روايــة #حي_الزهور 💐
الحلقة الثانية
( بقلم مسرة أسامة )
مشي سالم يجري يولع في سيارته : مالي و مال الهم اني وين راجلها ولا اماليها !!
لبست جميلة جبتها من ليلى و قعدت اديدش في زينب للسيارة
جميلة : امالا وين رجب ؟ لازم يكون حاضر و يمشي معانا
زينب تتوجع : يعطيه مايفصل مفاصله من بعضهم متمرقد الله يعطيه مرقد ماعاد ينوض منه .. بنموووت
جميلة فهمتها : غير هيا بري اوحيدة اوحيدة عليك
زينب توحوح : اححح وينها الكرهبة راني مانشوف في حويجة
جميلة أشرت ع السيارة برأسها : هوينها قدامك
و ركبتها السيارة و طار بيهم سالم لمستشفى الجلاء ..
زينب دوب ماتتكلم متحشمة من سالم : صغاري يا جميلة .. اول ماتروحي جيبيهم عندك و وتيهم لمدرستهم مافيش منو بيهم غيرك .. بوهم ان شاء الله يفيق بعمره
جميلة : عارفة والله الا عارفة مش ناسيتهم غير خممي في روحك توا بس
ـــــــــــــــــــــــــــــــــــــــــــــــــــ
رجعت ليلى لدارها و اتصلت بمراد
مراد رد : ايوه
ليلى : اهلين
مراد : منو اللي جاكم في هالليل
ليلى : هادي جارتنا مسكينة بتجيب مالقتش من يرفعها رفعتها امي هي و سالم
مراد : وين راجلها خيره مارفعهاش هوا ؟؟
ليلى : مش عارفة .. هما حتى ماعندهمش سيارة
مراد سكت
ليلى : والله رعشتني حسيت حتى من سكري نزل
مراد : كولي حاجة حلوة نوضي
ليلى : وين بنلقاها توا في هالليل
مراد : تبي نجيك توا و نجيبهالك ؟
ليلى ضحكت : مراد هني روحك خيرك !!
مراد : والله عادي شن فيها .. عارفتيني عايش في الحوش بروحي مافيش من بيعرف اني طلعت
ليلى : و شن هي الحاجة الحلوة يعني
مراد : نجيبلك شكلاطة من اللي جبتها من إيطاليا
ليلى : مراد ليل توا
مراد خشت راسه الفكرة : هي اني جايك خوديها مني من روشن الصالون مش لازم تفتحي الباب
ليلى : مراد اكيد تبصر
مراد : مانبصرش هيا سكري ..
و سكرو الخط ..
بعد ربع ساعة وصل مراد لحوش ليلى و طق ع الروشن
ليلى ضحكت و ركبت فوق الكنبة و فتحتله
مراد ضحكلها و مدلها صاكو صغير معبي فيريرو : هاك شدي مني
ليلى خدتها منه : شن هادي كلها هلباااا
مراد : خلي منها حتى للعرس مش لازم تاكليها كلها يا جوريتي
ليلى ضحكت و فتحت طرف تاكل فيه : تخيلني ناكلها كلها
مراد : صحتين على قليبك يا قليبي
ليلى ضحكت و وكلاته طرف
مراد مدلها وردة جوري : عارف ان ورد امبكري سالم طيره من النية .. افرحي بهادي جوريتي
ليلى خدتها منه تشم فيها : أي حاجة منك و في أي وقت نفرح بيها حبيبي
و قعدت نص ساعة تهدرز هي وياه لعند ماصقعت و مراد روح
ــــــــــــــــــــــــــــــــــــــــــــــــــــ
بعد ساعتين في المستشفى .. 🌹
مقعمزة جميلة في صالة الانتظار تراجي في زينب شن يصير معاها
جاها سالم : ياام
جميلة شبحتله : ان شاء الله انت قاعد ؟؟ خيرك ماروحتش العفو
سالم : قعدت في السيارة متّكي قلت بالك تستحقو لشيء كيف نخليكم بروحكم و نروح في هالليل
جميلة : قالتلي الممرضة توا كيف دخلوها .. نقولك راي برا اربح يا وليدي اني هكي ولا هكي بنبات معاها تو كان لا قدر الله صارت حاجة نتصل بيكم ع الأرضي
سالم : هكي رأيك يمي !! متأكدة ماتبي شيء ؟
جميلة : مانبي شيء غير تعالالي بكري غدوا
سالم : باهي ان شاء الله .. تصبحي على خير
جميلة : قدامك كل خير
و طلع سالم من هني و طلعت الممرضة لجميلة بشرتها بأن زينب جابت بنية
جميلة فرحت : طيب فيها الحمدولله .. نقدر نخشلها ولا شنو توا يا بنيتي
الممرضة : مازال شوية لين نحولو الحالة لدارها و بعدين المرافقة تقدر تخش
