بولاريس

حقيقة 26

بين عتمت الليل و سكونه كان متكور بحضن صاحبه و يبكي من وقت طويل وهو يفتح له قلبه و يقول اللي ما قدر يقوله لاحد غيره

و بينما صاحبه يسمع كان قلبه يتقطع عليه و على حاله ، يدري ان ماله غيره صاحب و يدري انه محتاجه يسمع له اكثر من انه يواسيه .. بس كان يبي يسمح على ظهره و يخليه يشكي له همه

نايف قال بين شهقاته و راسه يتوسد ذراع نور : تعبت أمثل على على نفسي و على خالي بأني طبيعي .. و مافيني شي ، قلبي يعورني من كلشي

و رجعت خيوط دموعه تمشي لطريقها اللي حفظتها من حفرها على خده و كمل : مو قادر اكون الشخص اللي كنت عليه قبل اعرفه .. أنا مو أنا ، احس اني ما اعرفني احسه أخذني معه

مسح نور خد نايف من دمعته اللي نزلت على كتفه وهو يسمعه يكمل : نور

همهم نور و رجع الثاني قال بهمس صعب بسبب شهقاته : ترا أنا صدق حبيته .. انت تدري ، حبيته من صورته البعيده لسنة و عيني عليه و ما تشوف غيره و قلبي ما يبي إلا هو .. صعب علي كل ما اتذكر سواته فيني و رغم قساه كنت متمسك فيه و احبه ، للحين كل ما احط راسي على المخده اتخيله في اي لحظة بيدخل علي

نور : انت للحين خايف منه ؟

نايف عقد حاجبه يفكر قبل يقول : خايف منه و خايف عليه من نفسه .. و خايف على نفسي بعد ، ترا اللي سواه فيني مو قليل و كلشي له اثره بقلبي و .. و للحين بحيرتي إذا فعلاً كرهته ولا باقي له شي بقلبي ، نور لا تفكر اني متخلف بس .. بس حط نفسك مكاني لماً تكون تحب شخص و ما تقدر تقرب منه و تموت بغيرتك عليه و انت تشوفه من بعيد يمازح غيرك ولا يبتسم له و لا حتى يناظر فيه .. هالشعور لعب فيني لسنة كامله و أنا أنتظر منه التفاته ، حتى و أنا واقف قباله و اعترفت له كنت احس بشعور ثقيل خايف تقسى كلماته علي من كثر ما كنت حساس اتجاهه ، و من أخذني بين يدينه حسيت اني ملكت الكون كله ..

قاطعه نور بهدوء : اول شي لا تفكر اني بيوم بحكم عليك و تذكر اني فاهمك بدون ما تنطق

ابتسم نايف بتعب من بكائه و قال وهو يقرب اكثر يدفن وجهه برقبة نور و يكمل : انت احلى شي صار بحياتي .. الله يخليك لي

ابتسم نور على حركاته و طريقة كلامه وقال : كمل

نايف بتردد : ما ودي اقولها عشان أنا ما اصدقها

نور : و شنو هي ؟

نايف : احس اني ... ولا خلاص خلني أنا غبي بصدق احساسي بلحظة مثل ذي

نور : خلاص على راحتك ، بس هو ما رجع يحاول يتواصل معك ؟

نفى نايف براسه وقال : اختفى فجأة و وقفت رسايله و اتصالاته يمكن صار معه شي و خلاه يلهى عني

نور : ولو رجع لك ؟ و قال لك ندمان و أنا آسف بتسامحه ؟

نايف بسرعه جاوب : مستحيل ، مستحيل أرجعه له بعد اللي صار .. نور ترا مو بس أنا تأذيت ، حتى خالي تأذى .. لا تشوف وجهه لماً عرف باللي صار لي