ရေချိုးဆောင်တွင်းတွင် အမျိုးစုံလင်လှသည့်
ဆေးနှင့်ပန်းရနံ့တို့မှာ ထုံသင်း၍နေလေသည်။
ပန်းပေါင်းစုံနှင့် ဆေးဖက်ဝင်အပင်များ
ပျော်ဝင်နေသည့် ရေချိုး ရေကန်ထဲသို့
သက်ဆင်းလိုက်ချိန်တွင်
ရေပြင်ပေါ်တွင်ရှိနေကြသည့်
ပွင့်ဖတ်လွှာအချို့မှာ ယိမ်းခတ်၍သွားလေသည်။
ရေပူနွေးနွေးဖြင့်ထိတွေ့လိုက်မိသည့်အချိန်တွင်
ဖြူလွှသောခန္ဓာကိုယ်မှာ ပန်းနုရောင်သမ်းရလေသည်။
ရေပူသည် ရေအေးသည်ကို
မခံစားနိုင်သကဲ့သို့ ဆောနူသည်
ခံစားချက်ကင်းမဲ့စွာဖြင့်
ရေချိုးကန်ထဲတွင် ထိုင်နေရင်း
ရေပြင်ကို ငေး၍ကြည့်နေမိသည်။
ရေပြင်ထက်တွင် ရှုပ်ယှက်ခတ်ကာနေသည့်
ပန်းပွင့်လွှာချပ်တို့ကို လက်ဖြင့်သပ်ကာ
ဖယ်ထုတ်လိုက်ရင်းဖြင့် ဆောနူသည်
ကြုံခဲ့ရသမျှတို့ကို ပြန်တွေးမိနေ၏။
မျက်လုံးထဲတွင်မြင်ယောင်မိနေသည့် ပုံရိပ်မှာ
သူ့အားဖယ်ခွါ၍ ထွက်ခွါသွားခဲ့သည့်သူ၏
ကျောပြင်ကိုသာ ဖြစ်လေသည်။
သူ့တွင်ရှိသမျှ သိက္ခာ၊ မာနတရားအလုံးစုံတို့အား
စွန့်ဖယ်ကာ ဖက်တွယ်ခဲ့ပါသော်လည်း
အရှင်မင်းသားသည် သူ့အား
တစ်ချက်ကလေးပင် လှည့်မကြည့်ခဲ့ပါချေ။
ဆောနူ ငိုကြွေးခဲ့ရသည့်နေ့ရက်တို့မှာ
မရေမတွက်နိုင်ဖြစ်နေခဲ့ရသည်။
ယခုတွင်မူ မျက်ရည်များပင်
ကုန်ခမ်းသွားသည်ပေလားမသိ။
ဆောနူ၏ ခံစားချက်အလုံးစုံတို့မှာ
ကင်းမဲ့ကာ ဗလာနတ္ထိဖြစ်၍နေလေသည်။
ထိုရက်ကအခြေအနေများသည်
ကျော်လွန်သွားပြီဖြစ်ရကာ
ချင်ဘုရင်၏ နှစ်သက်မှုကိုခံနေရသည်ဆိုသည့်
ဂျိုဆွန်းအိမ်ရှေ့စံ၏ ပါဝင်မှုကြောင့်
ဆောနူကိုလိုချင်ခဲ့သည့် သူဌေးမင်း၏
ပြဿနာသည်လည်း ဖြေရှင်းပြီးဖြစ်ရလေသည်။
ယနေ့တွင်မူ ဂျိုဆွန်းအိမ်ရှေ့စံအတွက်
ပြုလုပ်ပေးသည့် စားသောက်ပွဲတွင်
ဆောနူဖျော်ဖြေပေးရန် အမိန့်ကျလာလေ၏။
ချင်ဘုရင်မင်းမြတ်ကိုယ်တိုင် တက်ရောက်မည့်
နေရာတစ်ခုဖြစ်သည်မို့ ဟီဆွန်းသခင်က
အစစအရာရာသတိထားရန် မှာကြားထားသည်။
YOU ARE READING
Forbidden Melodies
Fanfiction"အကျွန်ုပ်၏ လည်ချောင်းသွေးခမ်းသည်အထိ သီဆိုမည့် ဂီတသီချင်းတစ်ပုဒ်အား အရှင့်သား ရွှေနားတော် လာဆင်လှည့်ပါဦး" ဂီတလုလင်လေး၏ဖြစ်အင်ကို လူအများက သနားဂရုဏာသက်စွာဖြင့် ငေးကာကြည့်နေကြသည်။ အရှင့်သား၏ နန်းတက်ပွဲမင်္ဂလာနေ့ရက်မြတ်မှာမှ ဤကဲ့သို့ ကွက်မျက်မှုဟူသည် မ...
