روايــة #حي_الزهور 💐
الحلقة 15
زينب مشت لنرجس في الدار تجري : نرجس نوضي يا نرجس
نرجس مسكرة تليفونها و راقدة
زينب : نرجسسس
نرجس شبحتلها : نعم ماما
زينب : نوضي شوفي اشرف شن جابلي ياحليلي هي
نرجس استغربت : شن جابلك اسم الله !
زينب تضرب في فخادها من الرعاش : اشرف العاقل الباهي جابلي بلوة الله يعطيني سِلوه تسّلني
نرجس : تي قولي شن صاير رعشتيلي عظامي
زينب : جي و جابلي معاه بنت اوينه حاطها ف المربوعة
نرجس انصدمت : بنت !! .. بنت مني ؟
زينب : و اني وين ندري على بلاها بنت شكون .. كان ماتطلع صاحبته و هي اللي ذاهبتله شيرته على مرته
نرجس مصدومة : لالا مستحيل اشرف يدير عملة زي هادي
زينب : غر نوضي معاي نشوفوها اجميع
نرجس مصدومة : باهي غر وقفيني بس تو نلحقك
__________________
اشرف واقف ف عتبة المربوعة و يشوف لوفاء و هي راقدة
جاته زينب : ترا حول خليني نشوف المصيبة اللي نزلت عليا
و خشت للمربوعة انصدمت بالمنظر : نهار مغبّر فوق راسي
اشرف : شوفيها و افهمي شن قصتها ياام
خدت زينب شرشاف و غطتها بيه : اطلع برا خلاص تو نفهم منها و نقولك
اشرف طلع و قعمز في وسط الحوش وهو ساكت
زينب شدت وفاء من كتافها و حطت راسها تحت ايدها تفيق فيها
جت نرجس ادب بالشوية وهي تشوفلها
_____________
دخّل فراس موطوه لجنان حوشهم و ماصارلاش من الطلعة بيها
خش لداره غير حوايجه ؛ لبس توتة رياضية و سبيدرو و طاقية 🧢
و خدي فلوس في جيبه و طلع
يلقىٰ بوه ف الجنان كيف مروح كلمه : اه حاج كيف الأمور
حكيم : الحمد لله ، وين طريقك مناوبة اوه ؟
فراس تلخبط يبي يحكيله لكن مش قادر ف الأخير خصوصيات مراد
فراس : والله شن بنقولك ؛ فيه واحد اصحيّبي عزيز عليا يبيني نوصله لزوارة , اماليه غادي صارلهم ظرف و ماعنداش سيارة يمشي بيها
حكيم : عطيته سيارتك ولا سيارة خوك دبر رأسه بيها خير من طلوعك ف الليل بروحك مشي و جي
فراس : عادي يا حاج مادور شي غر ماتجيبش سيرة لأمي تعرفها كيف تنقنق قوللها إنّي مناوب الليلة ، اني خشيت و طلعت خت فت مابيتش نوريها وجهي
حكيم : باهي غر خليك على تواصل معاي لين توصل غادي و تولّي
فراس : ان شاء الله ..نبيك تشوف بنتك ياسمين قاعدة حاصلة في موضوعها راهو اكثر ما زاد تعقّد
حكيم هز رأسه : اصلا عارف من الأول ان جية البنت مش حتعقّب طيب ، غر مابيتش نصد ياسمين لأن حتنقلب علينا وقتها و ادير عمل أقوى من اللي داراته لصاحبتها
فراس : ان شاء الله خير .. هي ماتبي شيء يا بوي ؟
حكيم : سلامتك ، حل عيونك ع الطريق
فراس : ان شاء الله ، هي في امان الله
حكيم : في حفظ الله
اتجه فراس للقراج
و قعد حكيم واقف يشوفله و ساكت
خدي فراس سيارته من الچراج و طلع بيها درسها ع الرئيسي
نزل منها و رجع لزنقة جميلة وقف ف الانقولو يراجي في مراد و جوري و هو متوتر
_______________________
لبست جوري سروال جينز و بلوزة صيفية خفيفة لونها وردية
حطت وشاح على رأسها حطان و بدت تلم في حوايجها في الشنطة و تمسح في دموعها ع الساكت
جتها جميلة ؛ شدتها من كتافها بحنية و تكلمت : جوري .. اشبحيلي يا بنتي
جوري شبحتلها : اني والله ماراضية على طلعتي معاه ، يعني تفكرني بعد ما كبرت و هو حتى الشيب بدي يعبّي راسه لكن على خاطرك انتي يما بنمشي باش ماتشيليش همي اكثر مما كنتي شايلتيه
جميلة : بالله ماتحرجي مني عارفتيني الا لمصلحتك رضيتلك تمشي
لكن لو انتي ماتبيش اقعدي خلاص و اللي بيك بيا
جوري هزت رأسها بمعنى لا و سكرت شنطتها : خلاص توا فات فيا و قتله باهي ..
