بولاريس

وصمة 25

سويت نفسي ما يعنيني غلاك .. و مشيت
رغم أن دمعي عشانك مثل دمع الغرير

ما كنت ابين لك اني منتظرك .. و بكيت
لكن بينت لك .. ما عاد اعرف المصير

اشوفك بكل زولٍ عابر .. و كل بيت
ولا اقدر أوصلك لو الدرب عنك قصير

و خذتك الايام من عندي و أنا ما دريت
عز الله انها اخذت .. خذت معها الكثير

من يوم ما غبت عني .. ما نسيت و سليت
و اقول طيب و أنا والله ماني بخير

________________________________
اعذروني على السحبه بس المهم رجعت لكم ببارت يرضيكم إن شاء الله ، و خلني أشوفكم ما تعلقون 🫵🏻

قرأه ممتعه ..

_______
ليل و قمرا و حبيبي بحضني احتويه و عطره يحتويني ، فزيت من نومي وهو ينسحب من بين ضلوع صدري و يترك مكانه ، كنت بخليه ظنيت انه يبي دورة المياه لكن مساره تغير لباب الغرفه

رفعت راسي أناديه بثقل نفس ثقل جفوني وقلت : تيم يبا ماعليك شي يسترك الخدم للحين موجودين

قلت له اذكره لكنه سفهني ولا كنه يسمعني و فتح الباب و طلع و أنا وراه اقفز من السرير امسك ذراعه و ما ان ثبته بمكانه تفاجأت فيه نايم .. كان يمشي وسط نومه ، معلومة جديده انضافة لصفحة تيم

و بكل هدوء مني سحبته عكس طريقه أرجعه للغرفه بدون ما اصدر صوت مثل ما قريت بكتاب كنت قاريه من أيام الجامعه و طبقته بحبيبي الآن ، حطيته على السرير و غطيته و رجعت لمكاني جنبه و سحبته لحضني مثل ما كان و يدي تقيد معصمه بخفه و بديت اسمي عليه و أنا مسلم جميع حواسي لعطره و خدرت ... و نمت

و صارت الساعه 8:30 الصبح و تيم باقي بنومه قبل يفتح عينه بكسل على حركة حبيبه حوله ، واقف قدام المرايه يضبط ياقة قميصه وهو بكامل أناقته مثل العاده ، اعتدل بسدحه و بدون ما يحس كان مبتسم وهو يتأمل فيه سراً لكن هو مفضوح قدام فهد اللي كان يدري انه إذا نام ما يغير وضعيته

ابتسم فهد وهو يشوف انعكاس حبيبه قبل يلتفت له و يقول : صباح الخير حبيبي

تيم بكسل و ابتسامته ما طاحت عن وجهه : صباح النور ، شنو بتروح ؟

التفت فهد للمرايه ياخذ ساعته من على الطاوله يلبسها و يقول : اي برجع للبيت ابدل و اروح للمكتب

خفت ابتسامة فهد وهو يسمع تيم يتنهد وراه وقال : ماعليه يبا أوعدك آخذ اجازه بأقرب وقت ان قدرت

كان جواب فهد نتيجة معرفته لتنهيدت تيم ، يدري انه متضايق لانهم من رجعو من ألمانيا لليوم ما قعدو يوم كامل مع بعض و بالأيام اللي يكون فيها فهد برا مكتبه هو يكون مشغول بالجامعه و العكس ...

حتى العشر أيام اللي طافت كأنو ينامون بدري لجل يجي الصبح بسرعه عشان يلتقون لقى ما يطول عن الخمس دقايق حقت صباح الخير و حضن إلى ان يفز الثاني معلن استعجاله على شغله