شويه كراكيب ..

لحظه السكون

في وقت كده معين بيجي عليك ..تحس فيه ان انت محتاج تفصل..
تفصل من كل حاجه واي حاجه حتي لو بتحبها.. بتبقي عايز تبعد وبس..
مع انك بردو مش عايز تقعد لوحدك.. بس في نفس الوقت مش عايز تقعد مع حد..
ملكش نفس تتكلم ..ولا حتي ليك نفس تتكلم مع نفسك...
بتبقي عايز تقعد ساكت وبس.... محدش يكلمك ولا تكلم حد...
تحس ان كل حاجه ناقصه حاااجه... في حته لسه ناقصه.. مش عارف هي ناقصه فين بالظبط عشان تكملها.. بتبقي حاسس كداا بس. .

كل حاجه بتبعدها عنك.. وبتعد عن كل حاجه..
تحس ان جوااك كلاام كتير.. بس مش عارف تبدأ منين. فتكسل تتكلم حتي مع نفسك ..

وقت غريب..وانت بتبقي فيه غريب..
عارف...زي المطرود من بلده من غير شنطه هدوم.. من غير زاد.. ولا حتي ميه..
مش عارف تروح فين ولا تبدأ منين...

بتبقي مش عارف انت نفسك عايز ايه وتمشي في انه اتجاه... انه اللي هيوصلك اسرع واسهل...
بس دايما مفيش حاجه بتكمل.. هتلاقي الطريق اللي بيوصلك بسرعه مليان صعوبه ومتعب..
والطريق اللي بيوصلك بسهوله.. بطيئ ومليان كراااكيب...

عند النقطه ديه بالظبط... هكتفي... يمكن ابدأ افهم...