"بـسمه تعالى"
أرث بالدم
فدك فاطمة
ورقه ما بين الدفاتر ضيعيتج
لحضه وبساعات باجر ضيعيتج
فره وبدولاب داير ضيعيتج
نفس بالاف جكاير ضيعيتج
أنـصاف
الجو أواخر الشتة هوة بي نسمة باردة تمر تحرك الاشجار وياهة و الورد بالحديقة يتمايل اخذت نفس براحة و زفرتة
فتحت ابواب البلكونة الفوك حتى يتغير الجو بالبيت نزلت حضرت الريوك بعدهة الساعة بالخمسة محد
گاعد
لازمة جهازي احجي وية صديقتي شلت الريوگ خليتة على الطاولة احضر بي للولد فترة و گعدو اهلي
نزل بابا لازم جنطتة بأيدة ماما وراه تعدل بسترة و تمسح على جتفة نمحت ملامحها البشوشة من لاگاهم برهان بالصالة
لابس بس التراك الخاولي على ظهرة خليت ايدي على راسي من صارت الرزايل و قصف الجبهات مشامر بينهم
بابا اخذ اغراضة و طلع مامهتم صبحت عليه ما رد تجاهلت الوضع لان متعودة نزلو الولد بدت هوسة الدومات
اجت خالة جيداء حضرت الاكل الهم عمتي سعادة و ماما متصافات يغثن بيهة و يحجن على ميسر بس هي ما ترد مبين مامركزة وياهن
اخذت الاكل وراحت گمت رايحة وراهة : خالة اني اصعد الاكل لميسر روحي يم جدو
جيداء:اي فدوة اروحلج خالة خليها تاكل شلعت گلبي من غدة أمس مامخلية شي بحلگها
أنصاف: بعيوني هسة اصعد اخليها تگعد مثل الورد
صعدت فوگ فتحت الغرفة ثلج طفيت السبلت مخبلة هاي البنت تريد تموت خليت الاكل على الميز
رحت فتحت البردة و شبابيك انتشر الضوة بيهة تمللت ميسر رفعت راسها عاقجة وجهة مزعوجة
أنصاف:يالله حبيبتي گعدي كافي نوم
ردت بصوت مبحوح و تعبان: عوفيني فدوة ماعندي حيل و طاقة
أنصاف:شوفي الجو شلون يخبل راح اقرب الطاولة يم الشباك نتريگ سوة
عقجت وجها من سمعت طاري الاكل حاولت اسويلهة واهس خليت الطاولة قريب على شباك رتبت الريوگ عليها
عيونها علية واضحة الضوجة بملامحها وخرت البطانية سحبتها من ايدها : تعالي يالله ازعل اذا ما اكلتي
ميسر:تدرين بية ما اشتهي
أنصاف:ادري بيج راح تصيرين هيكل عظمي شبيج حابسة نفسج و گاطعة الاكل ما تسوة الدنيا
أنت تقرأ
أرث بالدم|| باللهجة العراقية
Romanceالى ... بيـوت من السم و قصور من عرش القسوة و كوكب من التائهين و نصل أسمر يخترق خواصر الجميلات رواية أرث بالدم حيث تصور جشع النفوس
