روايــة #حي_الزهور 💐
الحلقة 17
نرجس مصدومة : قصدك صاحبتك هي نفسها ياسمين ؟؟؟
و شبحت لنعيمة و نعيمة ساكتة مش قادرة تنطق بحرف
جميلة : تي شن فيه يا ناس مافهمت منكم شيء !!!
زينب تشوف لوفاء : مش قلتي صاحبتك اسمها يزة ؟
وفاء : اسمها ياسمين يا خالتي 😢
زينب تخبط في رجليها : يرزيني في الهم
جميلة : تي وحدة فيكم تتكلم هادي شكوون ؟؟!
ياسمين : هادي وفاء صاحبتي هي نفسها اللي عند خالتي زينب
جميلة شبحت لزينب : مش قلتي بنت وحدة صاحبتك يا زينب ؟!!
زينب تسحن : يعطيني مايسحن كبدي
و شبحت لوفاء : تكلمي انتي يا وفاء ... هادم جاراتي و زي وخياتي ماتخافيش منهم
شبحو لبعضهم وفاء و ياسمين و بدو هما الزوز يسردوا في القصة .. ✨
_______________________
مقعمز فراس في القسم متعه يقرا في ورقة و هو يشرب في قهوته و بجنبه مساعدته حسناء
حسناء تشوفله : نجيبلك فطور دكتور !
فراس و هو عيونه في الورقة : لالا منورة
حسناء : وجهك يبان اصفر
فراس شبحلها و ضحك : اصفر ! فكيني من جو أمي لا اصفر لا شي
حسناء : والله جديات شكلك معادش تاكل كويس يا اما تخمم ف شي
فراس : لالا هانية الأمور
و شرين التليفون جنبهم ردت عليه حسناء
فراس حط الورقة و ناض وقف كيف بيطلع : اني بندير طلة ع المرضى لو فيه شي كلميني
حسناء سكرت التليفون : دكتور راهو جاتك حالة مستعجلة
فراس : حالة شنو
حسناء : حالة تبي الكشف و احتمال تكون ولادة مبكرة
فراس : باهي ان شاء الله خير
اتجه لإسعاف و وراه حسناء
كشف ع المريضة و شبح لزوجها : لازمها عملية مستعجلة و الا العيل حيشرب الميّه و يموت في بطنها
زوجها تأثر : لا حول ولا قوة الا بالله
بدت الحامل تبكي و هي شادة في ايده : حي عليا كان ماوليدي يموووت !! كان هذا مانبيش نديرها العملية
زوجها يهدي فيها : استهدي بالله ياعيوني .. راهو العملية لصالحك و لصالح وليدنا انتي سمعتي الدكتور شن قالك
مرته : افرض واحد مننا يموت كيف بدير انت ؟
فراس : بعيد الشر تفائلي خير يا مدام الحالات هادي ديما تصير و بنسبة كبيرة
زوجها شادلها ايدها : توكلي على الله و ديريها ، و بإذن الله تنوضولي انتو الزوز بالسلامة
و قعدت الأم تبكي و راجلها يطمن فيها و يطبطب عليها
قعد فراس يشوفلهم و هو مبتسم عاجباته حنية الراجل على مرته و اهتمامه بيها ( قعد يخزن في راسه )
شبح لحسناء و تكلم : خليهم يجهزوا الحالة و يوصلوها لحجرة العمليات
و طلع برا من الغرفة
شبح يساره بعفوية يلمح سارة مرت اشرف مقعمزة في الممر و تراجي في دورها قدام غرفة دكتورة نساء
استغرب فيها ؛ كيف بيمشي يدوي معاها ..
ناضت و خشت الغرفة من غير ماتشوفه
فاتها فراس و مشي يوتّي في روحه للعملية
________________________
((( ملاحظة للقراء : الصفحة الرسمية لرواية حي الزهور صفحة روايات القمر الوردي على الفيس بوك .. كل من يقرا فيها صفحات او تطبيقات ثانية غير الفيسبوك تعتبر منقولة
و ياريت تركزوا على نهاية كل حلقة لو مافيش كلمة يتبع معناته الحلقة ناقصة و تلقوها كاملة في الصفحة الاصلية )))
مسرة أسامة 🌹
