روايــة #حي_الزهور 💐
الحلقة 13
بيلسان ابتسمت : بجديات تتأسف 😍
فراس : ايه .. نتأسف منكم ع اللي درته , لكن في الجديد لو بتكررو اللي صار مش حيصير خير
ياسمين : ووك مستحيل يتأسف بلوشي لازم يحطلك شرط
فراس ضحك : المهم صافي يا لبن ؟
ياسمين : حليب يا قشطة 😁
فراس ضربها بالمخدة و ناض وقف
ـــــــــــــــــــــــــــــــــــــــــــــــــــ
ثاني يوم 🌹
ساعة 08:00 ص
ناضو عمات فراس بكري هما و نعيمة بدو يوتو في الفطور
حليمة : وينهم بناتك يا نعيمة خيرهم ماناضوش اللطف
نعيمة ادير ف الدحي : مازال ماينوضوش توا تبيلك للعشرة ولا للحداش
افطيمة : حشم حالهم ينوضو قرب الظهر !!! تو نمشي انوضهم اني
طلعت من المطبخ و مشتلهم في الدار فتحت عليهم الضي : هيا نوضو يا بنااات !!
و تصفق في ايديها : هيا اوقفي انتي وياها فيسسسع
بيلسان انزعجت منها و غطت راسها بالشرشاف
ياسمين فاقت : نعم ياعمتي شن تبي
افطيمة : نوضي انتي و اختك شن راقدين لتوا اللطف
ياسمين شبحت للساعة : تي الساعة ثمانية يا عمتي عيب عليك
افطيمة : العيب عليا ولا عليك ؟؟ ماشاااااء الله ! عبينا عليك بنعطوك والله وانتي تترقدي للظهريات ..
تي نوضي فيسع نوووضي !! في مكان ماتوتي الفطور و تحوسي مع امك جاية و راقدة
ياسمين ناضت من مكانها بـ غل و طلعت و هي تنفخ : صبح يافتاح
افطيمة شبحت لبيلسان : نوضي حتى انتي ياسرك من النوم
و قعدت تنوض فيها و بيلسان نايمة في العسل ماتردش عليها لين افطيمة أيست منها و طلعت
حطو الفطور في الدار و قعمزو يفطرو مع بعض
خش فراس : صباح الخير
حليمة ابتسمت : صباح الخير و الهني
نعيمة : تعالى افطر
فراس قعمز : اعطيني قهوة بس
صبتله ياسمين قهوة و مدتهاله
نعيمة : حليمة مدي ايدك و كولي حاجة
حليمة : كيف خديت حبتي خلي نزيد شوية
افطيمة شبحت لفراس : شنو تخدم اليوم ولا لا
فراس : لالا راحة .. تبي حاجة ياعمتي
افطيمة : ايه قلت مادام حكيم مهناش خلي نروح و نولي انهيّر ثاني
نعيمة : اللطف عليك يا افطيمة شنو كان حكيم مهناش ماتجيناش ؟؟ اقعدي ونسينا والله فرحانين بيك حني
افطيمة : لا والله عندي ماندير يانعيمة خليني نروح نحوس على روحي قرب رمضان هو هذاكا
فراس : ان شاء الله كل سنة و انتي طيبة
افطيمة : وانت طيب ان شاء الله .. خلاص امالا مع ساعة طناش روح بيا باهي سلم ولدي اوه
ياسمين تاكل ف طن : و السبعة اللي عندك شن قاعدين يديرو خيرا مايجيش فيهم واحد
فراس و أمها فنصو فيها و افطيمة تكلمت : السبعة اسليّمتهم يتخادمو و مايفضوش كان المغاريب
فراس : اقعدي تغذي معانا علاش مروحة من الظهر
بدت افطيمة ادير في الجو متع لا و ما لا و هما اصّرو عليها تقعد
افطيمة : باهي كيف تبو
ناض فراس طلع من الدار و كملو العيلة فطورهم و ضمت ياسمين حوسة المطبخ
جتها افطيمة : شنو بتطيبيلنا اليوم
ياسمين : اكيد امي بتطيّب مش اني
افطيمة : لاااا اليوم غذانا مايكون الا ارزيزة قنينة من ايدياتك
ياسمين : ياعمتي اني مانعرفش نطيّب امسقي نعرف المبكبك و الطبايخ بس
افطيمة : طلعي البصل و تو اني نعلمك هي
ياسمين بتهرب : باهي خليني نضم الحوش و نجيك
افطيمة : تو تنوض اختك اضمه هيا خليك في الطنيجرة توا .. طلعلي البصل و اللحم فيسع
ياسمين تعفلقت و بدت اتطلع بالحاجة و هي ساكتة
