روايـــة #حي_الزهور 💐
الحلقة الثالثة
( بقلم مسرة أسامة )
لبسوا النساوين الكبار فراريشهم و الشابات جببهم
خشو حوش العريس و خش مراد لعروسته باش يطلعها ..
لابس بدلة سوداء و طالع تقول غزيّل حتى هو
شبح لـ ليلى و عيونه قلوب : أخيرا يا ليلى
ليلى ضحكت : مبروك علينا حبيبي ❤️
مراد باس راسها : يباركلي فيك ياعمري 💗
و روح مراد بعروسته و هما اسعد اثنين في الدنيا 🌹
ـــــــــــــــــــــــــــــــــــــــــــــــــــــ
بعد مرور سنتين ✨
في نهاية 1993🌹
وصلت ليلى حوش أمها هي و مراد و نزلت من السيارة حاطة ايدها ورا ظهرها و مرزنة
مراد جاها و لف ايده وراها و خشو لجميلة مع بعض ايديدش فيها
شبحهم فراس من بعيد و هو يتعارك مع صغار الشارع
جميلة جت تستقبل في ليلى و مراد : مرحبتين مرحبتين .. انستونا
ليلى باستها و حضنتها : جميييييييلة .. لو تعرفي قداش استااحشتك ياجميلة
جميلة : واني مستاحشاتك اكثر ياعيون جميلة انتي
ليلى عصرتها عصر : جميييلة .. راني نحبك هلبا هلبا فوق مما تتصوري
جميلة استغربت في عصرة بنتها ليها وشبحت لمراد بمعنى خيرها
مراد ابتسملها و سكت
ليلى وخرت من أمها : كيف حالك ياام
جميلة حطت ايديها على خدود ليلى : فرحانة بيكم و بشوفتكم .. كيف حالك انتي و حال البيبي
ليلى حطت ايدها على بطنها و ابتسمت : اهو شوفة عينك الحمد لله
جميلة : ربي ينوضكم بالسلامة و نفرح بيكم
ليلى : يارب
و خشو معاها الداخل ..
ليلى نحت كبوطها و شبحت لمراد : مراد اني اليوم بنبات عند امي
مراد استغرب : شن خطر عليك توا ماقلتيش امبكري وقت سألتك
ليلى قعمزت ع الصالون داهشة : هكي خطرلي نبات الليلة و نرقد معاها حاسة روحي مش طايقة حوشي
جميلة ضحكت و جت حطت ايدها ورا كتف ليلى : مرااد !! .. شكلك مزعل بنتي و داس عليا
مراد : و اني نقدر على زعلها يا حاجة اهي قدامك و اسأليها
ليلى : اي يمي و انتي قلتيها ... قلب الام كيف يحس يا ناس سبحان الله
جميلة خافت و شبحت لمراد : مراد انت شن مداير لبنتي
مراد مصدوم : والله اني بروحي مافاهم يا حاجة ...
و شبح لــ ليلى : ليلى شن اللي تقولي فيه هذا ؟؟ خيرك ؟؟
ليلى بدت تبكي : كل يوم يزعل فيا يمي و يخلي فيا نرقد و دمعتي على خدي ماتقوليش عليا حامل و نحس في دي الوحم اللي ماسيبنيش شهور
مراد فتح فمه : اني ؟؟؟ امتى صار الكلام هذا والله مافي منه بكل
جميلة : غير اصبر انت شوية و خليني نفهم منها
و شبحت لـ ليلى : كيف يزعل فيك احكيلي قدامه تو
ليلى تدلع : كل ليلة قبل مانرقد لازم مايجيبلي هذيكا طاسة الحليب فيها كاشيك عسل و ينكد عليا , يبدأ يحلف و يقسم الا مانشربها .. و اني عارفتيني مانحباش يمي ولا نحب ريحته ☹️
جميلة قامت حواجبها و شدت ضحكتها : ايه و شن تاني
ليلى تشكي : و لما يلقاني نضم ولا نسيق يقعد يعارك و يكشخ عليا .. و اني عارفني مانتحملش حد يعلي صوته عليا ياسرني سالم
جميلة شبحت لمراد و سكتت
مراد يبرر : اني يا حاجة و الله الا من خوفي عليها و هي ماتسمعش في الكلام .. نروح من العمل نلقاها شادة هداكا القردل و طايحة في الحوش تسييق ولا شادة المكنسة الحرشة و تكنس في البساطات بجهد جهدها .. جيتها بالكلام مانفعش فيها جيتها بالمسايسة حتى هي شي شي
جميلة : باهي جبتلها شغالة و خلاص يا مراد كيفك ماتبيش تحركها
مراد شبح لـ ليلى : ردي عليها انتي
ليلى من راس خشمها : جابها و لزيتها
جميلة : العفو ؟ فيه وحدة تلز الراحة من حوشها و تشقي روحها
ليلى علت صوتها : تبيني ندخل مرا غريبة في الحوش باش تحط عينها على راجلي و تخش بينا يمي ؟!!!
مراد : و اني نقدر نشوف لغيرك يا ليلى ؟
ليلى : كلكم الرجالة هكي تقولو و لما المرا تتطلق ولا تموت تاخدو بعدها على طول
جميلة : عيب هالكلام يا ليلى صوابع ايديك مش كيف بعضهم
ليلى : المهم اني بايتة هني اليوم
جميلة ضحكت : امالا نخليكم بروحكم و رضي مرتك انت يا مراد
و طلعت من جنبهم
مراد شبح لـ ليلى و جي قعمز قدامها ركبة و نص
ليلى شبحتله و عيونها مدمعات : ماتحاولش تقنعني اني نروح معاك اني اليوم نبي امي
مراد : يرضيك هكي تحشميني قدامها ؟
ليلى : حتى انت تزعل فيا و مش حاس بروحك
مراد باس ايديها : مش عارفتيني من خوفي عليك هكي نتصرف ؟؟ .. علاش ماتبيش تفهمي انك مرات تجيبي قبل موعدك و الحركة و المجهود الزايد يتعبك
ليلى : اني هكي نرتاح انت مالك و مالي ؟
مراد : كيف مالي و مالك .. مش مرتي و حبيبتي و ام بنيتي
ليلى سكتت
مراد : من حقي نخاف عليك راني مانتحملش فيك دقة الشوكة ...
ليلى : تبي راحتي يا مراد اني هادي راحتي خليني عند امي نبي نقعد عندها
مراد : قداش بتقعدي يوم ؟
ليلى علت صوتها : تي اليوم بس و غدوا بنروح !!!
مراد ضحك
