🔸️حلقة 14
🔸️إدريس_يحكي:
شديت الفران على جنب و هزيت روحي نزلت باش نهبط الطلبيات لي جبتهم للقهوة...هزيت راسي شوية و غزرتلو...ضيقت عينيا مستغرب نحكي
أنا:وجدددي
هز راسو و غزرلي...قرب ناحيتي شوية...يحكي
وجدي:أنا باش نمشي لدار...نشوفك مبعد
أنا:شنية صاار ؟ مع شكون تعاركت و شبيك تنزف هكا ؟
وجدي:مفما حتى شي مهم
أنا:شنية لي مش مهم...ياخي باش تخبي على خوك ؟
وجدي:صدقني مفما حتى شي مهم...تعاركت مع طفل برا الحومة
أنا:و السبب ؟
وجدي:تزايد معايا بالكلام
أنا:باهي...كان صار شي خبرني
وجدي:باهي...باش نخليك أنا توا
هزيتلو براسي باهي و دخلت للقهوة...منجمتش نصدقو خاطر حسيتو مش قد بعضو...كأنو الموضوع كبير برشا بالنسبة ليه...تنهدت بقوة و طلبت وليد باش يعاوني دوب كملت لي عليا و شديت الحسابات كي العادة غزرت لوجدي لي دخل بعد ما إرتاح شوية و قعد يعاون في وليد من غير ما يقول شي وقفت و قربت منو شوية نحكي
أنا:شقولك نسهرو مع بعضنا ليلة ؟
وليد:باهي فكرة حلوة
أنا:أنت باش تشد القهوة...مدام فما مباراة مبعد
وليد:بالله ؟
وجدي:نظن لازمك تكبر شوية في الأول
وليد:ولينا هكا تواا
ضحكت و ضربتو لكتفو...جيت باش نحكي...قص عليا صوت تليفوني...إنسحبت نحكي
أنا:تو نرجع
خذيت نفس و هزيت عليها...نسمع فيها...تحكي
نهلة:إدريس
أنا:رووح إدريس...شحالك ؟
نهلة:أنا لباااس...جيست حبيت نطمن عليك
أنا:لبااس عزيزتي...جيست تلهيت بالخدمة في القهوة
نهلة:كأني طلبتك في وقت غالط
أنا:لاا يا روحي...أما توا باش نسهر مع وجدي شوية خاطر مش قد بعضو شوية
نهلة:باهي...مانيش باش نعطلك ملا...رد بالك على روحك
أنا:و إنتي زادة يا عمري
علقت عليها و رجعت عندهم..سلمت مفاتح القهوة لوليد و خرجت معاه...غزرلي يحكي
وجدي:خلينا نمشيو لبلاصة العادة
أنا:بااهي
حليت الباب و ركبت...شديت الثنية لمطعم بعيد شوية نمشي ليه أنا و وجدي في أغلب المرات خاصة أنو منعزل و أغلب الوقت فارغ...محسيتش بروحي كيفاش وصلت...خاصة أنو تفكيري كان مع نهلة خاطرني منحبش نحيرها و نخليها تعيش نفس الحاجات لي عاشتهم جرايري في الماضي...طلبت العشا أول ما دخلنا و غزرتلو نحكي
أنا:ماكش باش تخبرني شنية صاار بالظبط ؟
وجدي:جبتني لهوني باش تستجوبني ؟
أنا:لاا...أما توقعت أنو إحنا ما نخبيو حتى شي على بعضنا
وجدي:ما خبيت عليك حتى شي...عركة خفيفة و وفات على روحها
أنا:أما وجهك يقول العكس
وجدي:انا جيست تاعب شوية...هاك تعرف ظغط الخدمة و الدار...دوب نجمت نوفق بيناتهم
أنا:تعرف أنو أنا موجود إذا إستحقيت مساعدة مني
وجدي:نعرف...أما توا مستورة معايا الحمد لله جيست تاعب شوية برك
أنا:مريت بنفس الشي قبل...أما توا لازمني نبدا من جديد...يعني منحبش نرجع نهلة لدار هذيكا مرة أخرى
وجدي:أما انت تعبت عليها
