Unicode
[ အဝတ်တွေ လျှော်ပြီးပြီ။ ခြောက်သွားတဲ့ အဝတ်တွေကို အခန်းအပြင်မှာ ချိတ်ထားခဲ့တယ်။ အိပ်ရာနိုးရင် မနက်စာစားဖို့ အောက်ဆင်းခဲ့ ]
ရွှီကျယ် အိပ်ရာနိုးလာသောအခါ နာရီကြည့်ရန် ဖုန်းဖွင့်လိုက်သည်။ဖန်သားပြင်ထက်က ထိုမက်ဆေ့ကို ပထမဆုံး မြင်မြင်ချင်း သူ ငေါက်ခနဲ ထထိုင်လိုက်ချိန် ၊ နာကျင်မှုကြောင့် ပင့်သက်ရှိုက်မိသွား၏။
ရွှီကျယ် သည်အနေအထားအတိုင်း ခေတ္တမျှ တောင့်တင်းသွားခဲ့သည်။မိမိအခြေအနေက အရက်နာကျနေပါသည့်သဖွယ်။မရင်းနှီး ၊ မကျွမ်းဝင်သော အိပ်ရာထက်ဝယ် အဝတ်မကပ်စွာ နိုးထလာခဲ့ရလျက် ဦးနှောက် အလုပ်လုပ်မှုက နှေးကွေးလေးကန်နေသည် --- မှတ်ဉာဏ်များက အရောရောအထွေးထွေး။မနေ့က ရွှီကျယ် ရေချိုးခန်းထဲတွင် သူ့ဘာသာသူ လျှော်ဖွတ်အခြောက်ခံရန် စီစဉ်ထားသော အဝတ်အစားများကို အကြင်သူဟာ အခန်းထဲက ထွက်စဉ် တစ်ပါတည်း ယူဆောင်သွားခဲ့သည်ပေ။
ရွှီကျယ် အိပ်ရာပေါ်ကနေ လေးလေးဖင့်ဖင့်လေး လျောဆင်းလိုက်သည်။မွှေးပွပဝါကို ခန္ဓာကိုယ်၌ ကောက်ခြုံ၍ တံခါးကို ဟသည်ဆိုရုံလေး ဖွင့်ကာ အဝတ်များအား အထဲသို့ ဆွဲသွင်းလိုက်သည်။ရွှီကျယ့်ခမျာ ခြေလှမ်းတစ်လှမ်းကိုပင် အနိုင်နိုင် လှမ်းနေရသည် --- သူ ရေချိုးသန့်စင်ပြီး အခန်းထဲတွင် ခဏတစ်ဖြုတ် လမ်းပတ်လျှောက်လိုက်ပါမှ နည်းနည်း ကျင့်သားရလာခဲ့၏။
ရွှီကျယ် စောင်ကို သပ်သပ်ရပ်ရပ် ပြန်ခေါက်ပေးလိုက်သည်။၎င်းနောက် အိမ်အောက်ထပ်သို့ တံခါးဖွင့် ဆင်းခဲ့သည်။လုဟယ့်ရန်ရဲ့အိမ်က ကြီးမားသည် ၊ ကျယ်ဝန်းသည် ၊ တိတ်ဆိတ်သည်။လှေကားခွင်၌ ဆီးကြိုစောင့်ဆိုင်းနေသော အိမ်တော်ထိန်းက ရွှီကျယ့်ကို ထမင်းစားခန်းဆီ လက်ဟန်အမူအရာ ညွှန်ပြလာသည်။ရွှီကျယ့်အနေနှင့် ယင်းအပြုအမူကို အသားတကျ မခံယူတတ်သည်မို့ အိမ်တော်ထိန်းအား အကြိမ်ကြိမ် ခေါင်းငုံ့အရိုအသေပေးရင်း ခပ်တိုးတိုး ကျေးဇူးတင်နေခဲ့သည်။
