THE JAMAICAN ARTISE PA

TWO PART POV:

JADA POV:

Mi coulda hear eh Christmas music a play before wi stop a the gate fi mummy house .  Almost everybody did reach but, two a mi aunty dem did still deh pon dem way. When mi and Andre walk up eh drive way and guh pon the verandah mi cousin dem and mi aunty  who name Jody smile when dem si Andre and a pure hug up and questions gwaan but, mi use eh excuse fi guh put dung eh food weh wi bring suh mi neva did haffi ansa too much.

" Then this look good eeeh " mummy seh when mi come inna the dinning room and put down the mac and cheese and Oxstail on the table wid the other food dem.

" Andre mek dem " .

  " wow , neva know him like cook? dem kind a man deh rare now a days " she seh and mi smile agreeing with her .

" suh how yuh nuh come greet mi properly?" Mi hear mi cousin Janell ask and mi turn round from eh table fi si har a come towards mi wid har arms open fi a hug.

Laughing , mi hug har up as mi seh
" did haffi put down eh food first ".

Pulling away she look mi ova and smile wid appreciation ,
" then gyal, yuh look damn good . Life a treat yuh nice man and a when yuh did plan fi tell mi seh yuh turn celebrity?" She ask .

" thanks but, life not lifing  right now a true yuh deveen know eh half of it but, a which celebrity yah refer to?"

" Sinna? , mi frightened when mi si him because mi always did want to attend one a him show dem. Congrats to you mi love, unu look good together, unu aguh mek some pretty babies " she seh and mi smile as mi rest mi hand pon mi stomach even though mi neva have nuh baby bump yet.

"as long as eh baby tek sumuh from me because dem baby here now a days always look like dem father " and har eye dem open wide.

" then kiss mi back foot! Yuh pregant?" No man , come wid mi mek wi reason cause eh seem like mi miss a whole book a your life " and mi and har guh inna mi old bedroom fi talk.

" Jesus, then yuh want to tell mi seh yuh almost lose yuh life! two time ? No man Jada , and nuhbody nuh call mi fi tell mi nuhun?"

" mi tell mummy fu nuh call nuhbody because mi neva want eh whole heap a questions and concerns and mi did aguh call yuh mislef but, afta everything eh slip mi mind " mi seh and she exhale inna frustration.

" bowy but, yuh seh Andre a tek care a everything? As much as mi nuh know him , him look like eh type a man weh tek care a him woman " .

" yeah , honestly mi nuh think mi coulda get through any a this without him. Him do everything fi mek sure seh mi good and anything mi need him deal wid it sometime even without me asking him to . Mi neva si mi self a even imagine fi get married to nuh man much less a have dem baby but, mi fi him mi woulda do anything cause him prove to mi seh him woulda do eh same".

She smile,  " then watch love, that nice though . Cah wait fi unu come a mi wedding and mi nuh give out eh invitation dem yet but, mi want yuh fi be mi maid a honour because you a eh only person mi really close wid inna eh family and mi nuh want nuhbody else ".

"Awww, of course mi accept. Yuh deh here a talk bout me and a you aguh be a whole wife , mi happy fi yuh suh till. Cah believe yuh aguh have eh wedding wi use to plan and chat bout when wi did younger ".

" mi cah believe either but, when something is for you nuhun cannot change that . Just mek sure seh yuh call mi and text mi whenever yuh have time and don't come tell mi bout eh slip yuh mind like yuh have dementia. If mi nuh respond to nuh body else mi aguh always respond to you "

" ok wife " mi seh and she laugh. Mi leave har and guh back out to eh verandah weh Kerrry and eh rest a mi aunty and cousin dem sidung a talk and mi smile when mi si Andre well comfortable a reason wid eh other man dem weh did come, him look so at home eh just mek mi happy fi si .