"အရှင်မင်းသား"
"သူကော"
"အခန်းတွင်းမှာ ရှိနေပါတယ် အရှင်။"
အပြင်ဘက်မှအသံလာရာကြောင့်
ဆောနူမှာ စားပွဲပေါ်မှေးကာတင်၍ထားသည့်
လေးလံလွန်းနေသည့်ခေါင်းကို
မနည်းထောင်မတ်လိုက်ရင်းဖြင့်
တံခါးဝဆီသို့ငေးကြည့်မိသည်။
ညအမှောင်ကြောင့် တံခါးဆီမှ
အရိပ်တို့ကိုမြင်တွေ့နေရကာ
ရင်းနှီးရသည့် အရိပ်တစ်စုံကို
ငေးကြည့်နေမိရာမှနေ၍
ခြေလှမ်းတို့က တံခါးဆီသို့
ပြေးကာ ဦးတည်မိတော့သည်။
တံခါးကို ရုတ်တရက်တွန်းဖွင့်လိုက်မှုကြောင့်
ရှေ့တွင်ရှိနေသည့် ပုံရိပ်က
သူ့အားလှည့်ကြည့်လာလေရာ
ဆောနူမှာ မည်သည့်စကားမျှ မပြောနိုင်ပါဘဲ
ကိုယ့်ရှေ့တွင် ရှိနေသည့်သူကို ငေးမောရင်းဖြင့်
မျက်ရည်များ ဝဲတက်လာရပြန်တော့သည်။
"ဂျုံဆောင်း..."
လီဟွန်း၏ စကားသံကြောင့်
သက်တော်စောင့်ဂျုံဆောင်းက
တံခါးရှေ့တွင်စောင့်နေသည့် အစောင့်အား
ပြန်နားလို့ရပြီဖြစ်ကြောင်းပြောရင်း
အခန်းရှေ့မှ ထွက်ခွါသွားကြလေသည်။
လီဟွန်းမှာ အခန်းတွင်းသို့ ဝင်လာကာ
စားပွဲတွင် ဝင်ထိုင်ရင်းဖြင့်
သေရည်ခွက်ကိုငဲ့ကာ တစ်ကြိုက်တည်း
မော့သောက်လိုက်သည်ကို မြင်လိုက်ရသည်။
ထို့နောက် တံခါးဝတွင်ရပ်နေလျက်ရှိသေးသည့်
ဆောနူအား ငေး၍ကြည့်လေသည်။
ဆောနူမှာ အသက်မရှိသည့်
အရုပ်တစ်ရုပ်ကဲ့သို့သာ
သူ့အား ငေးမော၍ ကြည့်နေမိကာ
ထိုနေရာမှ တစ်ဖဝါးမှမခွါ။
ဤနေရာသည်ကား ဂျိုဆွန်းပြည်၏
လရောင်စံအိမ် ဆောင်ကြာမြိုင်အတွင်းရှိ
အခန်းတစ်ခုဖြစ်ပေသည်။
လက်ရှိဖြစ်ပျက်နေလျက်ရှိသည့်
အခြေအနေအကြောင်းတရားတို့ကို
ဆောနူမှာ မယုံကြည်နိုင်
လက်မခံနိုင်သေးလျက်ရှိ၏။
ဆောနူအား ယခုကဲ့သို့ ဂျိုဆွန်းပြည်သို့
ပြန်လည်ရောက်ရှိစေရန်
လုပ်ဆောင်ခဲ့သူမှာ ရှေ့တွင်ရှိနေသည့် သူဖြစ်၏။
သူ၏ ရည်ရွယ်ချက်မှာ အဘယ့်ကြောင့်ဖြစ်သည်
ဆိုသည်ကို ဆောနူသည်
မေးခွန်းများစွာ မေးချင်နေပါသော်ငြား
နှစ်ဦးကြားတွင် တိတ်ဆိတ်မှုကသာ
စိုးမိုး၍နေလေ၏။
YOU ARE READING
Forbidden Melodies
Fanfiction"အကျွန်ုပ်၏ လည်ချောင်းသွေးခမ်းသည်အထိ သီဆိုမည့် ဂီတသီချင်းတစ်ပုဒ်အား အရှင့်သား ရွှေနားတော် လာဆင်လှည့်ပါဦး" ဂီတလုလင်လေး၏ဖြစ်အင်ကို လူအများက သနားဂရုဏာသက်စွာဖြင့် ငေးကာကြည့်နေကြသည်။ အရှင့်သား၏ နန်းတက်ပွဲမင်္ဂလာနေ့ရက်မြတ်မှာမှ ဤကဲ့သို့ ကွက်မျက်မှုဟူသည် မ...
