الحب الذى غيرنى

البارت الرابع والعشرين

   - لم يترك بيبرس حنين في هذه الليله ظل مرافقا لها محتويها داخل احضانه حتي سكنت للغايه وغاطت ف نوم عميق فنهض وظل واقفا ف الشرفه يستحوذ التفكير ع عقله  وفكر مليا لايجاد وسيله يطمئن بها ع حبيبته ف غيابه ...
( هاتفيا )
يحيي : اعقل يابيبرس .. لو جيبت بودي جارد هتبقي الحكايه واضحه قوي وهتلفت انتباههم
بيبرس بضيق : امال اعمل ايه ياابو العريف
يحيي : يابني اهدي شويه خلينا نفكر
بيبرس بصوت عالي : ماهو اللي ايده ف الميا مش زي اللي ايده ف النار
يحيي بهدوء : انا مقدر خوفك عليها .. بص ياسيدي في فكرة حلوة اوي ..انت تجيبلها جهاز (GPS ) وتخليه معاها طول الوقت وخصوصا وهي نازله .. وخلي الجهاز ده متصل بتليفونك عشان تبقي عارف مكانها ف اي وقت وتقدر توصلها مكان ما هي موجوده 
بيبرس محدقا عينيه : تصدق فكره مجاتش ع بالي ابدا .. طيب يايحيي انا هعمل كده بالضبط
-----------
( يوم جديد )
- تستيقظ حنين مفزوعه ع اصوات عاليه ف الخارج لتنهض سريعا من مكانها لتتوجه للخارج
حنين بفزع : بيبرررس انت بتعمل ايه
بيبرس : صباح الخير ع عيون اجمل حنين ف الدنيا ..تعالي
- احاطها بذراعه وجذبها معه برفق حتي وصل للاريكه وجلسا وما زال محاوطها بذراعيه
بيبرس بنبره هادئه : بصي ياستي انا ركبت كالون جديد بالكمبيوتر .. وكمان عملت ترباس جديد اكبر من التاني وطول ماانا مش موجود ف البيت الباب ميتفتحش لاي حد نهاااااائي وكمان خدي ده
حنين عاقده حاجبيها : ايه ده كمان ؟
بيبرس : ده جهاز GPS عايزة ميفارقكيش ابدا والافضل تجيبي شنطتك وانا هاحطه بطريقتي عشان ميبانش وميضيقكيش
حنين بخوف : بب بيبرس .. اوعي تسيبني
بيبرس محتضنها بشده : مقدرش .. مقدرش الا لو ربنا اذن واخدني .....
حنين واضعه يدها ع فمه : ششششش ارجوك متكملش.. ربنا يخليك ليا ويجعل يومي قبل يومك
بيبرس بلهفه : بعد الشر عنك .. ربنا يحفظك ويخليكي ليا
بيبرس : ممكن بقي تجيبي شنطتك .. عشان عندي شغل مهم ومش عايز اتاخر
حنين باابتسامه : حاضر
--------
( منزل يحيي ) ترررررررررررررن
يحيي : الووو  حبيبتي صاحيه ليه بدري
حياة بنبرة رقيقه : انا متعوده ع كده قولت اصحيك عشان شغلك بس شكلك صاحي
يحيي : تعرفي اني اتعودت اصحي الساعه 8 الصبح بسببك .. عشان كنت بصحي ف المستشفي قبل ما تيجي عشان مش عايز اخد الجلسه
حياة : ربنا مايعودهاش عليك تاني الايام دي ياروحي 
يحيي : حياتي انتي
حياة : حبيبي انت
يحيي : يلا قومي افطري وانا نازل افطر مع ماما زمانها مستنياني
حياة : حاضر .. في رعاية الله ياحبيبي
   - انتهي يحيي من ارتداء ملابسه وتجهيز نفسه للانصراف وما ان وصل للاسفل حتي لمح شبحا ليس بغريب عليه
يحيي بصدمه : شيرين
شيرين بملامح حزينه : صباح الخير يايحيي
يحيي ببرود : صباح النور .. خير جايه عشان تديني ورق امضيه ولا عشان ...
