සිලිලාර || NONFICTION

21

පරිසරය හුඟක් නිහඬයි... මහ රෑ නිසා ඇහෙන රැහැයියන්ගෙ හඬ හැර, ඈතින් ඇහෙන මුහුදු රළ ඒ නිශ්ශබ්ද තාවයට යන්තමට බාධා කරා.... ස්වප්න හිටියෙ බෝඩිම් කාමරේ ජනේලෙ අයිනෙ තිබ්බ මේසෙ ගාව පුටුවෙන් වාඩිවෙලා ෆෝන් එකේ මොනවද බල බල...

පොත් ටිකක් අරගෙන කාමරේ දොර ඇරන් ඇතුළට ආපු රුක්ෂාන් හෙමින් හෙමින් ඇවිදන් ඇවිත් ඒ පොත් ටික ස්වප්න වාඩිවෙලා හිටපු තැන මේසෙ උඩින් තිබ්බා... රුක්ෂාන්, ස්වප්න පිරිමියෙක්ගෙ ෆොටෝ එකක් ලොකු කර කර බලන දිහා එක මොහොතකට බලන් ඉඳලා ඊළඟ තත්පරේ අහක බලාගත්තා...

රුක්ෂාන් තමන් ගාව ඉන්නවා කියලා දැක්ක ස්වප්න හනිකට ගැලරිය ක්ලෝස් කරලා රුක්ෂාන් දිහා බලලා හිනාවක් දැම්මා...

"මං දැක්කා... වැල්ලෙ අයියා නේද?"

ස්වප්න මුකුත් නොකිය බිම බලාගත්තා... මූ එක්ක බැහැනේ... කොයිවෙලේත් ඒ රේඩාර් එක වැඩ....

"සුදුමහත්තයා... සහෝදරයගෙ ෆොටෝ එක ලොකු කර කර බල බල තනියෙන් හිනාවෙන්න තරම්?"

"කෑල්ල එක්ක මලක් කඩං හිටපන් රුකියා..."

රුක්ෂාන් ඊට එහාපැත්තෙ පුටුවක් ඇදලා එතනින් වාඩිවෙලා ස්වප්නගෙ දිහාවට සීරියස් බැල්මක් දැම්මා... ස්වප්න රුක්ෂාන්ගෙ මූණ දිහා බලන්න පරිස්සම් නොවී, ෆෝන් එකෙ ඌට නොපෙනෙන්න හංගගෙන නෝට් පෑඩ් එක ඕපන් කරගෙන කීබෝඩ් එකට කොටාගෙන කොටාගෙන ගියේ, තමන් වැඩක් කරන බව පෙන්නන්න වගේ...

"ස්වප්නයා... මට උඹෙන් සිරා ප්‍රශ්නයක් අහන්න තියෙයි..."

ස්වප්න හොරාට ඇස් උස්සලා රුක්ෂාන් දිහා බැලුවා... රුක්ෂාන්ට හිනා ගියේ හොර පූසෙක් වගේ ඇස් දෙකත් බෝල කරගෙන තමන් දිහා බලන ස්වප්නයා නිසා...

"වැල්ලෙ අයියයි උඹයි අතරෙ තියෙන්නෙ යාලුකමක්ද?? මට පෞද්ගලික දේවල් හාරවුස්සන්න උවමනාවක් නෑ... කැමති නම් විතරක් කියපන්..."