حي الزهور

الحلقة 18

روايــة #حي_الزهور 💐
الحلقة 18

شد سليمان حفنة من القزّه و لصقها على مكان اللسعة
و نرجس مستمرة في بكاها لين لمت عليها الناس يتفرجوا عليها
جتها مرا جنبها : خيركم اسم الله عليكم !
مرا ثانية : شن فيه لا باس !
سليمان شبحلهم و هو متوتر : حريق حريق .. غر وسعولنا الطريق بالله عليكم
و قام نرجس طلع بيها لسيارته ..
خدي تليفونه من قجر الفودره و اتصل بنسرين ...
و نسرين في الحمام ادوش ماتردش
سليمان تعفلق : يلعن ام الساعة اللي عبيت فيها عليك !!
نرجس تبكي : حي عليا كيف بنمشي لأمي يا سليمان
سليمان متوتر : اسكتيلي شوية يا نرجس
و رص على رقم امه و اتصل ...
_______

جميلة فاتحة ميعاد مع جاراتها و مش مركزة ع التليفون
لمحاته ياسمين تكلمت : خالتي جميلة تليفونك يشريّن
جميلة شدت التليفون : هذا سليمان ... شكله جي بيروح بينا
و بدت ادور بعيونها على نسرين : حي عليا وين الفرخة مشت !!
و ردت : الوو
سليمان : ايوه يام .. امتى تبي تروحي ؟
جميلة : امتى ماتبي انت .. حتى كان بتزيدنا شوية باهي ..
سليمان : نتصل بنسرين ماتردش وينها
جميلة خافت : اه ؟؟ نسرين ! شورها في الحمام ولا انظني تبدل في حويّجاتها .. تبيها ضروري ؟؟
سليمان : ابعتيلها اي حد يخليها تكلمني توا توا
جميلة : باهي كيف تبي
و سكرت الخط : ياسمين ! ترا بري دوريلي فرخة الربي وين مشت عمها يبيها ضروري
ياسمين وقفت : باهي يا خالتي حاضر
و ناضت من مكانها متجهة للعشة ..
بيلسان تبتسم لأم علي : آنستينا ابلة سليمة
سليمة متحشمة : الله يآنسك بنيتي .. والله الا عليوه حطني في موقف بايخ قدامكم
نعيمة : موقف بايخ علاش العفو ؟
سليمة : روح من خدمته قالي خاطري نديرو طلعة ع الشطيطة .. جينا هني و تلاقى مع صاحبه اشرف قالي بري هدرزي مع العويلة و خليني معاه ..
انتم جويرات و صاحبات مانبي نضايقكم
نعيمة ضربت ايديها فوق بعض : نهار بيض يا سليمة ليه عليك تقولي في هالكلام ، والله الا انستينا و كسبنا شوفتك و فرحنا بيك
سليمة ابتسمت و بدو الجارات يلخبطوا فيها بالكلام الحلو .. 😁
_________________

ياسمين مشت للعشة لقتها فاضية اتجهت للحمام النسائي و خشت

لقت وفاء واقفة قدام باب الدوش تعس لنسرين اتدوّش الداخل ...
ياسمين : انتو هني واني نقول وين اختفيتو !
وفاء شبحتلها : كيف كملنا عومان
ياسمين : نسرين يدور فيها عمها قوليلها تطلع
سمعتها نسرين طبست راسها : حي عليا نسيته !!
وفاء ضحكت : عبو عليك
لبست نسرين حوايجها بسرعة و طلعت تجري ..

____________

نرجس تعيط : يا سليمان رجلي يا سليماااان
سليمان علّى صوته : خلاص اسكتي عاد !!
نرجس : كان يشوفني اشرف معاك إلما يفرمني الله
سليمان سمع تليفونه يشريّن رد : انتي وينك يا بنت !
نسرين : سامحني يا عمي كنت ندوش
سليمان : اطلعيلي برّا المصيف توّا توا
نسرين : خيرك شن فيه
سليمان : اطلعيلي و بلا كثر كلام
و سكر سليمان الخط
نرجس تبكي : شنو صار يا سليمان رجلي توزوز فيا
سليمان تحرك بالسيارة و طلع متجه للمصيف اللي فيه العويلة
__________