شريفه : يحيي .. اقعد افطر معانا
يحيي بااقتضاب : شكرا ياماما انا عندي شغل ولازم امشي
شيرين : انا ممكن امشي طالما وجودي مضايقك
يحيي يلوي شفتيه : ممم خليكي مع ماما انا مليش علاقه تقعدي ولا تمشي ..عن اذنكو
شريفه : معلش ياشيرين .. غلطتك مكنتش صغيره
شيرين ناظرة للاسفل : عارفه ياطنط بس انا كنت موجوعه اوي ومش عارفه اعمل ايه
شريفه مربته ع كتفها : طب نفطر وبعدين نكمل كلام ..اشربي النسكافيه بتاعك
شيرين بتنهيده : طيب ياطنط... طيب
( في الشركه )
يحيي : بعد كده هتطلع ع البنك قبل ما تمشي وتصرف الشيك ده وتحوله لحسابهم عشان يبدأو ف التنفيذ
بيبرس : ماشي
يحيي : ااه صحيح .. انس اخو حياة هيستلم شغل من بكرة حطه ف الارشيف او اي مكان مش عايز شغل كتير ..لحد ما يدخل الجامعه وبعدها ننقله
بيبرس : تمام
يحيي بنصف عين : مالك يابيسو النهارده
بيبرس بتنهيده : مفيش .. مجرد ارهاق عشان منمتش امبارح كويس
يحيي : متقلقش يابيبرس كله هايبقي تمام ان شاء الله وطالما امنت نفسك وعملت اللي اتفقنا عليه خلاص
بيبرس : انا بس اللي شاغلني هو مين .. وعايز ايه..انا فكرت اعمل محضر بس رجعت قولت مش هينفع
يحيي : محضر ايه يابني هيقوللك فين الدليل وايه يثبت والحوارات دي انت تحمي نفسك ومراتك بنفسك..وبعدين متبينش قلقك قدامها عشان هي محتاجه تتقوي بيك
بيبرس مضيقا عينيه : بقيت رومانسي وشاعر ياكوتش
يحيي : هههههههه ماشي ياابو نص لسان
بيبرس : طب واخو حياة هيشتغل هنا ليه بقي
يحيي : الواد بيحب الشغل وييجي منه وانا عايز استفيد بدماغه .... بقولك ايه كمان يومين عيد الحب وانا ناوي احتفل مع حياة ايه رأيك تاخد مراتك وتسهرو ف اي مكان وتغيرو جو
بيبرس باابتسامه واسعه : يابن اللعيبه ..تصدق كانت تايهه عن بالي دي فكره جامده جدا
يحيي غامزا : اي خدمات ياعم
بيبرس : طيب ياكوتش انا هروح البنك دلوقتي ولما ارجع هاجي اديك التمام
يحيي : تماااام
-----------------------
- كانت حياة تجلس ف الشرفه تمسك بيدها احدي رواياتها الرومانسيه وتمسك بيدها الاخري فنجان من الشاي بالحليب ومستمتعه للغايه بالقراءه حتي قطع متعتها رنين جرس الباب ...
تن تن تن تن ....
حياة بضيق : اووف بقي هو ده وقته ... ايوة ايوة جايه اهو
- فتحت حياة الباب لتتفاجأ بشاب مجهول الهويه يضع بجانبه صندوقا كبيرا ويحمل بيده ورقه وقلم ..
