اقتباسات

الاخوه

بصفتي بنت وحيدة، كانوا دائما صاحباتي يحسدوني انه ما عندي لا اخوة ولا خوات، بس انا كنت كتير حزينة من جوا؛ بتذكر موقف صار معي ...
كنت يومها بالمدرسة، لما بنت ضربوها بنات قدامي؛ صارت تعيط، وفجأة لقيت اختها الكبيرة اجت وضربت البنت لي ضربتها وحضنت اختها، بنفس الفترة وقعت انا من على الدرج، اجو بنات صاحباتي وسألوا عني، بس ما لقيت حدا احضنه وابكي !

حتى لما كنت أقعد مع بنات ويصيروا يحكوا عن طوشهم مع خواتهم، كنت اسرح واصير احكي يا الله كيف الاحساس لما يكون عندك اخت تسرق اواعيكي وتطاوشي معها ....

وانا توجيهي صار عندي صاحبة اعتبرها اختي، وكنا جد كثير صحبة مع بعض، ونلبس مع بعض وناكل ...
مرى صار مشكلة بالبيت عندي، ما قدرت اتصل عصاحبتي واحكيلها مشكلتنا، يومها صرت اعيط لحالي، يعني كيف افهمها شي مش عايشته!

حتى لما فتت الجامعة، كانت هي كل يوم اخوها يوصلها عالجامعة، هي تتضايق منه وتحكيلي اوف شو شكاك ... قال بخاف علي..
بس انا كنت احسدها واتمنى لو عندي اخو ... وخصوصا لما تمرض ، وما تلاقي حدا فعليا جنبها الا اخوها ...

بكل مكان يحكولي ياي نيالك، فش لا اخو يتحكم فيكي ولا في اخت تشاركك كل شي ... دلوعة اهلك ...
احكيلهم ما حدا حاسس بشعوري ..
يحكولي بكرا بتتزوجي وزوجك بعوضك ..
حتى لما اجو يطلبوني، كنت لحالي ما في خوات يتنصتو من ورا الباب ويحكولي، حلو .. بشع .. قصير .. طويل، ما في خوات يعملولي شعري، ولا اخو قاعد معهم بالصالون ويحكيلهم هاي البنت ما في اغلى منها ...

حتى لما تزوجت، ما كان في حوالي خواتي ارقص معهم؛ اروح معهم عالصالون، صحيح كان في صاحبات بس الخوات غير كتييير ...

بس صعب اي حدا يحس بشعوري، هو اكيد احنا بنقدر نعيش بدون اخوة وخوات، بس رح نضل طول عمرنا نحلم بالطوشة بينا، نحلم شعور اخت تحضنك لما تتقاتلي مع ابوكي، صوتها يعلا وتدافع عنك وتفوت تبهدلك، نحلم بأخو نشوف حالنا في ، بدنا نزوجوا ... اخو يكون سند لالنا .... يكون الملجأ الي بنروحلة لما نفقد الثقة بالكل ...
وجد الناس الي ما عندهم اخوة بكونوا حساسين اكثر، اي شي ممكن يبكيهم، واي موقف ممكن يخليهم يزعلوا ويحسوا بوحدتهم ديروا بالكم لما تتعاملوا معهم

ما حدا بعرف قيمة اخوته الا الي نفسه يكون عنده اخوة ❤