روايــة #حي_الزهور 💐
الحلقة السادسة
( بقلم مسرة أسامة )
نسرين قعمزت بحداها و قامتلها راسها : لكن انتي ماتقدريش تنكري ان هو بوك , يعني الا مايصير موضوع و تلقي روحك جايبة سيرته لازم تتقبلي الوضع كيف ماهو و ماتعدليش يا جوري
جوري شبحتلها : اني مانبيشي ولا نبي نسمع حتى اسمه هو و عيلته .. اكيد متزوج و مداير صغار و عايش حياة وردية لا يندري على بنته حية ولا ميتة , نسّوه في ليلى و في اللي كان بينهم
و شرين تليفونها لقاته سيف يعاود , سكرت عليه و دارت تليفونها مقفل
ــــــــــــــــــــــــــــــــــــــــــــــــــــــ
في حوش زينب ..
قعمز سيف في مكانه و قعد يعاود يتصل بجوري لكن تليفونها يعطي مقفل طلع من المربوعة يزربز يبي يوصل فيها
طبس على دار المعيشة لقي امه مقعمزة هي و جارتها جميلة يشوفو في البدلة الكبيرة متع العروسة
جميلة شادة الحولي : والله ماتقولي عليها الا فضة كاملة يا زينب مش باين انها نص
زينب : كان بودي ناخدلها حرير و فضة لكن انتي عارفة ظروف اشرف ياجميلة باهي يللي قدر يلايم روحه و بني حويشه فوق
جميلة : الفايدة في الهني .. غر كانها تطلعلك بنية حلال كله باهي
زينب : هذا اللي خايفة منه اني , أمها يا جميلة مش مرتاحتلها تحسيها اوحيّدة متع اكلوف
جميلة : والله حسيت بيها من اللقطة اللي دارتها في البيان كيف قعدت تلقح و مش محترمة حد غر مابيتش نقولك عليها و نغششك .. لكن مرات البنية باهية و خير من امها
زينب : ياحنه هو اختارها قال هي و بس و كيفه يبيها ماخصنيش فيه هذا اختياره
جميلة : و هوا هذا .. و ان شاء الله عقبال سيف و بنيتك نرجس تفرحي بيهم
زينب ابتسمت : سلمك و عقبال جوري حتى هي
جميلة : ههههههه يا حي .. اني غر نزوز الشيباني اللي عندي بعدين نفكر في جوري
زينب : اللطف شن كبّر فيه وليدك قاعد في عز شبابه
جميلة : شن مازاله ع الأربعين يا زينب كل ماندويله نبي نخطبله يقولي مازال .. المرحوم بوه لما كان في عمره جايب صغاره الثلاثة و حتى من سالم يقرا
زينب شبحت ولدها سيف لقاته يشوفلهم كلماته : تبي حاجة يمي ؟
سيف : ايه ندور على نرجس مالقيتهاش
زينب : اركب شوفها في حوش اشرف خليتها اضم فيه
سيف هز راسه بمعنى باهي و ركبلها فوق ..
ــــ
في حوش اشرف ..
نرجس واقفة تلمع في الرواشن من الغبرة , شادة التليفون في ايدها و فاتحة منه اغاني
فجأة يخش عليها سيف بدون مايدير صوت يلقاها شادة التليفون و مستمخة
سيف : هذا منين اللي ف ايدك
نرجس قريب ماتت : اه ؟؟؟
سيف : قتلك منين ليك اللي في ايدك ؟؟
نرجس لوحت من ايدها الطرف اللي تمسح بيه و سكتت
سيف قرب منها : تكلمي تليفون منو هذا ؟؟؟
نرجس خايفة : مش متاعي هذا متع بنية تقرا معاي في الكلية خلاته عندي
سيف فنص فيها : تي على من تمشي فيه ؟؟؟
نرجس عيونها دمعو وقلبها يدق : اقسم بالله ما ليا و حق ربي يا سيف
سيف بيشدها بيضربها : عديه ع الموشم يا كلبة مش على سيف ...
نرجس هربت منه و نزلت طلعت الشارع تجري , لقت باب حوش جميلة مردود دفاته و خشت