الشاب : مساء الخير يافندم .. مش ده منزل الانسه حياة صفوان
حياة بدهشه : اا ايوه.. انا حياة مين حضرتك
الشاب : انا حسن محمد من سنتر ... وجايب لحضرتك الطرد ده ...ممكن تستلميه وتوقعي هنا
حياة : طرد ! ده فيه ايه ده
الشاب : حضرتك انا معنديش اي معلومات ممكن حضرتك تستلمي الطرد وتشوفي بنفسك
حياة بتردد : اا ا طيب .. هات اوقع
الشاب : اتفضلي
  - وقعت حياة ع الاستلام وقامت بحمل الصندوق للداخل وسط دهشتها .. فكان صندوقا كبيرا مغلفا بورق الشيفون الاحمر ومربوط بشريط من الستان الاحمر ع شكل فيونكه ..كانت حياة تنظر للصندوق بتردد اتفتحه ام لا ....حتي قطع شرودها اتصالا من يحيي
حياة : الوو
يحيي : الوووووووووووووو
حياة : هههههههه انت بتتكلم كده ليه
يحيي : هههه صباح احلي ضحكه ف الدنيا .. الهديه عجبتك ؟
حياة فاغره شفتيها : هو انت اللي باعت البوكس ده
يحيي : اينعم انا .. افتحيه وقوليلي رأيك ..هقفل معاكي شويه وارجعلك..سلام
حياة بفرحه : طيب ..سلا م
  - اغلقت حياة الهاتف ع عجاله واتجهت للصنوق المغلف وبدأت في فتحه بلهفه وتشوق .. لتجد صندوقا أخر اصغر منه مربوط بشريطه حمرا من نفس لون الفيونكه ففتتحته لتتفاجأ بفستان ( من اللون الاحمر الناري القاتم ذات الاكمام الحريريه المنقوش عليها رسومات بارزه برونزيه وعلي الصدر تدريجات من الستان مع الفصوص الماسيه اللامعه وفي الوسط حزام من اللون الفضي المرصع بفصوص ماسيه مشابهه للفصوص الاخري ..يصل طول الفستان لبعد الركبه بعدة سنتيمترات كما كان بحوذته حذاء عالي من نفس اللون ) ففرت شفتيها ف عدم تصديق ثم نظرت مرة اخري للصندوق لتجد علبه صغيرة مغلفه بورق الازاز الشفاف ..ففتحتها لتجد زجاجه من العطر القوي والجذاب واعلي الزجاجه فيونكه صغيره منقوش عليها اسم ( حياة )
كما وجدت بولا زجاجيه كبيرة مغلفه بورق شيفون احمر تحمل الكثير من انواع الشيكولاتات المختلفه  ووجدت ظرفا بداخله كارت يحمل الكلمات الاتيه :
اكتب احبك بكل الالوان
اكتب احبك باللؤلؤ والمرجان
اكتب احبك بشقائق النعمان
اكتب احبك بعيون الغزلان
اكتب احبك بالعطر والريحان
اكتب احبك بقلبي الولهان
اكتب احبك وانتي لي عنوااااان
كل عيد حب وانتي ليا اقرب اقرب ..كل عيد حب وانتي اجمل زهرة تفتحت اوراقها ف بستاني ..كل عيد حب وانتي جمبي ومعايا ..كل عيد حب وانا بحبك.....
   - ادمعت عينيها فرحا وظلت تترقص في مكانها من فرحتها حتي اتصل عليها مرة اخري
حياة بفرحه : الووو
يحيي : انتي بتنهجي كده ليه .. شكلك تعبتي من كتر التنطيط
حياة : هههههههه فرحانه فرحانه اوي
يحيي : بجد فرحانه ... يعني عرفت اجيبلك الهديه المناسبه
حياة : دي احلي واجمل وارق هديه جاتلي ف حياتي ربنا يخليك ليا وميحرمنيش منك ابدا ..بحبك
يحيي محدقا بعينيه : اييييه ..تاني كده سمعيني
حياة بهمس : ب ح ب ك بحبك
يحيي : اااه خلاص خلاص احسن بدوخ من الكلتم الحلو
حياة : هههههههه
يحيي : عايزك النهارده تبقي اجمل اميره ..هاخدك ونخرج نقضي الفلانتين سوا
حياة : هااا بجد ... بب بس
يحيي : مفيش بس .. انا جهزت كل حاجه وحاجز المكان بقالي اسبوعين واتصلت بالحج وبوست الايادي عشان يرضي
حياة : بجددد.. يعني بابا وافق ؟
يحيي : ايوووووون وافق طبعا ..النهارده الساعه 7 بالدقيقه هابقي تحت بيتك مستنيكي
حياة بفرحه شديده: اتفقنااااا
  - جمعت حياة اشيائها ووضعتها ف غرفتها وتوجهت سريعه لحجرة والدها وطرقت عده طرقات ثم دخلت لتجده يجلس ماسكا بأحدي الصحف ويرتدي نظارته الطبيه ..
حياة : بابا  بابا  بابا
صفوان باابتسامه : شكل الهديه عجبتك اووي
حياة ؛ هاااا انت كنت عارف
صفوان : طبعااا امال هيعمل حاجه زي دي قبل ما يستأذني
حياة محتضنه والدها : حبيبي يابابتي حبيبي
صفوان : ههههه ربنا يسعدك كمان وكمان ياحبيبة بابتك
------------------
( هاتفيا )
حنين : الوو .
