Unicode
နွေရာသီ စခန်းချခရီး လဝက်ခန့်အကြာ ကုယွင်ချီက ဆက်မနေချင်သဖြင့် အိမ်ပြန်ရန် စီစဉ်သည်။ဟယ့်ဝေ့နှင့် လုဟယ့်ရန်တို့ပါ ၂ ရက်တာ အားလပ်ရက်ယူ၍ သုံးယောက်သား အတူပြန်လာခဲ့ကြသည်။
လေယာဉ်က မနက်အစောပိုင်း ဆိုက်သည်။လုချန်ယွီနှင့် လုချင်းမော့သည်လည်း ထိုနေ့တစ်နေ့တည်းတွင် ပြန်လာခဲ့ကြသည့်တိုင် သူတို့ စီးနင်းကြသည်က အာဏာပိုင် အထူးသီးသန့်လေယာဉ် ဖြစ်သည်။
အိမ်ရောက်သည်နှင့် လုဟယ့်ရန် ရေမိုးချိုးကာ တစ်နာရီဝန်းကျင် အိပ်လိုက်သည်။အိပ်ရာနိုးလျှင် နေ့လယ်စာ စားပြီး ကားမောင်းထွက်ခဲ့၏။လုချန်ယွီနှင့် လုချင်းမော့တို့က လေယာဉ်ဆိုက်သည့်နောက် ကိုယ်စီ လုပ်ဆောင်ရမည့် အလုပ်များစွာရှိသည်မို့ အိမ်ကို ညနေစောစော ပြန်လာကြလိမ့်မည် မဟုတ်။
ယနေ့ ရာသီဥတုက ထူးထူးခြားခြား ပူလောင်အိုက်စပ်နေရာ လမ်းမပေါ်ဝယ် လူသူကျဲပါးလှသည်။လုဟယ့်ရန် ကားကို ပုံမှန်အရှိန်ထက် ခပ်မြန်မြန် မောင်းနှင်နေသည်။မိနစ် ၅၀ ကျော် ကြာမြင့်သောအခါ သူ လမ်းမကြီးဘေးက သစ်ပင်များအောက် ကားထိုးရပ်လျက် ကားမှန်ပြတင်းတစ်ဖက်ခြမ်းက လမ်းသွယ်ဆီ လှမ်းကြည့်လိုက်သည်။
ဤလမ်းက မြို့တော်အနောက်ဘက်ရဲ့ အဝေးပြေးလမ်းမကြီးထွက်ပေါက်နှင့် သင်္ဘောဆိပ်ကမ်းမှသည် မြို့တော်အတွင်းသို့ ဝင်နိုင်သည့် တစ်ခုတည်းသော လမ်းဖြစ်ချေသည် --- ပတ်ပတ်လည်၌ အများဆုံး ဝန်းရံနေသည်က ကားပြင်ဆိုင်များနှင့် ခရီးဝေးထောက်ပံ့ပို့ဆောင်ရေး ကုမ္ပဏီများ။
ကားပြင်ဆိုင်များက လမ်းမဘေး ညာဘက်ခြမ်းတွင် မျက်နှာမူဖွင့်လှစ်ထားသည်။လက်ဝဲဘက်ခြမ်းရှိ ကားပြင်ဆိုင်တစ်ခုအရှေ့၌ ပင့်တင်စက်နှင့် အပေါ်မြှင့်ထားသော SUV ကားအောက်ဝယ် ခြေထောက်တစ်စုံက အပြင်ဘက်ကို ထိုးထွက်နေသည်။ ၁၀ မိနစ်မျှ ကြာသော် ထိုခြေတံများက ကွေးညွှတ်သွား၍ ကားအောက်ကနေ စကိတ်ဘုတ်ပြားတစ်ခု လျှောတိုက်လှိမ့်လာသည် --- အယ်လ်ဖာက စကိတ်ဘုတ်ပြားထက်တွင် ပက်လက်လှဲနေ၏။သူ မတ်တပ်ရပ်ကာ လက်ထဲက ပစ္စည်းကိရိယာများကို တန်ဆာပလာဘူးထဲ သိမ်းသည်။
