THE JAMAICAN ARTISE PA

JADA POV:

Wid the whole Christmas season a tek ova mi did busy with helping mummy clean and decorate and also wid work . Mi eventually decide seh even if mi and Andre deh on a break am not going to let it affect my work suh mi still do what mi supposed to do as him PA and help him prepare fi him show dem and confirm all dates a him bookings , the only thing mi doh do a guh wid him to any a him events dem .

Now that the pregnancy a develop more , morning sickness become a regular thing and tiredness but, despite eh changes weh mi body aguh through mi did still excited fi experience everything else. One Friday evening as wi a eat dinna, mummy tell mi seh Janell ,one a mi cousin dem, a get married inna January and she a come dung from Florida Christmas suh she can spend the holiday wid we and deliver eh invitation dem harself .

" wow , and me just a hear bout this ? How long now since she engage?"

" bout a year , the white man weh she a married have money enuh and she seh him treat har good " mummy reply.

A mean, mi know seh she did engage because mi and har close and she did post up har engagement picture dem when it happen last year summer but, mi neva know seh a next year she a married .

" suh Christmas and then wedding? that sound nice " Kerry seh and judging by how she a smile , mi know she already a plan how she aguh look and eh picture dem weh she aguh tek.

" she tell yuh where inna Jamaica she a get married mummy?"

" no mi love , a guess when she come she will mek the family know everything and a think har fiancé a come wid har to "

" a mean him most likely come , unless she a plan fi come dung alone , spend Christmas wid the family and then guh back ova and come back dung fi the wedding "

" a mean apart from eh time when dem did come dung and spend three week a some hotel , and have dinner wid wi a the restaurant, wi nuh really know him but, a the end a the day a fi har life enuh, a she know wah best fi she " mummy seh and mi nod because that a true .

Afta dinna , mi did just about fi guh watch wah movie wid Kerry when Andre call mi and tell mi seh him outside a the gate inna him car suh mi mek mummy know and then mi guh out guh meet him .

" how yuh feel?" Him ask when mi come inna the car and lock the door .

" Andre , mi alright. Yuh nuh supposed to deh home now , a get some rest? todeh a Friday and yuh do four different events this week and yuh have one more tommrow, not to mention the others weh yuh have booked inna other countries ".

" mi good , nuh worry yuh head bout mi an rest . Anuh like sleep a sumuh weh mi cah even get when yuh nuh deh weh mi deh " , him leaned back inna the car seat and ask " weh yuh do todeh?"

" yuh a ask mi how mi spend eh day?"

" yeh, sumuh wrong wid that?" Him look pon mi and mi couldn't help the way how mi instantly get hot just by eh intensity a him gaze and him smell really good to , as always but, dah cologne here different, it stronger .

" mi just guh inna town fi get couple things, and then mi send off eh file weh Adrian ask mi for and just relax until evening when mi help mummy cook . Oh and mi schedule wah appointment wid a doctor suh wi can guh next week Monday fi do a check up , just fi ensure seh everything alright wid the baby" .

" ah".

" by the way, mi a tell yuh from now , yuh a contribute something towards the Christmas dinna, not money" mi send him wah stern look when him open him mouth fi respond cause mi just know a that him about fi seh but, him shake him head,
" neva did aguh mention nuhun bout money . Tell yah a ready seh mi like cook , just affi guh find sumuh suitable".