بيبرس : حبيبة قلبي وحشتيييييييني
حنين باابتسامه : وانت وحشتني اوي ياقلب حبيبتك
بيبرس : عايزك بسرعه تلبسي وتجهزي وتبقي اجمل بنوته ف الدنيا
حنين : ليه بقي هه ليه ليه
بيبرس : ششش يخبر ابيض ع الزن.. خليها مفاجئه
حنين بفرحه : دقايق وابقي جاهزه يابسبوستي
بيبرس : بس بسرعه والنبي بلاش ساعه ف اللبس ياقلب بسبوستك
حنين : حاضر حاضر ..يلا بقي متعطلنيش
بيبرس : طييييب ..اما نشوف
--------------
(منزل علي )
علي بتهكم : فلانتين !!
وانتي شايفانا صغيرين ع لعب العيال ده
صافي بصدمه : لعب عيال ؟؟
ده مش لعب عيال ده عيد الحب وبعدين كل الناس بتخرج فيه حتي السناجل
علي : حبيبتي السناجل بيخرجوا عشان يتحصرو والمخطوبين بيخرجوا عشان مجانين
واحنا ولا هنتحصر ولا مجانين .. عايزانا نخرج نتعشا بره مفيش مانع بس مش النهارده عشان زي ماانتي شايفه كده انا نازل
صافي بتذمر : لا بقي .. كده مينفعش خالص
علي : واللهي ياحبيبتي انا قولت اللي عندي انا ماليش ف الشغل المايص ده
صافي : .... طيب ياعلي انا هخرج مع سهر
علي : طيب ..اتفضلي
صافي بدهشه : هو انت موافق بسهوله كده.. مش خايف عليا انزل بالليل لوحدي
علي : ماانتي مع صحبتك وكمان انتي مش عيله صغيره عشان اخاف عليكي تنزلي بالليل
صافي ف نفسها : ياخساره .. ياخسارة والف خسارة كان زمان في شخص بيخاف عليا من الهوا الطاير وبيحميني حتي من نفسه ..دلوقتي بقيت مش عيله صغيرة عشان يتخاف عليا .. واضح اني ان
تسرعت ولازم اتحمل نتيجه تسرعي
................
   - ارتدت حياة فستانها الجديد الذي اهداها اياه يحيي وارتدت الحذاء الخاص به وتركت شعرها ينسدل ع ضهرها بعد ان جمعت جوانبه بأحدي المشابك الفضيه اللون ثم وضعت بعض مساحيق التجميل البسيطه للغايه ثم وضعت بعضا من العطر الجذاب ونظرت لنفسها بالمرآه في فرحه وقطع شرودها ابواق سيارة يحيي لتعلن عن وصوله
فخرجت حياة بعجله بعد ان اخذت حقيبتها الحمراء الصغيره
صفوان : بسم الله ماشاء الله .. زي القمر
حياة : تسلملي ياصفصف
نوال : اوعي تتأخري ياحياة هه
حياة : حاضر ياماما.. عن اذنكو
صفوان : خلي بالك من تليفونك وعينك عليه عشان هاتصل بيكي
حياة : حاضر يابابا سلام
نوال : ههههه شوف البت مستعجله ازاي
صفوان باابتسامه : ربنا يسعدها ياارب .. انا وافقت عشان الفترة اللي فاتت كان مزاجها زفت وانا حاسس
نوال : ربنا يهنيكي ياحياة يابنت نوال يارب
صفوان : الله الله هي بنتك لوحدك ولا ايه ؟
نوال : هي الدعوة كده .. بالام اللي شالت وتعبت وربت
صفوان : وهو انا متعبتش ولا ربيت ولا شيلت 
نوال : انت الخير والبركه ياحج
صفوان : اه اه خديني بكلمتين
نوال : هههههههههه
.............
    - في الاسفل
يحيي مطلقا صفيرا عاليا : فووو فوووووو ووو القمر طلع
حياة بخجل : مساء الخير
يحيي مصافحها : يامساء الجمال يامساء الحب يامساء الورد يا .....
