بولاريس

وصال 35

تأخرنا متى نرجع ؟
أنا ما أشوف و ما اسمع

و انت مقطب حجاجك
و ربي هالعتب جارح

ياليتك قلت لي البارح
ولا خليتني احتاجك

أنا بسري

حبيبي مد لي شالي
بروح و بترك ظلالي

تجرح فيه لين ترضى
و مثل ماجيتك الليلة

ابسري الليلة لحالي
لعلك سيدي ترضى

وتعرف منهو المظلوم
ياصدري الضايق المهموم

تأخرنا
________________
وعدا أسبوع على إبطال قصتي ، فيه من له قصة طالت و بردت و فيه من له قصه يتمنى تدوم و يدوم معها حبيبه و فيه من له قصة يتمنى تنتهي و تزول من ذاكرته

الساعه عشر الصبح راجع من الصيدليه و على يده لصقة طبيه و يترنح باللوبي يحاول يوصل لجناحه بكل صعوبه وهو يجر رجلينه جر و مو قادر ، يحس بالدنيا تدور حوله و تنفسه يثقل مع كل خطوه يخطيها و الوجع يهد عظامه و البرد محتله

الأصنصير بعيد عنه بخمس خطوات و مو قادر يوصله يناظر فيه بعيونه المدمعه من الحراره وهو مستند على الجدار ، داهمه التعب من صارت مخدته تمتلي بدموعه كل ليله لين بدأ جسمه يضعف

: سدم !

لف عليه مشاري ببطى وهو يتنفس من فمه يشوف ملامح الخوف تعتليه وهو يقول : علامك ؟

ميل مشاري راسه على الجدار وقال : و.وخر من طريقي

و بسرعه حط مشعل يده على جبينه يتحسسه قبل يقول : ياليت السخنه بضلوعي ولا فيك ...

دف مشاري يده عن بقسوه وقال وهو يحاول يتوازن على الأرض : قلت ... وخر عني ... مو محتاج لك

مشعل : اسمعني يابعد مشعل اجلس بجيب لك كرسي و أجي الله يخليك لي

نفى مشاري براسه وهو يحس الدوخه تزيد وقال : م.ا ... م.ابي

مشعل : حبي...

قاطعه مشاري بانفعال و بصوت صاخب بتعب وهو يترنح : قلت وخر عن وجهي مآبي أشوفك

و ما ان أنهى جملته إلا هو طايح على الأرض خاينته رجوله و عينه على مشعل وهو بسرعه ينحني له يربت على خده ... كان يشوفه بس ما يسمعه يحس بلمساته على خده بس ما يقدر يسمع صوته

شاله مشعل بين يدينه و يتحرك فيه ناحية الأصنصير قبل يشوفه الموظف و يركض يشيل جوال مشاري اللي طاح و كيس علاجاته و يلحق مشعل يفتح له الأصنصير و يدخل معهم

ناظر مشعل بوجه حبيبه وهو على صدره و يناظر فيه و قال : مشاري علامك يابعد حيي و ميتي ؟ وش اللي هدك كذا يابعد روحي

وصلو للدور و بسرعه فتح له الموظف جناح مشاري و دخل وهو شايله بين يدينه بكل حرصه يتحرك فيه ينزله على السرير و يغطيه و يطفي التكييف و لسى عين مشاري ثابته عليه ... ماله القدره ينطق