و تنهدت بوجع : الله يرحم ماما ليلى و يوسع عليها , كانها حية راهو مش هذا حالي
جميلة اتضايقت : شن فكرك فيها توا ؟ ماتأنبيليش ضميري يا وريدة تربحي
جوري : شن مانترحمش على ماما يعني ؟
جميلة حضنتها و بدت تبكي : الله يرحمها و يرحم أيامها
جوري لفت عليها ايديها و هي ساكتة و متضايقة ، واجعتها روحها و طلعتها من حنّاها
جميلة فتحت القجر و عطتها منه مصحف صغير : هاك شدي مني
جوري خداته منها و سكتت
جميلة : هذا خليه ديما في جيبك ولا شنطتك كلام الله حيحميك من كل سو و مكروه
جوري حطاته في جيب سروالها و قالت : حاضر
جميلة بدت توصي : ردي بالك على روحك باهي سلم بنتي ! .. وين بوك وين انتي ردي بالك تسيبيه لحظة رجلك على رجله لين توصلو مكانكم
جوري فوق من نفسها : ان شاء الله
جميلة : ردي بالك ترقدي قدام المكيف و انتي مش متغطية ولا اتدوشي و تجي قدامه و شعرك مبلول ، وصيتك ..
و ديما قبل ما ترقدي تأكدي من الغاز و الرواشن انهم مسكرين و و و ...
و استمرت في عطي النصائح
جوري بلا نية : حاضر يما
و لبست ف ظهرها شنطة جلد صغيرة متع كتفين ، حاطة فيها حاجاتها الخاصة
جميلة شدتها من وجهها : ربي يحفظك و يحميك و يعمي العيون عليك ياعيوني انتي
و باستها من خدودها
خدت جوري شنطة حوايجها تمشّي فيها بالعجل و طلعت لبوها ف الصالون
و جت جميلة و هي شادة في ايدها الجواز السفر متع جوري
جوري : اني واتية يا مراد
مراد وقف وهو يضحك من عيونه : هي مشينا
جميلة : خلاص بتتوكلوا
مراد : وقت علينا و فراس من بكري يراجي حتى هو عطلت عليه و الدنيا ليّلت
جميلة عطاته الجواز و حست بضيقة في صدرها ، شبحت لجوري و سكتت
جوري باستها و حضنتها : يماا جميييلة .. لو تعرفي قداش نحبك يما جميلة
جميلة : واني نحبك اكثر ياعيون جميلة انتي
جوري عصرتها عصر : جميييلة .. راني نحبك هلبا هلبا فوق مما تتصوري
جميلة استغربت في عصرة جوري ليها وشبحت لمراد لقاته يشوفلها و ساكت
فكرتها بموقف و عصرة بنتها ليها وقت جتها و هي حامل .. جت موتة ليلى بين عيونها
جميلة خافت : شن العصرة هادي يا جوري
جوري : ماتعرفيش الدنيا شن فيها ، لكن اعرفي إنّي بنستاحشك بقد الدنيا و مافيها يماا
جميلة قلبها بدي يدق : ماتخوفينيش عليك .. انتي الصيف الجاي بتكوني عندي و مانطلعك عروسة الا من حوشي
جوري باستها على رأسها و حضنتها ثاني : يماااا
جميلة ضمتها ليها بقوة : نعم يما
جوري عاصرتها و خدت نفس عميق : شكراً على كل شي درتيه ليا ..
شكراً لأنك خديتيتي و مالوحتينيش للميتم وقت اماليّا سيّبوني