أنا:ميسالش...يعيش فيها وليد...خاطرني نعرف أنو سعاد ماهيش باش تخليها براحتها...خاصة إذا عرست ندى و تظطر تبقى وحدها معاها
وجدي:مكنتش نعرف أنو عندكم عرس على قريب
أنا:الموضوع مش هكا...نحكي على الإحتمالات لي ممكن تصير
وجدي:يمكن الأمور تتصلح...خاطر خالتي سعاد كرهت نهلة بسببك...و بسبب رفضك ليها...أنت نقطة ضعفها و أي حاجة تضرك...تضرها هي زادة و كانت تشوف نهلة سبب تعاستك و لتوا تشوفها هكاا
عديت عينيا على وجهو...كلامو منطقي...يمكن هذا السبب الأول لي خلاها تكرها و تحقد عليها بالطريقة هاذي...عديت يدي على وجهي نحكي
أنا:عندك حق...أما قبل كنت نشوف اللي صار أمر شخصي بيني و بين مرتي...ولا مرة توقعت أنو أمي باش تدخل في حياتي بالطريقة هاذي
وجدي:اللي صار معاكم...كان تجربة سيئة...أما كافية باش تخليك تعرف شنوة تحب بالظبط
أنا:أنا نحب نسترجع مرتي و كهو
وجدي:نهلة تحبك و مستحيل تتخلى عليك هي زادة
تبسمت و هزيت عينيا في وجهو...نحكي
أنا:نعرف...غير هكا نحب نطمن على صاحبي و نشوف صغارو...ياخي ماكش ناوي تعرس ؟
وجدي:تحب تحصلني من توا ؟ غير هكا مانيش نخمم في الحكاية هاذي توا
أنا:الموضوع يتعلق برفض ندى ؟
وجدي:لاا...أنا تقبلت رايها...و باش تبقى كيما أختي بالظبط
أنا:مكنتش باش نلقى أحسن منك لأختي...و أنت تعرف هذا بالقدا
وجدي:أنا مقدر موقفك معايااا...و هذا أكثر شي يهمني
أنا:و مع هكا مزلت ناوي نفرح بيك...يا خويا نحب نتهنى عليك...مش ديما نلقاك في وجهي
وجدي:بااهي...أول ما تريقل أمورك و نتهنى عليك نتلفت لحياتي
ضحكت و خذيت رشفة من الكأس لي قدامي..كنت بحاجة قعدة هكا...خاصة أنو من شهور مخرجناش بسبب الأحداث لي فاتت عليا أنا بالأخص...تبسمت مع رسالتها لي وصلتني في لحظة...رديت عليها بالوقت و حطيت التليفون من يدي...غزرلي يحكي
وجدي:أنا مزلت موجود هوني سي إدريس
أنا:والله منجمش نخلي مرتي تستنى فياا
وجدي:ملا كان ترجعها...معادش نشوفك جملة
أنا:عالأغلب
وجدي:ظاهر عندك حق...لازمني ندبر أموري في أقرب وقت...مكانش باش نعدي حياتي وحيد
ضحكت بالوقت...و نزلت راسي لصحن متاعي...رغم حسيتو مزال مش قد بعضو...أما عالأقل تفرهد شوية و خرج من الجو لي كان فيه بكري...مع إني لتوا منعرفش شنوة صار معاه بالظبط...خاطر حكاية العركة من العدم مدخلتش في راسي...و مع هكا محاولتش نركز مع الموضوع هذا برشا...و نظغط عليه...نعرف لي هو ما يخبي عليا حتى شي و مهما كان الموضوع اللي يقلق فيه توا...باش يجي وقتو و يخبرني بالتفاصيل متااعو الكل
أنت تقرأ
فصول الحب
Romanceتدُور الأحداث حولْ قلبيْنِ: قلبٌ يُكابرُ فيتنكَّرُ و قلبٌ يعشقُ فيعبَثُ و قلْبيْنِ آخريْنِ: قلبٌ يُحاوِل فلا يُصيب و قلبٌ غِرٌّ لا يُقاوم و ما بينهُما قِصصٌ من العشقِ بصدد التكوِّن و رِحلةٌ طويلةُ المدى حتى يتعانَقَا كِلَا القلبانِ. "فصول الحُبّْ" م...
