روايــة #حي_الزهور 💐
الحلقة الرابعة
( بقلم مسرة أسامة )
سليمان واقف يدخن في حاشية الزنقة و مخلي الحوش مفتوح ..
طلعت جوري شادة البمبلة في ايدها تتفرج و سليمان مايشوفش فيها
فجأة سليمان بدي يتعارك مع رجب السكران و قلب الشارع بالدوشة
جوري خافت.. بدل ماتخش الحوش طلعت منه و مشت تجري ع المرشبيدي حفيانة
وقفت ع الخرارة و تحرقها المغطة لانها سخونة من الشمس
وقفت في مكانها و بدت تعيط
على طلعة فراس من حوشهم سمع صوت العركة .. كيف ماشي يجري لسليمان و رجب لقي جوري تعيّط
زبطها انحرقت من المغطة مشالها يجري قامها في غمره
و قعد يدلكلها في قدامها بيديه : انحرقتي ؟؟
باهي خلاص أسسس
و فتح شيشمة الشارع يبردلها فيهم ❤️
جوري سكتت و قعدو دموعها يقطرو بلا صوت
فراس شبحلها و غسلها وجهها من الدموع
خداها و رفعها للحوش وقفها في العتبة و طق الباب
فراس : هي بري خشي الداخل ياجوري و معادش تطلعي بروحك
جوري خشت الحوش و هي ساكتة
سالم سمع الباب يطق جي يشوف : ايوه شكوون
فراس : اني فراس ياعمي سالم .. شفت سليمان توا يتعارك مع جارنا رجب و قالب الشارع بالدوشة
سالم لبس شبشبه و طلع يجري ..
ـــــ
سليمان شاد رجب من حوايجه يخضخض فيه و رجب يعافر فيه وهو سكران
رجب : اطلقني ياسليمان خير مانزبل معاك
سليمان يعيّط : نشوفك بتخنب سيارتي و تبيني نطلقك يا كلب ؟
رجب لسانه رزين و مش قادر يسند طول : تي اممما سياارة ياراجلل ... والللله ماصارررت .. اني صح صاااحب طااسة لكن ايدي مش طويلة
غمض عيونه و يحرك في صبعه بمعنى لالا : تؤتؤتؤ .. اني مش هكي لالالا
سليمان يضرب فيه : تكدبلي في عيوني اللي شافوك تخنب يا خناب يا حرايمي ؟!!!
جاهم سالم يفك فيهم من بعضهم : شن فيه انت وياه ؟
وشبح لخوه : خيرك تضرب فيه شن فيه ؟؟
سليمان : هالكلب لقيته يمكعل في باب السيارة بكاشيك السبولة يبي يخنبها
رجب ناض يعيّط : عقاب الوقت جيراني يخنبو فييا بيناتهمم !! .. يحسابوني حرايمي !! , يحسابوني مانخافش ربي !!!
سالم : باهي اس سكر فمك و اسكت الدنيا قايلة بلا عار
سليمان : ماتصدقاش يا سالم والله الا شفته يفتح في قفل السيارة ولما جيته نكر و قلبها عليا
قعد رجب يبرر و يعيط و خداه سالم يكركر فيه لحوشه
سالم : برا روح و فيق على عمرك ياراجل .. استغفر ربك و توبله لأمتى بتقعد هكي
رجب مشي معاه و هو يتمايل : حوول ايديك نعرف طريق حووشي برووححي
سالم : اسكت
رجب : والله يا سالم الا شكلك خاااطرك تتزوج مرا ثانيية هذا علااش ديما خلوقك ف حكة
سالم ماردش و وصل بيه لحوشه : افتح الحوش و خش هيا
رجب مدله المفتاح : هااك افتح انت
سالم خداه منه و جرب يفتح بيه : مايبش يفتح
رجب ضحك : اقلبله سنونه
سالم قلب المفتاح و فتح بيه : خش هيااا
و دفه الداخل و سكر الباب و روح
ـــــــــــــــــــــــــــــــــــــ
