روايــة #حي_الزهور 💐
الحلقة 11
( بقلم مسرة أسامة )
قبل القراءة : نحب نعتذر من كل حد راجى الحلقة لتوا و صبر عليها , السبب ان القصة معاش قدرت نكملها بكل ☹
كل مانجي نكتب مانقدرش نرتب سطرين على بعضهم مافهمتش علاش , لدرجة حتى النت ماعادش نفتح فيه
لا قدرت نعتذر منكم و نوقفها ولا قدرت نتمها و انزلها لكن اصّريت على روحي اني نكتب و انزل على عيون اللي يراجو فيها
و حنعوضكم بحلقتين اليوم
قراءة ممتعة 🌹
مراد يعارك : انت كيف توثق فيه يا بوي و تعطيه البنت و الشقة ؟
الفيتوري : لأن الولد واضح شاريها مش يلعب عليها و بعدين هذا لمصلحتك مش تبي البنت تولي لأحضانك ولا ؟
اصبر و تو مايصير الا اللي تبيه
مراد : اني مارتحتلاش نحس فيه خاش على طمع
الفيتوري : المهم ان بنتك تردلك يا مراد ماتبداش اتطلع في الرز عظام .. كانها البنت تحبه و تسمعله تو يأثر عليها و يقنعها تجيك
غر انت صبر بالك و سبيتة سبيتة ع المواضيع
مراد سكت و دار ايده على لحيته يخمم
ـــــــــــــــــــــــــــــــــــــــــ
روح سيف للحوش و خش لأمه فرحان : يااام ؟ يمااا !! .. وينك يام ؟؟
جاته زينب من الدار تجري : اسكت عندي نساوين حشمتني
سيف : باهي وين نندري اني
زينب : شن تبي فيا تنادي ؟!
سيف يضحك : اليوم الدنيا ضحكت لولدك يمااا
زينب ضربت ايديها فوق بعض : كيف ضحكتله دغدغها ولا شنو ؟
سيف : حصلت شقة ملك ياام 😍
زينب عقدت حواجبها بإستغراب : شقة ملك ؟ منين ليك هالشقة !
سيف : حصلتها من عم واحد صاحبي , حالته متريحة و قالي نبيعهالك بالتقسيط كل شهر الف لمدة عشرة سنين
زينب : و هو في حد يصبر ع الثاني عشرة سنين ؟ خصوصا في الفلوس !!
سيف : نقولك حالته متريحة يام فوق الريح .. تي بفلوسه يشري حوشنا و يشري معاه الحي كله و على عيون اصحيّبي اوثق فيا و عطاهالي بالتقسيط
زينب فرحت : باهي الحمدولله كان هكي , الف مبروك عليك
و ناضت تزغرط
سيف يضحك فرحان : الله يبارك فيك يام .. توا سالم معاش عنده عذر بري توا قولي لجميلة ع اللي صار باش نفضّو ف البنت وقتي
ـــــــــــــــــــــــــــــــــــــــــــــــــ
بعد مرور أسبوع 🌹
في حوش نعيمة ❤
04:30 م
مقعمزة نعيمة اطيّب في شاهي بالعالة و جنبها بنتها ياسمين
ياسمين : غر خليني نمشيلها يا ماما سويعة بس و نجي حالتها مسيكينة تقطع القلب تقولي بيقتلوها مش بيزوجوها
نعيمة تكشكش في الشاهي : منو اللي بيرفعك خوتك و بوك مهناش
ياسمين : نمشي اني و بيلسان بسيارة رياض
نعيمة : و انتي من امتى تعرفي تسوقي باش حتى بتطلعي بروحك
ياسمين : مش رياض يعلم فيا قداش ليه ؟ خلاص تعلمت و بديت نعرف نسوق .. غر بالله عليك خليني نمشي و نجي
نعيمة : امالا عابية بتطلعي من غير ماتشاوري بوك ؟ ايه باهي والله باش ياكلّي وجهي
ياسمين : تو نتصل بيه و نقوله اني
نعيمة : هونا كان خلاك تمشي مانشدكش المهم ارفعي معاك اختك ماتمشيش بروحك
ياسمين : به غر راك تجيبي سيرة لفراس
نعيمة سمعت الباب : نوضي شوفي الحوش شكلها عمتك حليمة جت
ياسمين : قصدك عمتي جاية اليوم ؟ مبردها هي و بنتها كان نندري عليها جاية راني من بكري قلبت وجهي
نعيمة فنصت فيها : تحشمي راهي عمتك اخت بوك
ياسمين : والله هذا الحق يا ماما عمتي باردة و لسانها طويل
نعيمة : نوضي حلي الحوش خير مانحلفك ع الطلعة نوضي
مشت ياسمين تفتح في الحوش و هي تنفخ
فتحت الباب لقتها حليمة بروحها سلمت عليها و خشت معاها للجنان
حليمة : شنو راقدين ؟ من بكري نطق و مافتحلي حد قعدت واقفة بروحي زي الشحاتة
ياسمين : ماسمعناش شورك دوب مااتطقي يا عمتي
حليمة : من بكري انفلّق شوركم انتو اللي راقدين
ياسمين : بنرقدو توا قرب العشية !
