شويه كراكيب ..

انت قوي ..

بيقولوا لي دايما اني مش بحس.. او بارده.... دا عشان مبعرفش اعيط..
بس الحقيقه.. هي ان مفيش حد مبيعرفش ازاي يعيط..

ان بعرف اعيط.. بس مبحبش اعيط.. ممكن اضايق اكتر لو لاقيت دموعي خانتني ونزلت.. اكيد انا مش لوحدي وفي زي..

بس انا فعلا لا يمكن اعيط علي حاجه وجعاني.. مهما الحاجه دي وجعتني.. لا يمكن انزل دمعه.. ببقي هموت من جواا بس مبحبش ابان ضعيفه.. او محتاجه كلمه معلش..
مبحبش حد يقولي معلش.. مبحبش احكي لحد اي حاجه مضيقاني..
انا تقريبا مبثقش في حد.. ااه مكنتش كداا بس بقيت كداا غصب عني معرفش ليه..

ياعني انا مثلا افتكر يوم ماجدتي ماتت.. انا كاان رد فعلي غريييب اووي..
انا مكنتش بحب جدتي ديه.. انا كنت بعشقها.. وبعشق اغلس عليها هههههههه..
بس انا مشكلتي مبحبش ابين حبي لحد..
يوم ماصحيت من النوم مفزوعه وهما قاعدين بيجروا في البيت وبيقولوا تيته بتمووت.. واختي بتلبس وهي بتعيط.. انا صحيت وفضلت قاعده في مكاني مبتحركش.. وبعد ماكلهم نزلوا من البيت قومت لبست ونزلت روحت بيت جدتي..

اول مادخلت البيت سمعت الصويت.. والصريخ والعياط..
فضلت ماشيه لحد مادخلت اوضتها.. لاقيتهم منيمنها علي سريرها في اتجاه القبله وعمتي ماسكه ايديها وقاعده تعيط وتصرخ واول مادخلت فضلت واقفه عند باب الاوضه واقفه مبتحركش..
عمتي لما شافتني وهي بتعيط قعدت تصرخ وتقولي قوليلها تصحي ياندي.. قوليلها ياندي تصحي هي بتحبك... شايفه ياندي امي مشت وسابتني.. وهي مقهوره من العياط.. وانا كل دا واقفه في مكاني عيني مرمشتش..
الاوضه كانت كلها ستات كبيره وانا كنت البنت الوحيده الموجوده فيها... كنت في تالته ثانوي
يوميها منزلتش دمعه واحده.... وبعدين طلعوا من الاوضه عشان المغسله جت.. وفضلت عمتي في مكانها.. قربت منها لحد ماوصلت من راسها بصتلها بصه طويله كأني كنت بحفظ ملامحها.. وبعدين وطيت عليها وبوستها من راسها وقبل ماعمتي تقولي اي حاجه طلعت بسرعه من الاوضه ومشيت...
مشيت رايحه بيتنا.. كنت ماشيه مش عارفه انا رايحه فين انا تقريبا مكونتش شايفه حد وانا ماشيه...
روحت البيت ودخلت اوضتي وفضلت قافله عليا..
وبعدين اختي جت وقعدت تروق في البيت عشان العزا هيبقي في بيتنا احنا...

فضلت اختي رايحه جايه قصادي وانا تقريبا مش شايفها.. وبعدين قالولي النعش بتاعها هيطلع دلوقتي عشان يدفنوها.. سبتهم وطلعت علي سطح بيتنا... عشان ابقي شايفه كل حاجه من فوق..
فضلت باصه عالنعش وهما شايلينه ورايحين بيه الجامع عشان يصلوا عليها... فضلت واقفه عيني مبتنزلش دمعه.. نفسي اعيط.. ومش عايز اعيط عشان في عماتي وكلهم كانوا واقفين جنبي... فضلت بصه عليهم لحد ماراحوا ناحيه التربه. "المقابر "..

وبعدين كلهم نزلوا البيت تحت عشان العزاا..
فضلت واقفه شويه وبعدين نزلت.. روحت بيتها قولت مش هيبقي في حد هناااك بقي خلاص.. لان العزا في بيتنا احنا..
روحت البيت ودخلت اوضتها ونمت علي سريرها اللي ماتت عليه.. وبعدين قومت وحطيت رجليا الاتنين بين ايديا ودفنت راسي فيهم ..وفضلت اعيط... عيطت لحد لما عيني وجعتني...
دخل عمي عليا وشافني كدااا. اول مابصتله فضلت امسح دموعي بسرعه... قام قعد جنبي وقالي بتحبيها اوي كداا ياندي.. ؟ لدرجه انك تقعدي علي سريرها اللي ماتت عليه وماخوفتيش ؟ ماخوفتيش وانتي في البيت كله لوحدك ؟؟
امي مشت وسبتني ياندي!! امي مشت وسابتني.. وبدأت الدموع تنزل من عينه... محستش بنفسي غير وانا واخداه في حضني وانفجرت عياااط انا وهو ...

.......
فضلت ساكته بعديها يومين مبكلمش حد...
من يوميها وانا كرهت العياط اكتر... متهيألي الحاجه اللي بتخليني اعيط ...اللي لما يكون حد بحبه تعبان او في حاجه وحشه حصلتله...

غير اني حتي لو عيطت مبخليش حد يشوفني.. فبيقولوا عليا بارده...
بجد رفقا بالناس اللي بتشوفوها جامده قصادكوا...
عارفه اني في زي كتير...
متخافوش ..احنا مش محتاجين طبطبه من حد... انتوا مش ضعاف.. ولا باردين.. انتوا اقوياء...