حياة : ههه خلاص
يحيي : ايوة كده اضحكي .. ياللي شمس الدنيا تطلع لما تطلع ضحكه منك
حياة : انت هتغني ف الشارع
يحيي : اه صحيح .. طب اركبي ونغني ف الطريق براحتنا
  - وصل يحيي وحياة لاحدي المطاعم الفاخره التي تطل ع النيل حيث تم حجز تربيزه تطل ع النيل مباشرة فاصطحبها يحيي للداخل وامسك بالكرسي الخاص بها ليجلسها عليه ثم جلس هو ..بينما كاااان....
سهر : اووو شكلك وقعتي ياصافي
صافي : It's sooo boring بقت حاجه ممله جدا..انا مكنتش متخيله انه هيطلع كده
سهر : طب وهتعملي ايه ؟
صافي : مش عارفه .. بفكر اطلق انا مش مستريحه معاه خالص 
سهر : مممم طب انتي كاتبه مؤخر كام
صافي عاقده حاجبيها : حوااالي 150 الف جنيه
سهر بصدمه : بسسسس .. طب ع الاقل حاولي تطلعي منه بأي حاجه قبل الطلاق عشان لو حبيتي تعملي مشروع ولا بيزنس
صافي بتنهيده : انا مبقتش افكر ف الفلوس .. بصراحه علي مش مقصر ف حكايه الفلوس دي انما الحب والراحه مش لقياهم معاه .. انا ندمانه ياسهر relly انا ندمانه
سهر : هو انتي حنيتي ليه بعد ما وقف ع رجله ولا لما دخل حياته واحده تانيه وف وقت قياسي ده اللي مضايقك
صافي : مش عارفه .. كل ما افكر ف يحيي الندم بيموتني لاني ضيعته من ايديا
سهر فاغره شفتيها : بصي بصي مين هناك
صافي موجهه نظرها : مين ! هاااااااا ده يحيي
سهر : هي اللي معاه دي مراته ؟
صافي باانزعاج : لسه مبقتش مراته ..دي خطيبته
سهر : مبيقعش غير واقف .. دي قمورة خالص ... وكمان بيعدلها الكرسي ويقعدها .. ليكي حق تندمي ده شكله جنتل خالص
صافي : واضح انهم جايين يحتفلو بالفلانتين
سهر : مممم
( الجانب الاخر )
يحيي ممسكا بكف يدها : ايه رأيك ف المكان ؟
حياة : جميل جداا ومنظر النيل تحفه
يحيي : تحفه بس ... ده يهبل
حياة ناظره حولها : انت بتيجي هنا كتير ؟
يحيي : اه .. انا بحب المكان هنا اوووي
حياة : ممم ماهو واضح .. حتي الناس هنا كلهم عارفينك
يحيي : انا طالب اورد بقالي اسبوعين زمانه جاي ف السكه
..... : يحيي باشا منور ... اتفضلوا بالف هنا
يحيي : تسلم ايدك ياجيمي
جيمي : تسلم .. وكل عيد حب وانتوا طيبين ..عن اذنكو
يحيي : اتفضل .... ايه رأيك
حياه بانبهار : دي جنان
يحيي : دي بقي تورته الفلانتين ( تورته حمراء محاطه بالكريم شانتيه احمر اللون وقطع الفراوله مع بشر الشيكولاته وحبات الشيكولاته الكرسبي)
يحيي : دي مش لاي حد .. دي ليا انا مخصوص 
حياة : مممم
   - قام يحيي بقطع التارت بنفسه ووضعه ف الاطباق ثم بدأ في اطعامها
حياة بخجل : طب ممكن اكل انا .. الناس كده هتبص علينا
يحيي : متبصيش ع الناس لان كلامهم ولا بيزود ولا بينقص .. انتي هنا معايا
حياة باابتسامه : حاضر
.....
سهر : هاااااا كمان بيأكلها ف بوقها
صافي بغيظ : من ساعة ما قعدوا وهما بيضحكوا مش عارفه ليه
سهر : اوب اوب ده بيبوس ايدها ..هو عمرة باس ايدك ياصافي ؟
صافي ناظرة للاسفل : كان كل ما يشوفني يبوس ايدي
سهر : بصي بصي .. ده بيعدلها شعرها كمان صافي بغضب شديد : لا بقي ..كده كتير
It's over ايه كل ده
سهر : استني بس .. ياصافي رايحه فين يامجنونه ... صاااافي
-----------------