااااع
لين دار صدى صوت
فراس يضحك : تي اسكت ياراجل تو يسمعوك وحدة من الدوريات يلحقو جرتنا
و تلفت جنبه لقي خوه رياض و سيف خو اشرف جايين بموطوات
فراس : اووه انتو هني ؟؟
سيف يصيّح : والله ماقدرنا نقاومو الجو يا راس قلنا لازم نطلعو وراكم
فراس شبح لخوه رياض : قدامي للساحة الخضراء لا يمين لا يسار
رياض شبح لسيف و علّى صوته : لحي الزهور يا معلّمممم
و شرينو موطواتهم و طلعو زي الطلقة ..
رياض و سيف اتجهوا لشارعهم و فراس و اشرف و علي اتجهوا للساحة الخضراء في المدينة
نزلو الشباب للساحة و هما يضحكو
فتحوا الزكرة و بدوا يرقصوا هما و اشرف
ــــــــــــــــــــــــــــــــــــــــــــــــــــ
في حوش جميلة ..
راكبين البنات جوري و نسرين فوق السطح
مفرشات فراشات و مخاد و متكيات على ظهورهم يتفرجوا ع السمي في الليل و يغنوا بصوت هادي ..
الليل الليل .. الليل الليل
الليل كثر خيره
لقيته حنون و خيرلي من غيره
تصاحبت نا و الليل
ترافقت نا و الليل
الليل الليل
الليل حنون
اللي رفقته ماتهون
و خيرلي من اللي جفى و ماعاد قابل عون
تصاحبت نا و الليل .. ترافقت نا و الليل
و سكتو شوية و هما يشبحوا لنجوم السمي
جوري : قداش خاطري في عرس نغير فيه جوي بعد الامتحانات
نسرين شبحتلها : خطرها ع الاعراس .. بتمشي لدخول اشرف ولد خالتي زينب
جوري : امي جميلة قتلي لا .. مش عارفة علاش البنات كل شي محرومات منه
نسرين عوجت فمها : لان السبر يقول ان البنات مايمشوش للدخول
جوري : عليك اسبار
نسرين : شن رايك نقولو لياسمين و بيلسان يجو يسهروا عندنا و يباتو معانا
جوري : ياريت لكن تعرفي خوهم فراس كيف حصلة مستحيل يخليهم
نسرين : حني نقولولهم و خلاص مرات يجو
و فجأة تركبلهم جميلة داهشة : انتو هني يابنات و اني ندور فيكم
البنات شبحولها : نعم يمّا
جميلة : نوضي ارقدي انتي وياها راهو ساعة طناش عندكم امتحان غدوا
نسرين وقفت : حي عليا وقت .. امتحاني الحصة الأولى اني امتى بنلحق نرقد
جوري وقفت : راجيني نازلة معاك
لمو الفراشات و نزلو مع جميلة
و هما نازلين لقو سليمان راكب
جميلة استغربت : تبي حاجة يمّي ؟
سليمان : كنت نبي البنات
نسرين : تبي حاجة عمي
سليمان : غدوا ماتعبوش عليا في المرواح بنقعد نخدم إضافي للعشية مش حنقدر نجيكم .. يعني روحو بروحكم
البنات شبحو لبعضهم و فرحوا من عيونهم
جميلة : العفو ماتقدرش تطلع حتى نفيص ساعة يا سليمان ؟ الدنيا مافيهاش امان راهو
سليمان : شن بيجيهم يام الدنيا مونسة و زحمة ..
جميلة : امالا تو نقول لسالم يجيهم و خلاص
جوري فرحانة : خلاص خالي كون هاني و مطمن تو نروحو بروحنا , ولو صارت معانا حاجة نتصلو بيك
سليمان : باهي مية مية .. هي تصبحو على خير
و نزل من الدروج
نسرين بتخش لحوشهم : جوري باتي معاي الليلة
جوري ابتسمت : لالا خليها ليلة خميس باش نسهروا
و غمزتها
نسرين ضحكت : باهي تمام .. هي تصبحوا على خير
جميلة و جوري : و انتي بخير
خشت نسرين لحوشهم و نزلت جوري مع جميلة
(( سالم بعد سنين ربي رزقه و بني فوق امه ))
جميلة توشوش في جوري : على شن تتغامزي انتي وياها قدامي اه
جوري : حني ؟!!! امتى يمّى ؟
جميلة : تحسابيني عمية ؟
جوري : ااه هي قصدها لو مامشيناش معاكم العرس بنسهرو مع بعضنا بس
جميلة : اما عرس هذا ؟ ايه باهي والله هذا اللي ناقص نرفع معاي البنتة للدخول باش يديروني مضحكة
جوري : والله مافيها حاجة غر انتو معقدين الأمور .. شن فيها لو مشينا غيرنا جونا و شفنا العروسة
جميلة حركت صبعها بمعنى لا و خشت دارها
جوري نفخت جدوقها و خشت وراها
شافت تليفونها فوق الكمادينو في الشحن لقاته يضوي , خداته بسرعة قبل ما جميلة تحس بيها داراته مقفل و حطاته في صدرها