و شبحت في ايدها ساكّو صغير : شكلك بايتة عمتي
حليمة : ايه قلت نقعد نهيّرين ثلاثة مستاحشة وخيي و صغيويرته
ياسمين تكنطت : مرحبتين بيك
دخلتها الداخل لنعيمة و اتجهت لدارها , لقت بيلسان واقفة ع المراية و تمكيج
ياسمين : عمتك متع الشياطين جت
بيلسان شبحتلها : مش وقت جيانها اليوم
ياسمين : خوديلك تو كله بالباء و التاء تفترشه للعيلة
بيلسان : شن قتلك ماما ع الطلعة
ياسمين فتحت دولابها : قالت باهي , اسمعي بنلبس عباية بس و عندك نص ساعة نراجيك فيها ف السيارة سدتكم باهي ماسدتكمش بنخليك و نروح
بيلسان : هو اول موعد نديره في حياتي تبي اتذليني بيه ؟
ياسمين : طالعة بسيارة مش ليا و زيادة من غير رخصة و من غير شور بابا و فراس , تبيني نخليك سنين فسط المطعم ؟
بيلسان : ماصارلكش من المشي لوفاء ؟
ياسمين : مش ماشية .. قلت لماما هكي و خلاص باش تخليني نطلع
بيلسان خدت وشاحها : باهي مليح
لبست وشاحها ع المراية و لبست ياسمين عبايتها و وشاحها و طلعو مع بعض لسيارة رياض
ولعوها و قعدو يراجو فيها تسخن
بيلسان شافت اشرف خاطم : حي على امه اشرف
ياسمين : وينه
بيلسان : اهوا جاي
ياسمين شبحتله و اشرف قام ايده و طلق السلام
بيلسان : حي علينا مشي وصلها لفراس سخونة
ياسمين : لالا مش حيقول
بيلسان : شن عرفك انه مش حيقول
ياسمين : اشرف تحسيه مش فتفات و مايتدخلش في أمور ماتخصاش
بيلسان : به تو نشوفو
فتحت ياسمين تليفونها و اتصلت برياض ..
بعد شوية رياض رد : ايووه
ياسمين : شن الجو
رياض : مليح
ياسمين : انت طالع مع سيف ولا
رياض : ايه علاش تسألي
ياسمين : بنقولك إنّي خديت سيارتك باهي
رياض : حي على امك مازال بكري ع السواقة بروحك ليك أسبوع بس تتدربي
ياسمين : لالا ماتخافش الأمور هانية نقدر نسلك روحي
رياض : وين طريقك انتي
ياسمين : مش بعيد مشوار ساعة و جاية بناخد حاجة
رياض : بالله عليك شدي يمينك و خليك ع ال40 و راس وخيتي
ياسمين : بااهي حاضر
رياض : ماشي سلام
ـــــــــــــــــــــــــــــــــــــ
