قصه فريده من نوعها..
هلااااو.. خلي احچي وياكم شويه قبل القصه
اليوم گلت خلي اغير شويه واسويلكم هچي قصه حلوه ومشجعه وتضحك وتبچي وكلشي
الشخصيات يحچن باللغه العاميه .. اول مره اكتب هچي بس حسيته حلو وحته ماتضوجون من الكتاب كله نصايح وعبر.. بس حته هاي القصه بيها عبره.. بس بطريقه حلوه وإن شاء الله النهايه سعيده بس! بقت يمكم اذا تردوني اطولها شويه واسويها اكثر من جزئين او لا ! اختمها بالجزء الثاني وأخلص ؟
اذا يعجبكم اطولها گلولي! طبعا بعد ماتقروها!
اختاريت موضوع الصداقه وهو موضوع شويه حساس وبي هواي سوالف.. إن شاء الله اذكر بعض منها..
ادري طولت بالحچي بس أتمنى تعجبكم 😉😉
قرآءه ممتعه ✌
........................................................................
ياله من شعور.. انسان لاتعلم عنه اي شيء.. يدخل قلبك فتصبح صديقه!
ثم تكتشف مدى اقتراب افكاركم وطباعكم.. تشعر وكأنه اخ لك!.. للصداقه قوى تجعلك تستيقظ كل الصباح كي تقابله سواء في المدرسه او في العمل!
في كل مره تبكي.. تجده بجانبك! يبكي معك!
وعندما تضحك يضحك معك..
هو الشخص الوحيد الذي تتكلم معه بصراحه! لايزعل منك ان انتقدته .. ويذكرك بالخير امام الناس ..
ولأن قوة الصداقه كبيره وعظيمه.. كم من مستحيل اصبح حقيقة بمساعدة الأصدقاء وكم من مره سقطت فيها على الأرض بلا حول ولاقوه.. فتأتيك القوة من صديقك.. الذي اعطاك يده كي تقف من جديد!!
لكن للأسف قلّت هذه الحالات واصبحت نادرة الوجود..!
اصبحت الصداقات مصالح! اذا انتهت المصلحه.. يبتعد عنك!
4 فتيات صديقات... تجمعهم الصداقه منذ الصغر.. وها هم الآن في المرحله الإعدادية.. لكن تأتي فتاة من مكان بعيد لتدخل حياتهم ..!
.
.
سرى ، هدى ، ندى ، رؤى..
اربع فتيات بالرغم من اختلافهم في الصفات إلا ان الصداقه تجمعهم.. قوة صداقتهم تعدت الحدود .. أصبحوا كالأخوات بل اكثر...
في أول يوم من السنه الجديده :
سرى : هلو حبيبتي نداوي شلونج ؟ لعد وين البقيه ؟
ندى : هلا حبيبتي زينه.. ماادري صارلي شگد ادور عليهن!
اوكفي.. اوكفي.. هاي الحاته اگيد رؤى
رؤى : هلااااو بنات شلونكم ولكم مشتاقتلكم.. هاي وين هدى لعد ؟
ندى : انتي بس تشوفين وحده مخبله گولي هاي هدى!
هدى : هاي منو المخبله ولچن ؟
ندى : بسم الله الرحمن الرحيم.. خرعتيني ثوله.. كل هالخبال وتكولين منو مخبله ؟ شلونج ولج؟
هدى : كوووووولش موزينه
سرى : منو موزين ؟ انتي ؟ هو انتي 24 ساعه تضحكين ويه روحج!
رؤى : هههههه اي والله.. شلون يعني موزينه ؟ اكيد اخوج ماقبل يلعب وياج ! خخخهه
ندى : هاي شنو رؤى خطيه البنيه شويه شويه عليها
سرى : اكلج عيني معقده انتي مالج دخل.. لا تتدخلين!
رؤى : اي عفيه سراوي بدت السنه وبدت المعقده وسوالفها هههه!
هدى : هسه سكتن خلي احچي !
ندى : يله عيني احچي.. دنسمع!
هدى : البارحه قست وزني.. ولكم سمنانه كيلو 😢
سرى : صخونه كل هاي علمود كيلو ؟
هدى : اسكتي سرى مالبست الثوب من وره الكيلو هذا!
ندى : اي عيني اذا انتي تشترين على گدج ضبط!
هدي: اي لعد مثلج البس عريض! 😈
رؤى : هسه اسكتن.. شوفن الحاته مالتكم شلابسه حذاء !
ندى : موحلو !
سرى : الله وچ يخبل.. ارييييد 😭
رؤى : آخر قطعه 😂 بس ميخالف نتلابس اني وياج
سرى : يمه فديت رورو الجميله الانيقه
هدى : ها! بدت اللواكه ؟!
.
.
محادثه قصيره تعبر عن شخصيات الفتيات والروح الرياضيه في ما بينهن! بالرغم من أختلاف صفاتهن لكن الصداقه تغلب كل العوائق!
.
.
بدأت السنه الجديده.. كان هنالك بعض الفتيات الجديدات أيضا اللاتي انتقلن من مدارس أخرى!
كان من بين الفتيات .. طالبه تبدو مسكينه.. لاتعرف أحدا
فكان من واجب الفتيات والدافع الإنساني ان يعرفن الطالبه على المدرسه والمدرسات!
سرى : شنو اسمج ؟
الفتاة : نهى عباس
سرى : اي اتشرفنا.. هذني صديقاتي.. هدى ، ندى ، رؤى
هدى : هيلاااااو
ندى : ثگلي شويه!
رؤى : يبو عليچن فشلتونا .. هلو عيني نهى تعاي انراويج المدرسه
.
.
كانت نية الفتيات صادقه.. كانوا يظنون انها بالفعل لا تعرف أحدا!
لكنها اختلطت بالبنات بسرعه وكونت صداقات عده!
لم يكن هذا ظاهرا على وجهها.. اول مره التقيا بها! كانت تبدو كالمسكينه!
لكن شخصيتها الحقيقيه بدأت تظهر يوما بعد يوم!
يتبع...
أنت تقرأ
مرآيا
General Fictionمرايا.. لا اتكلم عن المرآة العاديه.. بل اتكلم عن المرآة الموجوده في داخل كل واحد منا ومن خلالها يستطيع الاخرون معرفتنا.. سأدخل معكم إلى مرايا لأشخاص كثيرين قد عاشوا حيوات مختلفه لنأخذ عبره ونتعلم درس جديد في كل مره! By: Zahraa_hussein
