روايــة #حي_الزهور 💐
الحلقة العاشرة
( بقلم مسرة أسامة )
فراس : يعني الموضوع هذا خلي خوالها يعطو رايهم فيه و في النهاية لو البنت تبيه رسمي معناه اني رايي زايد ماليشي فايدة
جميلة : لا يا وليدي الفايدة فيك .. انت تعتبر مربيها حتى انت ناخدو رايك
فراس تكنطى و وقف : ان شاء الله ربي يقدم اللي فيه الخير
جميلة : اقعد اشرب قهيوة
فراس : مرة تانية ياخالتي .. هي نستأذنك
جميلة : اذنك معاك , صحيت سلم ولدي
فراس : سلمك
و طلع من عندها و هو متعصب و متضايق , مصدوم و مغصوص .. ماتوقعش الموضوع يكون موضوع خطوبة جوري
فراس : سيف يا جوري سيف ؟؟
و بوكس ايده بـ غل : تاخد في رايي و تقولي انت اللي مربيها !
خش لجنان حوشهم خدي موطوه و طلع بيه للشارع , شريّن و طار بيه بسرعة 🔥
ــــــــــــــــــــــــــــــــــ
جميلة خشت للدار لقت جوري تتفرج على باب الحارة
جوري شبحتلها : منو اللي كان عندنا يما !
جميلة قعمزت : هذا فراس كنت موصياته على حاجة جابهالي
جوري : حاجة شني
جميلة : قوليلي ! .. انتي عارفة ان سيف ولد زينب يبي يخطبك اوه ؟
جوري تلخبطت و نقصت صوت التلفزيون : كيف يما ؟
جميلة : امبكري شوية اتصلت بيا زينب تخطب فيك لسيف
جوري تفاجأت و سكتت , هرب عليها الضي
جميلة : خيرك سكتّي ؟
جوري : لا يما ماعنديش علم
جميلة قامت حاجبها : بالك تكلمي فيه يا بنت ! قولي الحق
جوري خافت : لا يما لا نكلم فيه لا شي اني بروحي تفاجأت زيني زيك , شكله هوا اللي حاط العين
جميلة سكتت و قعدت تشوفلها
جوري توترت : باهي انتي شن قلتيلها يما
جميلة : قلتلها نشاور خوالها و نرد عليك
جوري سكتت
جميلة : شكلك ماعندكش مشكلة
جوري : اني متفاجئة بس , و في الأخير الراي راي خوالي لو هما يشوفو فيه مناسب عادي
جميلة : قصدك انتي تبي تتزوجي بعمرك هذا ؟
جوري : انتي شن رايك به ؟
جميلة : والله ماني عارفة نوافق ولا لا .. نحس في طلعتك من عندي زي طلعة الروح
جوري ضحكت و قربت منها : معقولة غالية عليك للدرجة هادي يما ؟
جميلة : امالا كيف مش بنيتي و وردة حوشي ؟
جوري اتكت على رجلها : ربي يحفظك و يخليك ليا .. انتي امي و بوي و دنيتي كلها , بلاك مانقدرش نعيش و حق ربي
جميلة ضحكت و بدت تلعبلها بشعرها : يحضرني فرحك و يرحم امينتك
جوري : ان شاء الله يارب .. امتى بتقولي لخوالي انتي
جميلة تخربشلها في شعرها : غدوا الحي و اللي يعيش , زينب قتلي ولدها يراجي في الرد و مدابينا مانطولوش
جوري سكتت و سرحت بتفكيرها .. ( خيره ماقاليش امبكري انه بيفتح موضوع زي هذا ؟ زعما دايرها ليا مفاجأة ! ... زعما لو نوافق عليه نكون اخترت الشخص الصح ؟ .. زعما مانتعبش في حياتي معاه ؟ .. زعما يحبني و يصوني زي ما مراد كان يحب ليلى ؟ .. اني صح نحبه و خاش خاطري لكن مش قادرة نشوف روحي زوجة ليه , مازال بكري ع التفكير اهوا ! )
و شبحت للسقف و تنفست .. ( ياربي كان زواجي منه خير زيد قربه ليا و كان العكس بعده من عليا .. )
جميلة كلمتها : شنو بترقدي ؟
جوري ابتسمت : نحس في روحي ننعس اليوم نايضة بكري
جميلة : ارقدي ياحنة ماعندك مابديري ع الأقل عدلي نومك الملخبط
و غمضت جوري عيونها و شوية و خداها النوم في حجر جميلة
شبحتلها جميلة لقتها رقدت , ساوتلها راسها ع المخدة و غطتها و طفت عليها الضي و طلعت
ــــــــــــــــــــــــــــــــــــــ
